مەملەكەتتىك قىزمەتكە الەۋەتى جوعارى جاستار قاجەت. اسىرەسە مەملەكەتتىك اپپاراتتىڭ بىرنەشە سالالىق كادرى كۇش-جىگەرى مەن ءبىلىمىن جۇمسايتىن قىزمەتكەرلەردىڭ جاڭا لەگىمەن تولىعۋعا ءتيىس. وسى ماقساتتا مەملەكەت باسشىسى پرەزيدەنتتىك جاستار كادر رەزەرۆىن (پجكر) جاساقتاۋدى تاپسىرعان ەدى. قازىر ولاردىڭ سانى جىل سايىن ارتىپ, بارلىعى دەرلىك ءتۇرلى قىزمەتكە ورنالاسقان.
رەزەرۆشىلەر 2019 جىلدان باستاپ ىرىكتەلە باستادى. سول جىلى 300 ادامدى بىردەن قابىلداپ, 2021 جىلى – 50, 2023 جىلى 50 جاس پرەزيدەنتتىك جاستار كادر رەزەرۆىنىڭ قاتارىنا قوسىلدى. ىرىكتەۋ ەكى جىل سايىن وتكىزىلەدى. بيىل دا 50 ادام قابىلدانادى.
جالپى, مەملەكەتتىك قىزمەت قول جەتپەيتىن سالاعا اينالماۋعا ءتيىس. ەل باسقارۋ ىسىنە وزىق ويلى, باستاماشىل ماماندار كەلۋى قاجەت. پرەزيدەنتتىڭ كوزدەگەنى – وسى. قازىر 400 رەزەرۆشىنىڭ 80 پايىزى قىزمەتكە ورنالاسقان. جاستار كادر رەزەرۆىنە قابىلداناتىن 35 جاسقا دەيىنگى ازاماتتار كەز كەلگەن ۋاقىتتا لاۋازىمدى قىزمەتكە تاعايىندالا الادى.
«قازاقستان – بالالار مەن جاستارعا جان-جاقتى قولداۋ كورسەتەتىن الەمدەگى از ەلدىڭ ءبىرى. پرەزيدەنتتىك جاستار كادر رەزەرۆى سۇرانىسقا يە جوباعا اينالدى. كەلەشەكتە مەملەكەتتى باسقارۋشىلاردىڭ نەگىزگى لەگى وسى جاس مامانداردان قالىپتاسادى. ساياسي رەفورمالار اياسىندا ءماجىلىس پەن ءماسليحاتتاردا جاستار ءۇشىن ارنايى كۆوتا ەنگىزىلدى. بۇل وكىلدىك بيلىك قىزمەتىنە تىڭ سەرپىن بەردى. وسى جەرگە جينالعان ءبىلىمپاز, وتانشىل جاستار ءماسليحاتتىڭ نەمەسە پارلامەنتتىڭ قۇرامىنا كىرەتىنىنە, ءتىپتى ۇكىمەتتە جۇمىس ىستەيتىنىنە كامىل سەنەمىن», دەگەن ەدى پرەزيدەنت قاسىم-جومارت توقاەۆ «جاڭا ادامدار» جاستار فورۋمىندا سويلەگەن سوزىندە.
پرەزيدەنتتىك جاستار كادر رەزەرۆىنىڭ بيىلعى كانديداتتارى التى سالالىق باعىت بويىنشا باق سىنايدى. مەملەكەتتىك قىزمەت ىستەرى اگەنتتىگىنىڭ مالىمەتىنە سايكەس, ىرىكتەۋ مەملەكەتتىك اپپاراتتىڭ سالالىق كادرلارعا قاجەتتىلىگىن ەسكەرە وتىرىپ, ينفراقۇرىلىم, ونەركاسىپ جانە ساۋدا ساياساتى, اگروونەركاسىپتىك كەشەن جانە قورشاعان ورتا, سىرتقى ساياسات جانە ينۆەستيتسيالار, ەكونوميكالىق جانە قارجىلىق ساياسات, تسيفرلاندىرۋ, الەۋمەتتىك ساياسات جانە ازاماتتىق قوعام سىندى نەگىزگى سالالار بويىنشا جۇرگىزىلەدى. كانديدات تىركەلۋ كەزىندە كورسەتىلگەن سالالىق باعىتتاردىڭ ءبىرىن تاڭداۋى قاجەت.
وسى جىلداعى ءتورتىنشى ىرىكتەۋدىڭ ەرەكشەلىگى دە وسى – ءار باعىت بويىنشا كانديداتتاردىڭ بىركەلكى سانىن قامتاماسىز ەتۋ ماقساتىندا ءاربىر كەزەڭدە پروپورتسيونالدى ىرىكتەۋ وتكىزىلمەك. ياعني رەزەرۆتىڭ ءار سالالىق باعىتى بويىنشا كۆوتالار قاراستىرىلىپ, ىرىكتەۋ سول سالالىق باعىت بويىنشا عانا جۇرگىزىلەدى.
ال كانديداتتارعا قويىلاتىن جالپى تالاپتاردا وزگەرىس جوق. بۇعان دەيىن وتكىزىلگەن ىرىكتەۋدىڭ تالاپتارى سەكىلدى كانديداتتاردىڭ جاسى 35-تەن اسپاۋى قاجەت, سونداي-اق جوعارى ءبىلىمدى, بەس جىلدان كەم ەمەس ەڭبەك ءوتىلى جانە قازاق ءتىلىن مەڭگەرۋى ۆ1 دەڭگەيىنەن تومەن بولماۋى كەرەك.
ىرىكتەۋگە پرەزيدەنت تاعايىنداعان ادامدار, ساياسي قىزمەتشىلەر, «ا» كورپۋسىنىڭ مەملەكەتتىك اكىمشىلىك قىزمەتشىلەرى جىبەرىلمەيدى.
نەگىزى پرەزيدەنتتىك جاستار كادر رەزەرۆىن قالىپتاستىرۋ تاسىلدەرى وتاندىق جانە شەتەلدىك وزىق تاجىريبەنى ەسكەرە وتىرىپ ازىرلەنگەن. ىرىكتەۋدىڭ بىرقاتار قۇرالدارى مەن تەحنولوگيالارى سينگاپۋر, اقش, ۇلىبريتانيا, كانادا سەكىلدى دامىعان ەلدەردە قولدانىلادى. سونداي-اق ىرىكتەۋدىڭ وتاندىق تاجىريبەسى بىرقاتار ەلدە تانىستىرىلىپ, شەتەلدىك ساراپشىلاردىڭ جوعارى باعاسىنا يە بولعان.