قوستاناي وبلىسىندا پرەزيدەنت جانىنداعى ۇلتتىق عىلىم اكادەمياسى پرەزيديۋمىنىڭ «قۋاتتى وڭىرلىك عىلىم – قۋاتتى ءوڭىر» تاقىرىبىندا كوشپەلى وتىرىسى ءوتتى. وتاندىق جانە شەتەلدىك عالىمدار, بيزنەس جانە جوعارى وقۋ ورىندارىنىڭ وكىلدەرى, مەملەكەتتىك ورگانداردىڭ باسشىلارى سالاداعى ماسەلەلەردى تالقىلادى. جيىنعا سەنات دەپۋتاتى سەرگەي كارپليۋك قاتىستى.
قوستاناي – اۋىل شارۋاشىلىعى مەن مال شارۋاشىلىعى ونىمدەرىن وڭدەۋمەن اينالىساتىن ءوڭىردىڭ ءبىرى. تىنىس-تىرشىلىگى وسى سالاعا باعىتتالعان. ەندى قازىر زامان تالابىنا ساي يننوۆاتسيالار مەن تسيفرلىق تەحنولوگيالاردى ەنگىزىپ, ەكولوگيالىق تۇراقتىلىقتى قامتاماسىز ەتۋ قاجەت. سونداي-اق مامان دايارلاپ, عىلىمي الەۋەتتى نىعايتۋ ماسەلەلەرىن جولعا قويۋ كەرەك.
«قوستاناي وبلىسى ايتارلىقتاي اگرارلىق جانە ونەركاسىپتىك رەسۋرستارعا يە. دەگەنمەن ولاردىڭ الەۋەتىن تولىق اشۋ ءۇشىن عىلىمي ينفراقۇرىلىمدى جاڭعىرتىپ, جاس زەرتتەۋشىلەردى تارتۋ قاجەت. بۇل ءبىلىم ەكونوميكاسىن قالىپتاستىرۋدىڭ جانە ءوڭىردىڭ باسەكەگە قابىلەتتىلىگىن ارتتىرۋدىڭ نەگىزىنە اينالادى», دەدى سەناتور س.كارپليۋك.
جيىندا عىلىمي-يننوۆاتسيالىق كورمە, فورسايت-سەسسيا ۇيىمداستىرىلعان, سونداي-اق رۋدنىي يندۋستريالىق ۋنيۆەرسيتەتى بازاسىندا وڭىرلىك فورسايت-ورتالىعى اشىلدى. سالانى عىلىمعا باعىتتاۋ ماقساتىمەن ۇلتتىق عىلىم اكادەمياسى مەن عىلىم قورى ىنتىماقتاستىق تۋرالى مەموراندۋم جاساسىپ, الداعى ۋاقىتتا بىرلەسكەن جوبالار مەن تاجىريبە الماسۋدى جوسپارلاپ وتىر.
سونىمەن قاتار تالدامالىق بايانداما ازىرلەنىپ ۇكىمەتكە جولدانباق.