روزا باعلانوۆا اتىنداعى «قازاقكونتسەرت» مەملەكەتتىك اكادەميالىق كونتسەرتتىك ۇيىمى «GRAND FEST» مۋزىكالىق فەستيۆالى اياسىندا, امفيتەاتردا 22 ماۋسىمدا ساعات 20:00-دە «كلاسسيكالىق ونەر» ءبولىمىنىڭ سوليستەرى مەن قازاق مەملەكەتتىك سيمفونيالىق وركەسترىنىڭ قاتىسۋىمەن مۋزىكالىق كەش وتكىزەدى, دەپ حابارلايدى Egemen.kz.
كونتسەرتتىك باعدارلامادا الەمدىك جانە قازاق سيمفونيالىق, ۆوكالدىق جانە كامەرالىق مۋزىكا ۇلگىلەرى ۇسىنىلادى. كەش بارىسىندا قازاق وپەرالارىنان اريالار مەن دۋەتتەر, حالىق اندەرى, رومانستار, اسپاپتىق مينياتيۋرالار مەن وتان تاقىرىبىنداعى زاماناۋي شىعارمالار ورىندالادى.
سونداي-اق كەش بارىسىندا كورەرمەندەر ۇلتتىق سيمفونيالىق پوەمادان باستاپ نازىك ەۋروپالىق كلاسسيكاعا دەيىنگى مۋزىكالىق تۋىندىلاردى تىڭداي الادى.
«GRAND FEST» فەستيۆالى – ەلوردانىڭ مادەني ومىرىندەگى ماڭىزدى وقيعاعا اينالۋدى ماقسات تۇتقان, وتاندىق مۋزىكالىق ونەردى ناسيحاتتاۋعا جانە قالا تۇرعىندارىنىڭ مادەني تىنىس-تىرشىلىگىن بايىتۋعا باعىتتالعان جوبالاردىڭ ءبىرى. اشىق اسپان استىنداعى امفيتەاتر ساحناسى, جاندى مۋزىكا جانە جانرلىق ارتۇرلىلىك – بارلىعى دا ءتۇرلى بۋىن وكىلدەرىن ونەر اينالاسىنا توپتاستىراتىن جىلى ءارى شابىت سىيلايتىن اتموسفەرانى قالىپتاستىرادى.