سەنات دەپۋتاتتارىنىڭ وڭىرلەرگە ساپارى جالعاسىپ جاتىر. اۋىل-ايماق حالقىمەن كەزدەسىپ, الەۋمەتتىك نىسانداردى ارالاعان سەناتورلار وڭىرلەردىڭ باستى ماسەلەلەرىمەن تانىستى.
سەناتور سەرىك وتەشوۆ قاراعاندى وبلىسىندا جەرگىلىكتى ءوزىن-ءوزى باسقارۋدى دامىتۋ جانە اۋىل مەديتسيناسىن جاڭعىرتۋ ماسەلەلەرىنە ارنالعان بىرقاتار كەزدەسۋ وتكىزدى. وڭىردەگى اۋداندىق اۋرۋحانالاردىڭ باس دارىگەرلەرىمەن كەزدەسكەن دەپۋتات اۋىلدىق دەنساۋلىق ساقتاۋدى جاڭعىرتۋ جونىندەگى ۇلتتىق جوبانىڭ ورىندالۋ بارىسىن تالقىلادى. وڭىرگە ينفراقۇرىلىمدى جاڭارتۋ, فەلدشەرلىك-اكۋشەرلىك پۋنكتتەر جانە فاپ كەزىندە ءدارىحانا پۋنكتتەرىن قۇرۋ قاجەت. وعان قوسا مامان تاپشى, دارىگەرلەرگە باسپانا جەتىسپەيدى.
ال سەناتورلار سۇلتانبەك ماكەجانوۆ پەن نۇرتورە ءجۇسىپ جاڭادان سالىنىپ جاتقان «اباي يننوۆاتسيالىق مەكتەبىنىڭ» قۇرىلىسىمەن تانىستى. ولار قۇرىلىس الاڭىندا جەرگىلىكتى اتقارۋشى ورگان مەن مەردىگەر ۇيىم وكىلدەرىمەن جوبانى ىسكە اسىرۋ بارىسى مەن الداعى جۇمىس كەزەڭدەرىن تالقىلادى. ن.ءجۇسىپتىڭ ايتۋىنشا, ەڭ باستىسى مەكتەپ سالۋ ەمەس, بولاشاققا بەرىك نەگىز قالاپ, ەلىمىزدىڭ زياتكەرلىك الەۋەتى دامي تۇسەتىن كەڭىستىك قۇرۋ بولىپ وتىر.
سەناتور جاننا اسانوۆا دا الماتىدا مەديتسينالىق مەكەمەلەر, بيزنەس-قوعامداستىق جانە جۇرتشىلىقپەن بىرقاتار كەزدەسۋ وتكىزدى. ول الەۋمەتتىك قورعاۋ, ينكليۋزيۆتى قوعام جانە حالىقتىڭ جاپپاي نەسيە الۋىن ازايتۋ, ەكولوگيا, ۋربانيستيكا ماسەلەلەرىنە توقتالدى.
ولگا پەرەپەچينا مەن اسەم راحمەتوۆا قوستانايعا ساپارلادى. دەپۋتاتتار وبلىس اكىمى عاۋەز نۇرمۇحامبەتوۆپەن كەزدەسىپ, ينۆەستيتسيالىق جوبالاردى ىسكە اسىرۋ ماسەلەلەرىن, حالىقتى الەۋمەتتىك قولداۋ شارالارىن تالقىلادى. سونداي-اق ولار اققايىڭ اۋدانىندا بولىپ, لەنينسكوە اۋىلىنداعى ەلدى مەكەن ىشىندەگى جولداردى جوندەۋ بارىسىمەن تانىستى, سونداي-اق «وقجەتپەس» بالالار جازعى لاگەرىن كوردى.
جانبولات جورگەنباەۆ پەن زاكيرجان كۋزيەۆ سۋ رەسۋرستارى جانە يرريگاتسيا ءمينيسترىنىڭ ورىنباسارى ەربولات يبرايحانوۆپەن بىرگە جەتىسۋ وبلىسىنا اتتانىپ, پانفيلوۆ اۋدانىندا سۋ شارۋاشىلىعى سالاسىنداعى ينفراقۇرىلىمدىق جوبالاردى ىسكە اسىرۋ بارىسىمەن تانىستى. وندا جاڭا ءۇش سۋ قويماسىنىڭ قۇرىلىسى جوسپارلانىپ وتىر. قازىر وسى نىساندار بويىنشا مەملەكەتتىك ساراپتامادان وتەتىن تەحنيكالىق-ەكونوميكالىق نەگىزدەمەلەر ازىرلەنىپ جاتىر. ج.جورگەنباەۆتىڭ ايتۋىنشا, وسى سۋ قويمالارى پايدالانۋعا بەرىلگەندە, پانفيلوۆ اۋدانىنىڭ 42,6 مىڭ گەكتار جەرىن تۇراقتى سۋمەن قامتاماسىز ەتۋگە مۇمكىندىگى بار.
سونىمەن قاتار دەپۋتاتتار ءالي بەكتاەۆ پەن مۇرات قادىربەك سارىاعاش اۋدانىنىڭ تۇرعىندارىمەن كەزدەستى. وندا شاعىن جانە ورتا بيزنەستى دامىتۋ, قالدىقتاردى قايتا وڭدەۋ جانە اگروونەركاسىپ سەكتورىنىڭ ماسەلەلەرى ءسوز بولدى. سەناتورلار پوليەتيلەن قالدىقتارىن قايتا وڭدەۋمەن جانە پلاستيك ىدىستاردى شىعارۋمەن اينالىساتىن «Amantayplast» كومپانياسىنىڭ جۇمىسىمەن دە تانىستى. كاسىپورىندا تاۋلىگىنە 4 تونناعا دەيىن قالدىق وڭدەلەدى, ولاردان 10 مىڭ قوراپ جاسالادى.
دەپۋتاتتار سونداي-اق 2015 جىلدان باستاپ زاماناۋي اگروتەحنولوگيانى پايدالانا وتىرىپ, 1,4 گەكتارعا كوكونىس ءوسىرىلىپ جاتقان جىلىجاي كەشەنىندە بولدى. ولار كاسىپكەرلەرمەن جانە اۋىل شارۋاشىلىعى ونىمدەرىن وندىرۋشىلەرمەن كەزدەسۋدە جەرگىلىكتى جەرلەردە بيزنەس جۇرگىزۋ كەزىندە تۋىندايتىن وزەكتى ماسەلەلەرگە قانىقتى.
دەپۋتاتتار وڭىرلەردە قوردالانعان ماسەلەلەر باقىلاۋعا الىنىپ, پارلامەنتتە تالقىلاناتىنىنا ۋادە بەردى.