اۋىل تۇرعىندارىن بارىنشا قولداۋ قاجەت

سەنات توراعاسىنىڭ ورىنباسارى ولگا پەرەپەچينا مەن سەناتور اسەم راحمەتوۆا سولتۇستىك قازاقستان وبلىسىنداعى ايىر­تاۋ جانە اقجار اۋداندارىندا بولدى. ولار الدىمەن ايىرتاۋ اۋدا­نىنداعى ساۋمالكول اۋىلىندا سپورت ستاديونىنىڭ قۇرى­لىسىن كوردى. سونداي-اق كۋتۋ­زوۆكا اۋىلىندا قۇرعاق بيە ءسۇتىن وندىرەتىن فەرمانىڭ قۇرىلىس الاڭىندا, گورنوە اۋىلىندا ورمان تۇقىمباعىندا بولدى.

ء«بىز اۋىلداردى ساقتاۋ مەن دامىتۋعا قاجەتتى بارلىق جاع­داي­دى جاساي وتىرىپ, جايلى احۋال قا­لىپ­تاستىرۋعا كوڭىل ءبولۋىمىز كەرەك. جاستاردىڭ جۇمىس ىزدەپ قالا­عا كەتۋى – كۇردەلى ماسەلە. اۋىلدا جۇمىس ورىندارىن اشۋ قاجەت. ويتكەنى بۇل – تولىققاندى ءومىر ءسۇرۋدىڭ نەگىزى», دەدى ءا.راحمەتوۆا.

و.پەرەپەچينا ايماققا ساپارى بارىسىندا ماناش قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ تۇلەكتەرىنە ديپلوم تاپسىرۋ سالتاناتتى راسىمىنە قاتىستى.

ء«ار تۇلەكتىڭ ءوز كاسىبىن تا­ۋىپ قانا قويماي, تۋعان ولكەنىڭ جانە جالپى ەلىمىزدىڭ دامۋىنا ۇلەس قوسۋىن تىلەيمىن. يگەرگەن ءبىلىم مەن ۇيرەنگەن داعدى تابىس­تى ەڭبەك جولىندا بەرىك نەگىز بولاتىنى ءسوزسىز. ۋنيۆەرسيتەت تالاي كوشباسشىلار مەن بىلىكتى مامانداردى دايارلاپ شىعاردى», دەدى سەناتور.

ال سەنات دەپۋتاتتارى سۇل­تان دۇيسەمبينوۆ, عالياسقار سارىباەۆ, امانگەلدى تولا­ميسوۆ جەتىسۋ وبلىسىنداعى كەر­بۇ­لاق اۋدانىنىڭ قوعالى اۋى­لىن­داعى بىرقاتار الەۋمەتتىك جانە ينفراقۇرىلىمدىق نىساندى ارالادى.

اۋىل ەڭبەككەرلەرىمەن كەزدەسۋدە قۇرعاقشىلىق كەزىندە قولداۋ شارالارى, تەحنيكا جانە تىڭايتقىشپەن قامتاماسىز ەتۋ, سۋارمالى سۋعا قول جەتكىزۋ ماسەلەلەرى تالقىلاندى. تۇر­عىن­دار سۋبسيديا جۇيەسىن جەتىلدىرۋ, جەڭىلدەتىلگەن نەسيە بەرۋ باعدارلاماسىنىڭ اۋقىمىن كەڭەيتۋ, بىلىكتى اگرونومدار دايارلاۋ جونىندە ۇسىنىستارىن ايتتى.

«اۋىل – بۇل وندىرىستىك كۇش-قۋات قانا ەمەس, ەلىمىزدىڭ تۇراقتىلىعىنىڭ كەپىلى. اۋىل ەڭبەككەرلەرىن قولداۋ جانە اۋىلدىق جەرلەردە ءومىر ءسۇرۋ جاعدايىن جاقسارتۋ مەملەكەتتىك ساياساتتىڭ ماڭىزدى مىندەتى بولىپ قالا بەرەدى», دەپ اتاپ ءوتتى ع.سارىباەۆ.

دەپۋتاتتار ءلاززات رىسبەكوۆا مەن ارمان وتەعۇلوۆ باتىس قازاقستان وبلىسىنداعى بايتە­رەك جانە اقجايىق اۋداندارىندا, سونداي-اق ورال قالاسىندا بولدى. سەناتورلار الەۋمەتتىك, ينفراقۇرىلىمدىق جانە وندىرىستىك جوبالاردى ىسكە اسىرۋ بارىسىمەن تانىسىپ, ءوڭىردى دامىتۋدىڭ ماسەلەلەرىن جەرگىلىكتى تۇرعىندارمەن بىرگە تالقىلادى.

دەپۋتاتتار ماكاروۆو اۋىلىندا وتكەن جىلدىڭ سوڭىندا «اۋىل اماناتى» باعدارلاماسى اياسىندا ىسكە قوسىلعان جاڭا قۇس فابريكاسىنا دا باردى. سونداي-اق وكتيابرسكوە اۋىلىندا كوكونىس وسىرۋمەن اينالىساتىن «اۆگۋست» شارۋا قوجالىعىنىڭ قىزمەتىمەن تانىسىپ, كوللەكتسيالىق باقتى ارالادى. باعباندار 2024 جىلدىڭ كوكتەمگى سۋ تاسقىنى ايتارلىقتاي زيان كەلتىرگەنىن ايتتى, باقتاعى جەمىس اعاشىنىڭ 80 پايىزى قۋراپ قالعان. سەناتورلار ماسەلەنى سالالىق مەملەكەتتىك ورگاندارعا جەتكىزۋگە ۋادە بەردى.

نۇرلان بەكنازاروۆ, ايگۇل قاپباروۆا, مۇرات قادىربەك شىمكەنت قالاسىندا مۇحتار اۋەزوۆ اتىنداعى وڭتۇستىك قازاق­ستان ۋنيۆەرسيتەتىنىڭ ستۋدەنت­تەرىمەن جانە پروفەسسور-وقىتۋ­شىلار قۇرامىمەن كەزدەستى.

«سەنات الداعى ۋاقىتتا دا جاستاردىڭ مۇددەسىنە, زاڭ­نامالىق بازانى جەتىلدىرۋگە جانە قازىرگى زامانعى قۇقىقتىق مەملەكەتتى قالىپتاستىرۋعا ۇلەس قوسا بەرمەك», دەدى ن.بەك­نا­زاروۆ.

سونىمەن قاتار ن.بەكنازاروۆ پەن ا.قاپباروۆا شىمكەنت قالاسى بويىنشا سوت ساراپتاماسى ينستيتۋتىندا بولدى. سەناتورلار قىزمەتكەرلەردىڭ ەڭبەك جاعدايىن, كادر ساياساتىن جانە تەحنيكالىق جاراقتاندىرۋ ماسەلەلەرىن تالقىلادى.

سەناتور ولگا بۋلاۆكينا وسكەمەندە قالا تۇرعىندارىمەن كەزدەسىپ: «ازاماتتاردىڭ جاقسى ءومىر ءسۇرۋى جايلى قالادان باس­تالادى. حالىقپەن كەزدەسۋلەر وتكىزۋ جەرگىلىكتى جەرلەردە اسا وتكىر پروبلەمالاردى جەدەل تۇردە انىقتاۋعا جانە جۇيەلەۋگە مۇمكىندىك بەرەدى. ءاربىر ءوتىنىش بويىنشا ءتيىستى مەملەكەتتىك ورگاندارمەن قاجەتتى جۇمىس جۇرگىزىلىپ, پىسىقتالادى. ونىڭ ىشىندە پارلامەنت ارالاسۋىن تالاپ ەتەتىن ماسەلەلەردە دە بار», دەپ اتاپ ءوتتى.