ءوڭىر حالقىمەن كەزدەسىپ, الەۋمەتتىك نىسانداردى ارالاعان سەناتورلار اۋىل-ايماقتىڭ تۇراقتى دامۋىنا كەشەندى ءتاسىل قاجەت ەكەنىن العا تارتتى.
سەناتورلار سۇيىندىك الداشەۆ پەن بەكبول ورىنباساروۆ ماڭعىستاۋ وبلىسىنداعى جاڭاوزەن قالاسى مەن تۇپقاراعان اۋدانىندا بولىپ, وڭىرلەردەگى الەۋمەتتىك, ينجەنەرلىك جانە وندىرىستىك ينفراقۇرىلىمنىڭ قازىرگى جاي-كۇيىمەن تانىستى. ولار ENI جانە «قازمۇنايگاز» كومپانيالارىنىڭ بىرلەسكەن جوباسى – قۋاتى 247 مۆت گيبريدتى ەلەكتر ستانساسىنىڭ قۇرىلىسىن كوردى. بۇل جوبا «وزەنمۇنايگاز» اق مەن جاڭا گاز وڭدەۋ زاۋىتىن تۇراقتى ەنەرگيامەن قامتاماسىز ەتەدى. دەپۋتاتتار سونىمەن قاتار «Tenge Oil & Gas» جشس-ءنىڭ وندىرىستىك الاڭدارىندا بولىپ, گازدى قايتا وڭدەۋدى ارتتىرۋ جوسپارىمەن تانىستى.
سونداي-اق سەناتورلار تۇپقاراعان اۋدانىندا سۋمەن قامتۋ, سپورت جانە ءبىلىم بەرۋ نىساندارىن ارالادى. ولار قىزىلوزەن اۋىلىندا اۋىل تۇرعىندارىن اۋىزسۋمەن قامتاماسىز ەتىپ وتىرعان سۋ تارتۋ تورابىنىڭ جۇمىسىن كوردى. فورت-شەۆچەنكو قالاسىندا تاۋلىگىنە 5 مىڭ تەكشە مەتر تەڭىز سۋىن تۇششىتاتىن جاڭا ستانسا جۇمىس ىستەيدى. قۇرىلىسى اياقتالعان بۇل نىسان باۋتين جانە اتاش ەلدىمەكەندەرىن سۋمەن قامتاماسىز ەتەدى.
ال دەپۋتات التىنبەك نۇح ۇلى پاۆلودار قالاسىندا كىتاپحانا سالاسى مەن ءوڭىردىڭ يندۋستريالىق الەۋەتىن دامىتۋ ماسەلەلەرىنە ارنالعان بىرقاتار كەزدەسۋ وتكىزدى. ول كىتاپحاناشىلاردى الەۋمەتتىك قولداۋ, جالاقىنى كوتەرۋ جانە «كىتاپحانا ءىسى تۋرالى» زاڭدى ازىرلەۋ جونىندەگى ۇسىنىستار تۋرالى ايتتى.
«كىتاپحانا – تەك كىتاپ ساقتالاتىن مەكەمە ەمەس. بۇل ۇلتتىڭ ويىن قالىپتاستىراتىن رۋحاني جانە ينتەللەكتۋالدى دامۋ ورتالىقتارى. مىقتى كىتاپحانا جۇيەسى بولمايىنشا ساپالى ءبىلىم, مادەني ساباقتاستىق جانە سانالى جاستاردى تاربيەلەۋ تۋرالى ايتۋ مۇمكىن ەمەس. ءبىز كىتاپحاناشىلارعا, ونىڭ ىشىندە زاڭنامالىق تەتىكتەر مەن الەۋمەتتىك قولداۋ ارقىلى لايىقتى جاعداي جاساۋعا مىندەتتىمىز», دەپ اتاپ ءوتتى سەناتور.
دەپۋتات كىتاپحانا قورىن قولداۋ رەتىندە مەكەمەگە 20 كىتابىن تاپسىردى, سونداي-اق قانىش ساتباەۆتىڭ بۇرىن سىيعا تارتىلعان 10 تومدىق ەڭبەگىن تسيفرلاندىرۋ جانە ەلەكتروندىق نۇسقاسىن كىتاپحاناعا بەرۋ تۋرالى مەموراندۋم جاساسۋ قاجەتتىگىن ايتتى.
سەناتتىڭ الەۋمەتتىك-مادەني دامۋ جانە عىلىم كوميتەتىنىڭ توراعاسى نۇرتورە ءجۇسىپ عۇماربەك داۋكەەۆ اتىنداعى الماتى ەنەرگەتيكا جانە بايلانىس ۋنيۆەرسيتەتىندە بولدى. ول ەنەرگەتيكا جانە بايلانىس سالاسىنىڭ بولاشاق ماماندارىنا ديپلوم تابىستاۋ راسىمىنە قاتىستى.
نۇرتورە ءجۇسىپ تۇلەكتەر الدىندا سويلەگەن سوزىندە ەنەرگەتيكا جانە تەلەكوممۋنيكاتسيا بۇكىل ەكونوميكانىڭ جۇمىسىن قامتاماسىز ەتەتىن بازالىق سالانىڭ ءبىرى ەكەنىن اتاپ ءوتتى. جەدەلدەتىلگەن تسيفرلاندىرۋ, «جاسىل» ەنەرگەتيكانى دامىتۋ, سمارت-تەحنولوگيانى ەنگىزۋ جانە ەنەرگەتيكاعا قاجەتتىلىك وسكەن جاعدايدا ەلىمىزگە تەحنيكالىق ساۋاتتى, يننوۆاتسيالىق تۇرعىدا ويلايتىن, قازىرگى زاماننىڭ قاۋىپ-قاتەرىنە بەيىمدەلگەن ومىرلىك ماڭىزى بار جاڭا بۋىن ينجەنەرلەرى قاجەت.
ء«اربىر تۇلەك – بولاشاق «اقىلدى» جەلىنى ازىرلەۋشى, جاڭارتىلاتىن ەنەرگيا كوزىنە نەگىزدەلگەن جۇيەلەردى جوبالاۋشى, ستراتەگيالىق ماڭىزدى ينفراقۇرىلىمنىڭ كيبەرقاۋىپسىزدىگى بويىنشا ساراپشى. ولاردىڭ ءبىلىمى مەن داعدىسى ونەركاسىپتى دامىتۋدىڭ, ەكونوميكانى تسيفرلاندىرۋدىڭ, ەنەرگيانىڭ تيىمدىلىگى مەن تۇراقتىلىعىن ارتتىرۋدىڭ قوزعاۋشى كۇشىنە اينالادى. اەجبۋ شالعاي جانە ستراتەگيالىق ماڭىزى بار وڭىرلەردى دامىتۋدى قولداپ كەلەدى, نەگىزگى مەملەكەتتىك باستامالاردى ىسكە اسىرۋ ءۇشىن كاسىبي كادرلاردى قالىپتاستىرادى», دەدى سەناتور.
سەناتور ولگا بۋلاۆكينا شىعىس قازاقستان وبلىستىق ءماسليحاتىنىڭ كەزەكتى 22-وتىرىسىنا قاتىستى. وندا ءسوز سويلەگەن دەپۋتات سەنات دەپۋتاتتارى مەن جەرگىلىكتى ءماسليحات وكىلدەرىنىڭ ءتيىمدى ءوزارا ءىس-قيمىلىنىڭ ماڭىزدىلىعىنا توقتالدى. ونىڭ ايتۋىنشا, بۇل ورتالىق پەن وڭىرلەر اراسىنداعى بايلانىستى نىعايتۋعا, اۋماقتاردىڭ تۇراقتى جانە تەڭگەرىمدى دامۋىن قامتاماسىز ەتۋگە مۇمكىندىك بەرەتىن ءتۇرلى دەڭگەيدەگى باسقارۋ ورگاندارىنىڭ ۇيلەسىمدى جۇمىسى.
«تۇراقتى ديالوگسىز جانە حالىقپەن كەرى بايلانىسسىز كۇشتى وكىلدى بيلىك مۇمكىن ەمەس. سەنات باسقالارمەن قاتار, جەرگىلىكتى جەرلەردەن تۇسكەن وتىنىشتەر نەگىزىندە قالىپتاساتىن زاڭ شىعارۋ باستامالارىمەن بەلسەندى جۇمىس ىستەپ جاتىر», دەدى و.بۋلاۆكينا.