جاساندى ينتەللەكتكە نەگىزدەلگەن وتاندىق RE:CREATE AI جوباسى قىسقا مەرزىم ىشىندە قارقىندى دامىپ, Activate VC جانە Jas Ventures قورلارىنان 150 000 دوللار ينۆەستيتسيا تارتۋعا قول جەتكىزدى. بۇل – Astana Hub باستاماسىمەن وتكەن AI’preneurs اكسەلەراتور باعدارلاماسىنىڭ ناتيجەلى تۇلەكتەرىنىڭ ءبىرى, دەپ جازادى Egemen.kz.
ايتا كەتەيىك, AI’preneurs — قازاقستاندا جاساندى ينتەللەكت سالاسىنداعى ستارتاپتارعا ارنالعان العاشقى اكسەلەراتورلاردىڭ ءبىرى. Astana Hub بۇل باعدارلامانى ەلىمىزدەگى جي تەحنولوگيالارى مەن يننوۆاتسيالىق ەكوجۇيەنى دامىتۋ ماقساتىندا ىسكە قوسقان. باعدارلاما ارقىلى جاساندى ينتەللەكتكە نەگىزدەلگەن ونىمدەر جاساپ جاتقان كاسىپكەرلەرگە قولداۋ كورسەتىلىپ, ولاردى نارىققا شىعارۋ جانە ماسشتابتاۋ جولدارى ۇيرەتىلەدى.
RE:CREATE AI — Instagram, TikTok, YouTube سەكىلدى تانىمال پلاتفورمالار ءۇشىن ترەندتەگى كونتەنت يدەيالارىن, ستسەناريلەردى جانە بەيىمدەلگەن نۇسقالاردى ۇسىناتىن يننوۆاتسيالىق سەرۆيس. بۇل قۇرال اسىرەسە بلوگەرلەر, كونتەنت-مەيكەرلەر, شاعىن بيزنەس يەلەرى ءۇشىن پايدالى. قولدانۋشى جۇيەگە ءوز باعىتى بويىنشا سۇرانىس جىبەرەدى, ال سەرۆيس وعان تانىمال ءارى كوپ قارالىم جيناعان يدەيالاردىڭ نەگىزىندە ۇسىنىستار بەرەدى. وسىلايشا, ۋاقىت پەن كۇش ۇنەمدەلىپ, ساپالى ناتيجە الۋعا مۇمكىندىك تۋادى.
باستاپقىدا بۇل جوبا بەينەجازبا ستسەناريلەرىن اۆتوماتتى تۇردە ءبولىپ الىپ, قايتا قولدانۋعا بەيىمدەيتىن قۇرال رەتىندە ويلاستىرىلعان بولاتىن. الايدا العاشقى پايدالانۋشىلار دايىن يدەيالاردىڭ وزەكتىلىگىن العا تارتىپ, كوماندا باعىتتى وزگەرتەدى. ناتيجەسىندە جوبا كونتەنتتىك ترەندتەرگە ساراپتاما جاسايتىن ىزدەۋ پلاتفورماسىنا اينالدى.
AI’preneurs باعدارلاماسىنا قاتىسۋ جوبا دامۋىنا ۇلكەن سەرپىن بەردى. باعدارلاما باستالعان كەزدە RE:CREATE AI-ءدىڭ تەك MVP (ەڭ قاراپايىم جۇمىس ىستەيتىن ۇلگىسى) نۇسقاسى عانا بار بولاتىن. جوبانىڭ نەگىزىن قالاۋشى زاكىرجان ايساباەۆ بۇل جۇيەنى العاشىندا ءوزىنىڭ الەۋمەتتىك جەلىدەگى بلوگىن دامىتۋ ءۇشىن پايدالانىپ كورگەن. اكسەلەراتسيا بارىسىندا كوماندا ونداعان قولدانۋشىمەن سۇحبات جۇرگىزىپ, اقش-تا زاڭدى تىركەۋدەن ءوتىپ, العاشقى اقىلى جازىلىمدارىن سىناپ, post-MVP كەزەڭىنە ءوتتى. جوبانىڭ قولدانۋشىلار سانى وسى كەزەڭدە 10 000-نان استى.
«باعدارلاماعا دەيىن مەن تەك كود جازۋعا ءمان بەرەتىنمىن. ال قازىر ءونىمدى ناقتى تۇتىنۋشى ءۇشىن جاساپ جاتىرمىن. AI’preneurs ماعان ساتۋ جولىن, بيزنەس-مودەل جاساۋدى جانە قيىندىقتارمەن كۇرەسۋدى ۇيرەتتى. مەن وسى كۇنى ينۆەستور تارتا الاتىن ستارتاپ يەسىنە اينالدىم. ارينە, شارشاعان, كۇيزەلگەن ساتتەر بولدى. بىراق سول كەزدەردە ءونىمنىڭ تەحنيكالىق جاعى ەمەس, قۇندىلىعى ماڭىزدى ەكەنىن ءتۇسىندىم. ال العاشقى جىلدىق جازىلىم ساتىلعاندا, ءوز جولىمىزدىڭ دۇرىس ەكەنىن ۇقتىم», دەيدى زاكىرجان ايساباەۆ.
باعدارلاما سوڭىندا جوبا Activate VC ۇيىمداستىرعان Clash of Startups سايىسىندا ءۇشىنشى ورىنعا يە بولدى. بۇل جەڭىس ينۆەستورلاردىڭ نازارىن اۋداردى. ەكى اي ىشىندە 10 000-نان استام قولدانۋشى تىركەلگەندە, قورلار ستارتاپقا قارجى قۇيۋ تۋرالى شەشىم قابىلدايدى.
تارتىلعان قاراجات ەندى ءونىمدى ازىرلەۋ كومانداسىن كەڭەيتۋگە, ءموبيلدى قوسىمشا جاساۋعا, AI الگوريتمدەرىن جەتىلدىرۋگە جانە ماركەتينگتى اۋقىمدى دەڭگەيگە شىعارۋ ءۇشىن جۇمسالماق.