ساقتاعان بايىشەۆ اتىنداعى وبلىستىق امبەباپ-عىلىمي كىتاپحانادا «حانسۇلتان توعىس ۇلى ءسۇيىنشالين» اتتى جيناقتىڭ تانىستىرىلىمى ءوتتى. ول 1920–1935 جىلدارى اقتوبە, ريددەر, قارساقپاي, قوستانايدا جاستار ۇيىمدارىن قۇرۋعا بەلسەنە قاتىسقان, 1937 جىلدىڭ جەلتوقسانىنان 1938 جىلدىڭ ماۋسىمىنا دەيىن حالىق اعارتۋ كوميسسارى قىزمەتىن اتقارىپ, «حالىق جاۋى» رەتىندە سوتتالعان.
كىتاپ اۆتورلارى – ەركىن باقتياروۆ پەن مۇساعالي تاسقاليەۆ تاريحي تۇلعانىڭ قىزمەتىنە وسى كۇنگە دەيىن جەتكىلىكتى باعا بەرىلمەگەنىن اتاپ ءوتتى. حانسۇلتان كوميسسار تۋرالى جازۋشى, پۋبليتسيست بەيبىت قويشىباەۆ 2017 جىلى ماقالا جاريالادى. ودان باسقا دەرەك جوق. ءسۇيىنشالين ەسىمى قازاق كەڭەستىك اعارتۋ سالاسىن باسقارعاندار تۋرالى جيناققا دا ەنبەي قالدى. ەسكەرەرلىك جايت, 2023 جىلى الماتى قالاسىنداعى بۇرىنعى فۋرمانوۆ كوشەسىندەگى ءسۇيىنشالين تۇرعان ۇيگە ەسكەرتكىش تاقتا قويىلدى. «تەمىربەك جۇرگەنوۆ 1933 جىلدىڭ ماۋسىمىنان 1937 جىلدىڭ شىلدەسىنە دەيىن قازاقستاننىڭ حالىق اعارتۋ كوميسسارى بولدى. ول ۇستالعان كەزدە ورنىنا ءبىرجان مانكين تاعايىندالىپ, بەس اي عانا باسقاردى. سول جىلدىڭ جەلتوقسانىندا حانسۇلتان ءسۇيىنشالين وقۋ كوميسسارى بولىپ بەكىتىلدى», دەيدى اقتوبە وبلىستىق مەملەكەتتىك ءارحيۆىنىڭ عىلىمي قىزمەتكەرى ەركىن باقتياروۆ.
حانسۇلتان 1905 جىلى ىرعىز بولىسىنىڭ اقتوعاي دەگەن جەرىندە ومىرگە كەلگەن. جەتى جاسىندا اناسى ومىردەن وتكەندە, اكەسى ءسۇيىنشالى شالقارعا كوشىپ كەلەدى. مۇندا ءۇش جىل مەدرەسەدە, ودان سوڭ ەكى باسقىشتىق ورىس مەكتەبىندە وقيدى. 1918 جىلى اكەسى ومىردەن وتكەندە, حانسۇلتان 13 جاستا ەكەن. 1924–1925 جىلدارى اقتوبەدە كەڭەستىك پارتيا مەكتەبىنىڭ تىڭداۋشىسى, كوممۋنيستىك پارتيا مۇشەسى, ودان كەيىن شالقار ۋەزدىك كومسومول ۇيىمىن باسقارادى. 1926–1927 جىلدارى قارساقپاي ۋەزدىك كومسومول ۇيىمىنىڭ حاتشىسى, 1928 جىلدان قوستانايدا وكرۋگتىك كومسومول كوميتەتىندە, الماتىدا جۇمىس ىستەيدى. وقۋ كوميسسارى 1938 جىلدىڭ تامىزىندا تۇتقىندالىپ, الماتى تۇرمەسىنە قامالىپ, 1940 جىلدىڭ 11 ماۋسىمىندا بەس جىلعا سوتتالادى. جازاسىن ماگادانداعى ەڭبەكپەن تۇزەۋ لاگەرىندە وتەيدى. «حانسۇلتاندى ۇستاپ كەتكەندە, ايەلى قاتيرا ەكى جاستاعى ۇلى بولاتتى الىپ قىرعىز جەرىنە كەتىپ, ەلگە 1942 جىلى قايتا ورالادى. وعان ەرىنىڭ اقتالعانى جونىندە حابار 1955 جىلى جەتىپ, كەلەسى جىلى حانسۇلتاننىڭ ماگادان وبلىسى سۋسامان كەنتىندە 1941 جىلى 3 قاڭتاردا جۇرەك تالماسىنان قايتىس بولعانى تۋرالى انىقتاما بەرىلگەن», دەيدى ە.باقتياروۆ. ساراڭ ومىرباياندىق دەرەكتەردىڭ ارعى جاعىندا كەڭەس وكىمەتىنىڭ العاشقى جىلدارىندا حالىقتى ساۋاتتاندىرۋ ىسىنە زور ۇلەس قوسقان تۇلعانىڭ ۇمىتىلعان ەڭبەگى تۇر.
بالاسى بولات حانسۇلتان ۇلىنىڭ جاسى 89-دا, سول اۋىلدا تۇرادى. ءوسىپ-ونگەن اۋلەت. كەزدەسۋدە تۇرگەننەن بولاتتىڭ بالاسى ءالجان مەن نەمەرەسى 24 جاستاعى حانسۇلتان ءالجان ۇلى حابارلاسىپ, شەيىت كەتكەن اتالارىنىڭ تۋعان جەرىنە بولات اقساقالدىڭ سالەمىن جەتكىزدى.
اقتوبە وبلىسى