جوبا تۇجىرىمداماسىنا سايكەس, كوكشەتاۋ قالاسىنداعى ماڭگىلىك الاۋ, داڭق اللەياسى, تاۋەلسىزدىك الاڭى جانە ساعديەۆ كوشەسى سەكىلدى قالانىڭ ەڭ كورنەكتى جەرلەرىن ۇيلەسىمدى ساۋلەتىمەن جانە ديزاينەرلىك شەشىمدەرىمەن ەرەكشەلەنەتىن بىرىڭعاي تۋريستىك باعىتقا بىرىكتىرۋ كوزدەلگەن, دەپ جازادى Egemen.kz.
كوكشەتاۋ قالاسىنىڭ اكىمى ءانۋار كۇمپەكەەۆ جوبا اياسىندا اۋماقتى كوگالداندىرۋ, سونداي-اق اۆتوماتتى سۋارۋ جۇيەسى, قۇرعاق سۋبۇرقاق, دەكوراتيۆتى شامدار مەن ءساندى ورىندىقتار ورناتۋ جۇمىستارى جۇرگىزىلەتىنىن ايتتى. قوپا كولىمەن جانە جاڭا جاعالاۋمەن ۇشتاساتىن كەڭىستىك قالا تۇرعىندارى مەن قوناقتارى ءۇشىن قولايلى ورتاعا اينالادى. جالپى اۋماعى 7,5 گەكتارعا جۋىق جەر اباتتاندىرىلىپ, جاسىل جەلەك وتىرعىزىلماق.
پرەزيدەنتكە «تازا قازاقستان» جالپى رەسپۋبليكالىق اكتسياسى اياسىندا كوكشەتاۋدا 7 مىڭنان استام اعاش وتىرعىزىلعانى تۋرالى باياندالدى. جىل سوڭىنا دەيىن ونىڭ سانى 11 مىڭعا جەتكىزىلەدى.
بۇدان كەيىن مەملەكەت باسشىسى بيىل ماۋسىم ايىندا پايدالانۋعا بەرىلگەن جاڭا جاعالاۋمەن تانىستى.