سەناتورلاردىڭ وڭىرلەردەگى ساپارى جالعاسىپ جاتىر. سەنات دەپۋتاتتارى ولگا بۋلاۆكينا مەن شاكارىم بۇقتۇعۇتوۆ شىعىس قازاقستان وبلىسىنا جاساعان جۇمىس ساپارى اياسىندا ريددەر قالاسىنا باردى. ال سۇلتانبەك ماكەجانوۆ الماتى قالاسىندا دەنساۋلىق ساقتاۋ جۇيەسىن جاڭعىرتۋ بارىسىمەن, ال ساعىندىق لۇقپانوۆ اتىراۋ وبلىسىنداعى تەمىرجول سالاسىن دامىتۋ ماسەلەلەرىمەن تانىستى.
ءىسساپار بارىسىندا ولار ەڭبەك ۇجىمدارىمەن كەزدەسىپ, قۇرىلىس كەزەڭىندەگى ينفراقۇرىلىمدىق جانە الەۋمەتتىك جوبالاردىڭ جۇزەگە اسىرىلۋ بارىسىمەن تانىستى.
ريددەر ورمان شارۋاشىلىعىندا سەناتورلار جۇمىسشىلارمەن جاڭادان كۇشىنە ەنگەن «ەرەكشە قورعالاتىن تابيعي اۋماقتار تۋرالى» زاڭنىڭ نەگىزگى ەرەجەلەرىن, سونداي-اق ورمان قورى جەرلەرىن باسقارۋ ماسەلەلەرىن تالقىلادى. سالا قىزمەتكەرلەرىنە كورسەتىلەتىن الەۋمەتتىك قولداۋ شارالارىنا ەرەكشە نازار اۋدارىلدى.
كەزدەسۋ كەزىندە ەكولوگيالىق مادەنيەتتى قالىپتاستىرۋ, قورشاعان ورتاعا جاۋاپكەرشىلىكپەن قاراۋ ماسەلەلەرى كوتەرىلدى. سەناتورلار قوعامدىق ورىندارداعى تازالىق پەن ءتارتىپ تەك كوممۋنالدىق قىزمەتتەردىڭ جۇمىسىنا عانا ەمەس, ەڭ الدىمەن, ءار ازاماتتىڭ جەكە جاۋاپكەرشىلىگىنە بايلانىستى ەكەنىن اتاپ ءوتتى.
«تازالىق – تەك تەحنيكا مەن باقىلاۋ ماسەلەسى عانا ەمەس, قوعامنىڭ مادەنيەتى, تاربيەسى مەن ساناسىنىڭ كورىنىسى. بۇگىندە تابيعاتقا ۇقىپتى كوزقاراستى كىشكەنتاي كەزدەن باستاپ قالىپتاستىرۋ اسا ماڭىزدى. بىزگە تەك ەرەجەلەر عانا ەمەس, ىشكى جاۋاپكەرشىلىك تە قاجەت. مەملەكەت باسشىسىنىڭ «تازا قازاقستان» باستاماسى – بۇل جاي عانا ۇران ەمەس, بۇل – ەلدىكتىڭ بەلگىسى», دەدى ولگا بۋلاۆكينا.
سەناتورلار سونداي-اق «Montana» سپورت كلۋبىنا بارىپ, جاستار اراسىندا سالاماتتى ءومىر سالتىن قالىپتاستىرۋ مەن سپورتپەن اينالىسۋعا جاعداي جاساۋدىڭ ماڭىزدىلىعىن اتاپ ءوتتى. ولاردىڭ ايتۋىنشا, قولجەتىمدى سپورت ينفراقۇرىلىمىن دامىتۋ – الەۋمەتتىك ساياساتتىڭ باسىم باعىتتارىنىڭ ءبىرى.
سونىمەن قاتار دەپۋتاتتار جاڭادان سالىنىپ جاتقان «SteakKing» سۋپەرماركەتىنىڭ قۇرىلىسىمەن تانىستى. سەناتورلاردىڭ ايتۋىنشا, بۇل جوبا شاعىن جانە ورتا بيزنەستى دامىتۋعا سەرپىن بەرىپ, وڭىردەگى تۇتىنۋشىلىق ينفراقۇرىلىمدى كەڭەيتۋگە ۇلەس قوسادى.
دەپۋتاتتار كوپبەيىندى اۋرۋحانا كەشەنىنىڭ قۇرىلىس الاڭىنا باردى. وندا مەديتسينالىق مەكەمەنىڭ قارجىلاندىرىلۋى, جابدىقتالۋى جانە قۇرىلىستىڭ اياقتالۋ مەرزىمى تالقىلاندى.
پارلامەنتشىلەر بۇل نىساننىڭ ىسكە قوسىلۋى ريددەر جانە جاقىن ماڭداعى ەلدى مەكەن تۇرعىندارى ءۇشىن مەديتسينالىق قىزمەتتەردىڭ قولجەتىمدىلىگى مەن ساپاسىن ەداۋىر ارتتىراتىنىن ايتتى.
ء«بىز ەلىمىزدىڭ وڭىرلەرىندە, سونىڭ ىشىندە ريددەر قالاسىندا ازاماتتارىمىزدىڭ ءومىر ءسۇرۋ ساپاسىن ارتتىرۋعا باعىتتالعان ناقتى جوبالاردىڭ ىسكە اسىپ جاتقانىن كورىپ وتىرمىز. مۇنداي ساپارلار حالىقتىڭ پىكىرىن تىكەلەي ەستىپ, شەشۋدى قاجەت ەتەتىن ماسەلەلەردى ناقتىلاپ, زاڭ شىعارۋ جانە وكىلدىك قىزمەتىمىز اياسىندا ناقتى ناتيجەلەرگە قول جەتكىزۋگە مۇمكىندىك بەرەدى», دەدى شاكارىم بۇقتۇعۇتوۆ.
ال دەپۋتات سۇلتانبەك ماكەجانوۆ الماتى قالالىق ءماسليحاتىنىڭ دەپۋتاتتارىمەن بىرگە بىرقاتار دەنساۋلىق ساقتاۋ نىساندارىن ارالادى. اتاپ ايتقاندا, سەناتور بيىل قۇرىلىسى باستالعان جاڭا ەمحانانىڭ قۇرىلىس الاڭىندا بولدى. ول زاماناۋي ءارى قولجەتىمدى مەديتسينالىق مەكەمەلەر سالۋ مەملەكەتتىك ساياساتتىڭ باسىم باعىتتارىنىڭ ءبىرى ەكەنىن اتاپ ءوتتى.
«مۇنداي جوبالار بەلگىلەنگەن مەرزىمدە ءارى ساپالى جۇزەگە اسىرىلۋى كەرەك. ويتكەنى بۇل تىكەلەي حالىققا كورسەتىلەتىن مەديتسينالىق كومەكتىڭ ساپاسىنا اسەر ەتەدى», دەدى س.ماكەجانوۆ.
سونداي-اق سەناتور اۋقىمدى قايتا جوندەۋ جۇمىستارى جۇرگىزىلگەن №3 قالالىق ەمحاناعا باردى. مۇندا ىشكى جايلار مەن ينجەنەرلىك جەلىلەر تولىق جاڭارتىلىپ, تسيفرلىق قىزمەتتەر ەنگىزىلگەن, سونداي-اق زاماناۋي مەديتسينالىق قۇرال-جابدىقتار ورناتىلعان.
«دەنساۋلىق ساقتاۋ ينفراقۇرىلىمىن دامىتۋ – ۇلت ساۋلىعىنا سالىناتىن ينۆەستيتسيا. پارلامەنت مۇشەلەرى رەتىندە ءبىزدىڭ مىندەتىمىز – مۇنداي جوبالاردىڭ ساپالى جۇزەگە اسۋىن باقىلاپ, مەديتسينالىق قىزمەتتەردىڭ ءاربىر ازاماتقا قولجەتىمدى بولۋىنا جاعداي جاساۋ», دەپ اتاپ ءوتتى دەپۋتات.
ساپار بارىسىندا س.ماكەجانوۆ رەنوۆاتسيا باعدارلاماسى اياسىندا ىسكە اسىرىلىپ جاتقان قۇرىلىس نىساندارىندا دا بولدى.
سەناتور ساعىندىق لۇقپانوۆ «قازاقستان تەمىر جولى» ۇك» اكتسيونەرلىك قوعامىنىڭ وڭىردەگى فيليالى وكىلدەرىمەن كەزدەستى. وندا جۇك جانە جولاۋشى تاسىمالدارىنىڭ قازىرگى جاعدايى مەن بولاشاعى, قوزعالىس قاۋىپسىزدىگىن قامتاماسىز ەتۋ شارالارى, سونداي-اق وڭىردەگى تەمىرجول جەلىسىن جاڭعىرتۋ مەن وڭتايلاندىرۋ جوسپارلارى تالقىلاندى.
«زاماناۋي ءارى قاۋىپسىز تەمىرجول ينفراقۇرىلىمىن دامىتۋ – اتىراۋ وبلىسىنىڭ تۇراقتى ەكونوميكالىق ءوسىمىنىڭ نەگىزگى شارتتارىنىڭ ءبىرى. سەنات جۇك تاسىمالىن ءتيىمدى ەتۋگە جانە كولىك قىزمەتتەرىنىڭ ساپاسىن ارتتىرۋعا باعىتتالعان باستامالاردى الداعى ۋاقىتتا دا قولدايدى», دەدى س.لۇقپانوۆ.
سەناتور, سونداي-اق, تەمىرجول سالاسىن دامىتۋدىڭ الەۋمەتتىك جانە ەكونوميكالىق ماڭىزى زور ەكەنىن اتاپ ءوتتى. بۇل سالا وڭىردەگى حالىقتى جۇمىسپەن قامتۋعا, ينۆەستيتسيا ارتتىرۋعا جانە تۇرعىنداردىڭ ءومىر ساپاسىنا تىكەلەي ىقپال ەتەدى.