ءوڭىر حالقىمەن كەزدەسىپ, الەۋمەتتىك نىسانداردى ارالاعان سەناتورلار اسكەري سالاعا دا زەر سالدى.
سەناتور امانگەلدى نۇعمانوۆ اقتوبە وبلىسىنىڭ اكىمى اسحات شاحاروۆپەن كەزدەسۋدە پرەزيدەنت تاپسىرمالارىن ىسكە اسىرۋ, اۋماقتاردى الەۋمەتتىك-ەكونوميكالىق دامىتۋ, حالىقتىڭ ءومىر ءسۇرۋ ساپاسىن جاقسارتۋ ماسەلەلەرىن تالقىلادى.
سونداي-اق ول جەرگىلىكتى بيلىك وكىلدەرىمەن تالعات بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتىندا بولىپ, كۋرسانتتاردىڭ وقۋ ۇدەرىسىمەن, پاتريوتتىق جانە اسكەري ءبىلىم بەرۋ تاربيەسىمەن تانىستى. دەپۋتات ينستيتۋتتى قولداۋ قاجەتتىگىن ايتىپ, اسكەري ءبىلىمدى دامىتۋ جونىندەگى ۇسىنىستار پارلامەنت پەن سالالىق ورگانداردا پىسىقتالاتىنىن اتاپ ءوتتى.
«تالعات بيگەلدينوۆ اتىنداعى اسكەري ينستيتۋت قارۋلى كۇشتەرگە جوعارى بىلىكتى وفيتسەرلەردى دايارلايدى. وقۋ ورنى ساپالى اسكەري جانە اكادەميالىق دايىندىقتى قامتاماسىز ەتىپ قانا قويماي, كۋرسانتتاردىڭ بويىندا پاتريوتتىق رۋحتى, ازاماتتىق جاۋاپكەرشىلىك پەن وتانعا دەگەن ادالدىقتى قالىپتاستىرۋعا ايانباي اتسالىسىپ كەلەدى. ينستيتۋت قازىر ەلىمىزدەگى جەتەكشى اسكەري ءبىلىم ورتالىقتارىنىڭ بىرىنە اينالىپ وتىر», دەدى ا.نۇعمانوۆ.
سەناتور «جايلى مەكتەپ» جوباسى بويىنشا مارتوك اۋدانىنداعى سارىجار اۋىلىندا سالىنىپ جاتقان جاڭا مەكتەپ قۇرىلىسىمەن دە تانىستى. ول قۇرىلىستى ۋاقتىلى اياقتاۋ, ونىڭ قاۋىپسىزدىگى مەن ءبىلىم بەرۋ ورتاسىنىڭ زاماناۋي تالاپتارعا سايكەس كەلۋىن ەسكە سالدى.
ال سەنات دەپۋتاتتارى ءالي بەكتاەۆ, مۇرات قادىربەك جانە اليشەر ساتۆالديەۆ تۇركىستان وبلىسىنىڭ حالقىمەن جۇزدەسىپ, وندىرىستىك جانە الەۋمەتتىك بىرقاتار نىسانداردى ارالادى. ولار سونداي-اق جەرگىلىكتى بيلىك پەن بيزنەس وكىلدەرىمەن بىرقاتار ماسەلەنى تالقىلادى.
سەناتورلار سوزاق اۋدانىنا ساپار بارىسىندا 200 ورىندىق جاڭا سپورتتىق-ساۋىقتىرۋ كەشەنىنىڭ قۇرىلىسىمەن تانىستى. ولار مەردىگەر مەكەمە وكىلدەرىنە جۇمىستىڭ قارقىنى مەن ساپاسىن, قۇرىلىس نورمالارىن ساقتاۋ قاجەتتىگىن ايتتى. اسىرەسە ۋران وندىرۋمەن اينالىساتىن «قازاتومونەركاسىپ-ساۋران» كاسىپورنىنىڭ قىزمەتىنە ەرەكشە نازار اۋدارىلدى. جۇمىسشىلارمەن جانە جەرگىلىكتى تۇرعىندارمەن كەزدەسۋ بارىسىندا ءوندىرىس قاۋىپسىزدىگى, ەكولوگيا جانە حالىقتىڭ دەنساۋلىعىنا اسەرى تۋرالى ماسەلەلەر كوتەرىلدى. تۇرعىندار وندىرىستىك نىساندارعا جاقىن ورنالاسقان ەلدى مەكەندەردە, اسىرەسە بالالار اراسىندا اۋرۋدىڭ كوبەيىپ بارا جاتقانىنا الاڭداۋشىلىق ءبىلدىردى. سەناتورلار VIII سايلانعان پارلامەنتتىڭ III سەسسياسىندا قابىلدانعان سۋ, بيۋدجەت جانە سالىق كودەكستەرىنىڭ جاڭا نۇسقالارى تۋرالى ايتىپ, ونەركاسىپ جۇكتەمەسىنەن زارداپ شەككەن وڭىرلەردى قولداۋعا كەشەندى ءىس-قيمىل قاجەت ەكەنىن ايتتى.
قازىعۇرت اۋدانىنىڭ ەگىستىگىندە بولعان سەناتورلار اگرارشىلارمەن ونىمدىلىكتى ارتتىرۋ, سۋبسيديا جانە تەحنيكامەن قامتاماسىز ەتۋ ماسەلەلەرىن تالقىلادى. سونىمەن قاتار دەپۋتاتتار تۇلكىباس اۋدانىندا جىلىنا 800 تونناعا دەيىن ءونىم وندىرە الاتىن «First fish company» بالىق ءوسىرۋ كاسىپورنىنىڭ, سونداي-اق جىل سايىن 30 مىڭ تونناعا دەيىن ءسۇت وڭدەيتىن «مايلىكەنت ءسۇت» كووپەراتيۆىنىڭ جۇمىسىمەن تانىستى. كووپەراتيۆ الداعى جوسپارى بويىنشا 4 مىڭ باسقا ارنالعان جاڭا ءسۇت فەرماسىن ىسكە قوسۋدى جوسپارلاپ وتىر.
بۇعان قوسا ولار «اقسۋ-جاباعىلى» ساۋىقتىرۋ-وڭالتۋ ورتالىعىن كەڭەيتۋ جوباسىمەن دە تانىستى. وندا 250 ادامعا ارنالعان جاڭا عيمارات سالىنىپ, 200 جۇمىس ورنى اشىلماق.
سەناتورلار سايرام اۋدانىندا ورنالاسقان بىرقاتار كاسىپورىندى دا كورىپ شىقتى. ەڭبەك ۇجىمدارىمەن كەزدەسۋدە ورتا جانە جوعارى ءبىلىم بەرۋ, جول ينفراقۇرىلىمىنىڭ جاي-كۇيى, دەنساۋلىق ساقتاۋ, اۋىل شارۋاشىلىعى جانە اۋىزسۋمەن قامتاماسىز ەتۋ ماسەلەلەرى تالقىلاندى.