ۇلتتىق مۋزەي قورى بىرقاتار جادىگەرمەن تولىقتى. ەرەكشە تاريحي جانە مادەني قۇندىلىقتاردى مۋزەيگە «قايتارىلعان اكتيۆتەردى باسقارۋ كومپانياسى» جشس تاپسىردى.
ساراپتامالىق قورىتىندىعا سايكەس بۇل جادىگەرلەر تەمىر ءداۋىرىنىڭ ەرتە كەزەڭى مەن ورتا عاسىرعا ب.ز.د. VII عاسىردان ب.ز. III عاسىرىنا دەيىنگى كەزەڭىنە جاتادى جانە ەجەلگى كوشپەلى حالىقتاردىڭ مادەنيەتىنە ءتان. اتاپ ايتقاندا, ساقتاردىڭ «اڭ ستيلىندە» جاسالعان. قولونەردىڭ بۇل ءتۇرى كوركەمدىك شەبەرلىكتىڭ جوعارى دەڭگەيىمەن ەرەكشەلەنەدى, سونىمەن قاتار سكيفتەردىڭ كورشى حالىقتار – گرەك, پارسى, قىتايلارمەن تىعىز مادەني بايلانىستا بولعانىن دالەلدەيدى.
ۇلتتىق مۋزەي قورىنا تاپسىرىلعان بۇيىمداردىڭ ىشىندە بۇركىتتىڭ باسى بەينەلەنگەن مەتالل بۇيىم, اراب جازۋى بار جۇزىك, ءمۇيىزدى اڭ بەينەلەنگەن (تاۋ ۇستىندە) تىك بۇرىشتى پلاستينا, قاناتتى ارىستان, پىراق (قاناتتى جىلقى), قارعىعان بارىس پەن بۇعىنىڭ مۇسىندەرى, 15 كونە تيىن, شيىرشىق تۇرىندەگى ەكى جۇزىك, ارىستاننىڭ باسى بەينەلەنگەن ساقينا جانە باسقا دا سيرەك زاتتار بار. جادىگەرلەردىڭ جالپى سالماعى 118 گرامنان اسادى. بۇيىمدار شەكىمە, بەدەرلەۋ جانە ناقىشتاۋ ادىستەرىمەن جاسالعان. ساراپشىلاردىڭ ايتۋىنشا, بۇل دالا مادەنيەتىنىڭ ستيليستيكالىق ەرەكشەلىكتەرى مەن گرەك, پارسى جانە شىعىس ونەرىنىڭ ىقپالىن كورسەتەدى.
«باس پروكۋراتۋرا جانىنداعى اكتيۆتەردى قايتارۋ كوميتەتى مەن قارجى مينيسترلىگىنىڭ مەملەكەتتىك م ۇلىك جانە جەكەشەلەندىرۋ كوميتەتىنىڭ ۇيلەسىمدى جۇمىسىنىڭ ناتيجەسىندە ۇلتتىق يگىلىك رەتىندە تانىلعان قۇندى زاتتار رەسمي تۇردە مەملەكەتتىك مەنشىككە بەرىلىپ, ۇلتتىق مۋزەي قورىنا تابىستالدى. بۇل – مەملەكەت باسشىسى اتاپ وتكەن ماڭىزدى قاعيداتتىڭ جارقىن دالەلى. ياعني ءاربىر قايتارىلعان اكتيۆ ەل يگىلىگىنە جۇمسالۋعا ءتيىس. بۇگىن ءبىز وسى قاعيداتتىڭ ناقتى جۇزەگە اسقانىنا كۋا بولدىق. بۇل اكتيۆ حالقىمىزدىڭ مادەني مۇراسىنىڭ ءبىر بولىگىنە اينالدى», دەدى «قايتارىلعان اكتيۆتەردى باسقارۋ كومپانياسى» جشس باس ديرەكتورى قۋانىشبەك مۇقاش.
جۋىردا وسى ارتەفاكتىلەر ۇلتتىق مۋزەيدىڭ ەكسپوزيتسيالارىنا قويىلىپ, كوپشىلىكتىڭ نازارىنا ۇسىنىلادى.