ەلىمىزدە قۇرىلعان العاشقى حالىقارالىق اقپارات اگەنتتىگى – «قازاقپاراتتىڭ» 105 جىلدىعى كەڭ كولەمدە اتالىپ ءوتتى. تامىز ايىنان باستاپ ەلورداداعى «Mega Silk Way» ساۋدا ورتالىعىندا «قازاقستان تاريحى – «Kazinform» فوتوسۋرەتتەرىندە» اتتى كورمە اشىلدى. ال پرەزيدەنتتىك ورتالىقتا ۇيىمداستىرىلعان سالتاناتتى جيىندا «Kazinform. ءبىزدىڭ تاريح» دەرەكتى ءفيلمىنىڭ پرەمەراسى ءوتىپ, «Kazinform. شىنايى حرونيكا» كىتابى تانىستىرىلدى.
سالتاناتتى ءىس-شارادا پرەزيدەنت كومەكشىسى – ءباسپاسوز حاتشىسى رۋسلان جەلدىباي مەملەكەت باسشىسى قاسىم-جومارت توقاەۆتىڭ اگەنتتىك ۇجىمىنا ارنالعان قۇتتىقتاۋ حاتىن وقىپ بەردى.
«عاسىردان استام تاريحى بار اگەنتتىك وسى كەزەڭدە ەلىمىزدىڭ اقپارات سالاسىن دامىتۋعا ولشەۋسىز ۇلەس قوستى. جۇرتشىلىقتى دۇنيەجۇزىندەگى اسا ماڭىزدى وقيعالاردان دەر كەزىندە حاباردار ەتىپ, قازاقستاننىڭ جۇزجىلدىق جىلناماسىن جازدى. شەجىرەلى شاڭىراقتا قولتاڭباسى قالعان قالامگەرلەر ۇلت مۇددەسىن بارىنەن بيىك قويىپ, حالىققا قالتقىسىز قىزمەت ەتتى. قازىر دە رەداكتسيا ۇجىمى بۇل ۇستانىمنان اينىماي, اعا بۋىن سالعان سارا جولدى لايىقتى جالعاستىرىپ كەلەدى. ولار قوعامداعى كوكەيكەستى ماسەلەلەردى ۇنەمى باتىل كوتەرىپ ءجۇر. بۇگىندە اگەنتتىك بىرنەشە تىلدە جاڭالىق تاراتاتىن بەلدى حالىقارالىق اقپارات قۇرالىنا اينالدى. الەمدىك باسىلىمداردىڭ «Kazinform» مالىمەتتەرىنە جۇگىنۋى – سونىڭ ايقىن دالەلى», دەلىنگەن قۇتتىقتاۋ ماتىنىندە.
مەملەكەت باسشىسى ادىلەتتى قازاقستاندى قۇرۋ ىسىنە بەلسەنە اتسالىسىپ, ءوز مىندەتىن ابىرويمەن اتقارىپ جۇرگەن اگەنتتىك قىزمەتكەرلەرىنە شىنايى ريزاشىلىعىن بىلدىرگەن. ر.جەلدىباي بىرقاتار قىزمەتكەرگە مەملەكەت باسشىسىنىڭ العىسحاتىن تابىستادى.
سونداي-اق جيىندا پرەمەر-مينيستر ولجاس بەكتەنوۆتىڭ, سەنات توراعاسى ماۋلەن اشىمباەۆتىڭ, ءماجىلىس توراعاسى ەرلان قوشانوۆتىڭ, مادەنيەت جانە اقپارات ءمينيسترى ايدا بالاەۆانىڭ قۇتتىقتاۋ حاتتارى وقىلىپ, تاپسىرىلدى.
ءىس-شاراعا دەپۋتاتتار, مەملەكەتتىك قىزمەتكەرلەر, حالىقارالىق ۇيىمدار وكىلدەرى, ساراپشىلار, باق وكىلدەرى مەن «قازاقپارات»-تىڭ شەتەلدىك ارىپتەستەرى قاتىستى.
ء«بىز ءبىرىنشى كەزەكتە ۇزاق جىل بويى جيناقتاعان تاجىريبەمىزبەن بولىسكىمىز كەلدى. سوندىقتان وتكەن تاريحپەن بىرگە, قازىرگى جاھاندانۋ زامانىندا اگەنتتىك نەمەن اينالىسىپ جاتقانى تۋرالى جازدىق. سونداي-اق ۆيرۋستىق كونتەنت, تەرەڭ تالداۋ مەن ءادىل جۋرناليستىك زەرتتەۋ دايىنداۋ ءۇشىن قانداي تاسىلدەر قاجەت ەكەنىن دە قوستىق», دەدى «قازاقپارات» حاا ديرەكتورىنىڭ ورىنباسارى ۆلاديمير كۋرياتوۆ.
ايتا كەتسەك, العاشقى قازاق اقپارات اگەنتتىگى 1920 جىلى 13 تامىزدا بۇكىلوداقتىق ورتالىق اتقارۋ كوميتەتى جانىنان روستا-نىڭ ورىنبور-تورعاي بولىمشەسى رەتىندە اشىلدى. بۇگىندە «قازاقپارات» جاڭالىقتارى قازاق, ورىس, اعىلشىن, قىتاي, وزبەك تىلدەرىندە تاراتىلادى.