گيمالاي تاۋلارىنا جاۋعان نوسەر جاڭبىر وزەندەردىڭ ارناسىنان تاسۋىنا سەبەپ بولعان. قۇتقارۋشىلارعا شالعاي اۋىلدارعا جەتۋ ءۇشىن جاياۋ جۇرۋگە, سونداي-اق تىكۇشاقتار مەن موتورلى قايىقتاردى پايدالانۋعا تۋرا كەلگەن, دەپ حابارلايدى Egemen.kz DW-گە سىلتەمە جاساپ.
نەپال مەن ءۇندىستاندا بولعان تابيعي اپاتتار 60-تان استام ادامنىڭ ءومىرىن قيعان. نەپالدىڭ توتەنشە جاعدايلارمەن كۇرەس ۇلتتىق باسقارماسىنىڭ وكىلى شانتي ماحاتتىڭ ايتۋىنشا, 5 قازان كۇنىنە قاراي ەلدە كەمىندە 43 ادامنىڭ قازاسى تىركەلگەن.
شىعىستاعى يلام اۋدانىندا 37 ادام قازا تاپقان, تاعى بەسەۋى ءىز-ءتۇزسىز جوعالعان. Reuters دەرەگىنە سۇيەنسەك, نەپالدا قۇرباندار سانى كەمىندە 47-گە جەتكەن, كوشكىندەر بىرنەشە اۋىلدى تۇگەلدەي شايىپ كەتكەن.
ءۇندىستاننىڭ باتىس بەنگاليا شتاتىنداعى دارجيلينگ ايماعىندا دا نوسەر جاۋىننان كوشكىندەر ءجۇرىپ, ۇيلەر مەن ينفراقۇرىلىم زاقىمدانعان. بۇل جەردە 20-دان استام ادام قازا بولعان.
ەستەرىڭىزگە سالا كەتەيىك, قاتتى جاۋىن 3 قازاندا باستالىپ, ەكى كۇن وتكەن سوڭ عانا قۇتقارۋشىلار تاۋ بوكتەرىندەگى شالعاي ەلدى مەكەندەرگە جەتە العان. كوشكىندەر جولداردى جاۋىپ, اۋە قاتىناسىنىڭ ۋاقىتشا توقتاۋىنا سەبەپ بولدى. نەپال استاناسى كاتماندۋدا دا وزەندەر ارناسىنان اسىپ, قالاعا قاۋىپ ءتوندىردى.