سەنات دەپۋتاتتارى بىرقاتار وڭىردە پرەزيدەنتتىڭ باستاماسىمەن جۇزەگە اسىپ جاتقان «كەلەشەك مەكتەپتەرى» ۇلتتىق جوباسى اياسىنداعى شارالارمەن قوسا ءبىلىم بەرۋ سالاسىنداعى مەملەكەتتىك باسىم باستامالاردى ىسكە اسىرۋ بارىسىمەن تانىستى. اتالعان جوبا زاماناۋي, قاۋىپسىز جانە جايلى ءبىلىم بەرۋ ورتاسىن قالىپتاستىرۋعا باعىتتالعان.
سەناتور ەرنۇر ايتكەنوۆ «كەلەشەك مەكتەپتەرى» جوباسى اياسىندا سالىنىپ جاتقان جالپى ءبىلىم بەرەتىن مەكتەپتىڭ قۇرىلىسىمەن تانىستى. ول پاۆلودار قالاسىنداعى قارقىندى دامىپ كەلە جاتقان «دوستىق» شاعىن اۋدانىندا سالىنىپ جاتىر. قازىر جۇمىستىڭ 80 پايىزعا جۋىعى اياقتالدى. مەكتەپ جاڭا وقۋ جىلىندا پايدالانۋعا بەرىلمەك.
«ادامي كاپيتالدىڭ نەگىزى مەكتەپتە قالانادى, ازاماتتىق جاۋاپكەرشىلىك تاربيەلەنەدى جانە ءبىلىم مادەنيەتى قالىپتاسادى. «كەلەشەك مەكتەپتەرى» وقۋ ينفراقۇرىلىمىندا ۋاقىتتىڭ اسا ماڭىزدى تالابىنا جاۋاپ بەرەتىن جاڭا دەڭگەيدەگى ەتالون بولاتىنىنا سەنىمدىمىن», دەپ اتاپ ءوتتى ە.ايتكەنوۆ.
عيماراتتا زاماناۋي وقۋ كابينەتتەرى, زەرتحانا مەن شەبەرحانا, اكت جانە سپورت زالدارى, اباتتاندىرىلعان اۋلا بار. بىلىكتى پەداگوگيكالىق قۇرام جاساقتالىپ, وقۋ سىنىپتارى جاسالادى.
سونداي-اق سەنات دەپۋتاتتارى ناۋرىزباي بايقاداموۆ پەن رۋسلان رۇستەموۆ قىزىلوردا وبلىسىنا جۇمىس ساپارى بارىسىندا «كەلەشەك مەكتەپتەرىمەن» تانىستى. قىزىلوردا قالاسىندا 1 500 ورىندىق مەكتەپ قۇرىلىسى باستالعان.
«كەلەشەك مەكتەپتەرى» جوباسى – جاڭا ساپاداعى مەكتەپ ينفراقۇرىلىمىن قالىپتاستىرۋ باعىتىنداعى ماڭىزدى قادام. زاماناۋي, جايلى جانە تەحنولوگيالىق مەكتەپتەر بالالاردىڭ ءبىلىمى مەن دامۋ ورتالىعىنا اينالعان. سوندىقتان قۇرىلىستىڭ ۋاقتىلى اياقتالۋىن عانا ەمەس, ونىڭ جوعارى ستاندارتقا سايكەستىگىن دە قامتاماسىز ەتۋ كەرەك», دەدى ن.بايقاداموۆ.
بۇعان قوسا قىزىلورداداعى اگرارلىق سەكتورعا ورتا بۋىن ماماندار دايارلايتىن اگروتەحنيكالىق كوللەدجدە بولدى. مۇندا جىل سايىن 140-تان اسا تۇلەك سۇرانىسقا يە ماماندىق يەسى اتانىپ, اۋىلدىق وڭىرلەردى بىلىكتى كادرلارمەن قامتاماسىز ەتۋگە ۇلەس قوسىپ كەلەدى.
«مەملەكەت باسشىسىنىڭ وسى جىلدى جۇمىسشى ماماندىقتار جىلى دەپ جاريالاۋى تەگىن ەمەس. تاجىريبەسى بار بىلىكتى ماماندارعا سۇرانىس ارتىپ وتىر. جاستار ەڭبەك نارىعىندا تابىستى بولۋى ءۇشىن كوللەدجدەردى زاماناۋي تەحنيكالىق جابدىقپەن قامتاماسىز ەتىپ, تسيفرلىق جانە يننوۆاتسيالىق ءبىلىم بەرۋ ستاندارتتارىن ەنگىزۋ قاجەت. جۇمىسشى كادرلاردى دايارلاۋ – مەملەكەتتىڭ ستراتەگيالىق باسىمدىعىنىڭ ءبىرى», دەپ اتاپ ءوتتى ر.رۇستەموۆ.
ال دەپۋتات ولگا بۋلاۆكينا شىعىس قازاقستان وبلىسىنىڭ گلۋبوكوە اۋدانىندا وتكەن دالا كۇنىنە ارنالعان ءىس-شاراعا قاتىستى. وندا ەليتالىق تۇقىمدار, كەلەشەگى بار سۇرىپتار مەن بۋدانداردىڭ, سونداي-اق زاماناۋي اگروتەحنولوگيانى قولدانا وتىرىپ وسىرىلگەن جەمىس-جيدەك داقىلدارى ونىمدەرىنىڭ كورمەسى ۇيىمداستىرىلدى. قاتىسۋشىلار وسىمدىك شارۋاشىلىعى سالاسىنداعى عىلىمي سوڭعى جاڭالىقتارمەن تانىسىپ, اۋىل شارۋاشىلىعى داقىلدارىنىڭ ونىمدىلىگى مەن تۇراقتىلىعىن ارتتىرۋ ماسەلەلەرى بويىنشا تاجىريبە الماستى.
«پارلامەنتتىك باقىلاۋ اياسىندا اگروونەركاسىپ كەشەنى سالاسىنداعى مەملەكەتتىك باعدارلامالاردى ىسكە اسىرۋدىڭ تيىمدىلىگىنە ەرەكشە نازار اۋدارىپ وتىرمىز. مەملەكەت اۋىل شارۋاشىلىعى وندىرۋشىلەرىن قولداۋعا, وتاندىق سورتتاردى ىلگەرىلەتۋگە, عىلىمي بازانى نىعايتۋعا جانە يننوۆاتسيانى ەنگىزۋگە كۇش سالىپ وتىر. اۋىلدىق جەرلەردىڭ ورنىقتى دامۋى مەن ىشكى جانە سىرتقى نارىقتاعى ءونىمنىڭ باسەكەگە قابىلەتتىلىگىن ارتتىرۋ ولاردى ىسكە اسىرۋعا بايلانىستى», دەپ اتاپ ءوتتى سەناتور.
جالپى, ەلىمىزدىڭ اگروونەركاسىپ كەشەنىن ودان ءارى دامىتۋعا مەملەكەت, عىلىم جانە بيزنەس اراسىنداعى ءوزارا ءىس-قيمىلدى نىعايتۋ ماڭىزدى. وعان اگرارلىق عىلىمدى دامىتىپ, يننوۆاتسيالىق شەشىمدەردى ەنگىزۋ قاجەت. سونداي-اق اۋىل شارۋاشىلىعى ءونىمىن وندىرۋشىلەردىڭ عىلىمي جەتىستىكتەرگە قول جەتكىزۋىن كەڭەيتىپ, اگرارلىق سەكتورعا مەملەكەت قولداۋىن ارتتىرۋ دا نازاردان تىس قالماۋى كەرەك.