بۇگىن استانادا وتكەن بريفينگتە «سامۇرىق-قازىنا» ۇلتتىق ءال-اۋقات قورىنىڭ باسقارما توراعاسى نۇرلان جاقىپوۆ قور قىزمەتىنىڭ ارالىق قورىتىندىلارىن بايانداپ, ىسكە اسىرىلىپ جاتقان ينۆەستيتسيالىق جوبالار تۋرالى ەسەپ بەردى, دەپ جازادى Egemen.kz.
«2023 جىلدان بۇگىنگە دەيىن 2,2 ترلن تەڭگە بولاتىن بارلىق سالالار بويىنشا 25 ءىرى جوبا جۇزەگە اسىرىلدى. بۇل – حالىق پەن ونەركاسىپتىك كاسىپورىنداردى گازبەن جانە ەنەرگيامەن قامتاماسىز ەتۋ, رەسۋرستىق بازانى ۇلعايتۋ, مۇناي وڭدەۋ, لوگيستيكالىق ينفراقۇرىلىم جانە باتىس ءوڭىرىنىڭ تۇرعىندارىن سۋمەن قامتاماسىز ەتۋ جوبالارى», دەدى «سامۇرىق-قازىنا» باسشىسى نۇرلان جاقىپوۆ.
نۇرلان جاقىپوۆ اتاعان ءىرى ينۆەستيتسيالىق جوبالار ىشىندە اتىراۋ جانە ماڭعىستاۋ وبلىستارىنداعى سۋ تاپشىلىعى مەن ونى تۇتىنۋدىڭ ارتۋىنا دايىن بولۋ ءۇشىن استراحان–ماڭعىشلاق سۋ قۇبىرى بار. سونداي-اق, كەندىرلى ەلدى مەكەنىندە سۋ تۇششىلاندىرۋ زاۋىتى سالىندى.
CASPI BITUM زاۋىتىنىڭ قۋاتى 1,5 ەسە ارتىپ, جىلىنا 750 مىڭ تونناعا جەتكەن. بۇل ىشكى نارىقتى جول بيتۋمىمەن قامتاماسىز ەتۋگە مۇمكىندىك بەرىپ وتىر.
قازاقستاننىڭ باتىس وڭىرلەرىن گازبەن تۇراقتى قامتاماسىز ەتۋ ماقساتىندا «سارشا» جانە «جىلى جاعاجاي» ەلدى مەكەندەرىن گازبەن قامتۋ جوباسى اياقتالىپ, «ماقات–سولتۇستىك كاۆكاز» ماگيسترالدى گاز قۇبىرىنىڭ قوسالقى قۇبىر جەلىسى مەن «بەينەۋ–جاڭاوزەن» قۇبىرىنىڭ ەكىنشى جەلىسى سالىنعان.
الماتىداعى جەو-2 مەن جەو-3 ستانتسيالارىن تابيعي گازعا كوشىرۋ ءۇشىن گاز ينفراقۇرىلىمى سالىنعان.
سيان قالاسىندا كولىك-لوگيستيكالىق تەرمينالى, اقتاۋ پورتىندا كونتەينەرلىك حاب جانە الماتىدا لوگيستيكالىق كەشەن ىسكە قوسىلعان. بۇل - ەۋرازيادا قازاقستاننىڭ سەنىمدى ترانزيتتىك حاب رەتىندەگى ماڭىزىن نىعايتتى.
«بوگاتىر» رازرەزىندە كومىر ءوندىرۋ, تاسىمالداۋ جانە تيەۋدىڭ تسيكلدى-اعىمدىق تەحنولوگياسىنا كوشۋ جوباسى اياقتالىپ, كەنىشتىڭ قۋاتى جىلىنا 32 ملن توننادان 40 ملن تونناعا دەيىن ارتقان.
ەكىباستۇز 1-ماەس ستانتسياسىنىڭ 1-ەنەرگەتيكالىق بلوگى قالپىنا كەلتىرىلدى. ستانتسيا سوڭعى 30 جىلدا العاش رەت سەگىز بلوكپەن (4 گۆت دەيىن) جۇمىس ىستەي باستادى.
قازاقستاننىڭ باتىس ايماعىنىڭ ەلەكتر جەلىسىن كۇشەيتۋ ماقساتىندا جاڭا ەلەكتر جەتكىزۋ جەلىلەرى ىسكە قوسىلعان.