پاۋەرليفتينگتىڭ كلاسسيكالىق جانە ارنايى كيىم كيىپ كوتەرۋ دەگەن ەكى ءتۇرى بار. بۇل سپورت ءتۇرى وليمپيادالىق ويىنداردىڭ تىزىمىنە ءالى ەنگىزىلمەگەنىمەن, حالىقارالىق وليمپيادا كوميتەتى ۇيىمداستىراتىن دۇنيەجۇزىلىك ويىنداردا ۇسىنىلعان. اتالعان سپورت ءتۇرى بويىنشا جىل سايىن الەم چەمپيوناتتارى ءوتىپ تۇرادى, ونى حالىقارالىق پاۋەرليفتينگ فەدەراتسياسى ۇيىمداستىرادى. پاۋەرليفتينگتەن ەرەسەكتەر اراسىنداعى تاۋەلسىز قازاقستاننىڭ سپورت تاريحىندا العاشقى الەم چەمپيونى الەكسەي سيۆوكون ەكەنى بەلگىلى. ال الەم چەمپيوناتىندا توپ جارعان العاشقى قازاق ابدۋلكاريم قارامان تۋرالى بىرەۋ بىلسە, بىرەۋ بىلمەيدى.
ابدۋلكاريم ءدارىباي ۇلى 1994 جىلى قاراعاندى وبلىسىنىڭ شەت اۋدانىنا قاراستى اقادىر كەنتىندە دۇنيەگە كەلدى. پاۋەرليفتينگپەن 12 جاسىنان باستاپ شۇعىلدانا باستايدى. 13 جاسىندا العاش رەت وبلىستىق جارىستا جەڭىسكە جەتكەن ول رەسپۋبليكالىق جارىسقا جولداما الىپ, سول جارىستا 5-ءشى ورىن العان. ال 14 جاسىندا العاش رەت رەسپۋبليكالىق جارىستا جەڭىس تۇعىرىنان كورىندى.
سپورتشىنىڭ پاۋەرليفتينگپەن شۇعىلدانۋىنا اعاسى مەن اكەسى سەبەپكەر بولعان. اقادىر كەنتىندە تۇرىپ جاتقان وسپانوۆتار وتباسىن – سپورتشىلار اۋلەتى دەسە دە بولادى. اعاسى الماز جانە باۋىرى ايتاس بىرنەشە رەت الەم جانە ازيا چەمپيوندارى اتانعان. ال قۇرىلىس پەن تەمىر جول سالاسىندا ەڭبەك ەتىپ, سپورتتىڭ بۇل تۇرىنە 50-دەن اسقان شاعىندا كەلگەن اكەسى ءدارىباي وسپانوۆ اقساقال ازيانىن 10 دۇركىن, الەمنىڭ 5 دۇركىن چەمپيونى.
ابدۋلكاريم ءدارىباي ۇلى رەسپۋبليكالىق جارىستاردا 24 رەت توپ جارعان. ازيا دودالارىندا 6 مارتە التىن مەدال جەڭىپ العان. جاھاندىق جارىستاردىڭ 7 مارتە كۇمىس جۇلدەگەرى جانە 7 دۇركىن چەمپيونى. ايتا كەتكەن ءجون, ابدۋلكارىم قارامان سپورت شەبەرى اتاعىن 15 جاسىندا ورىندادى, ال 17 جاسىندا «حالىقارالىق سپورت شەبەرى» اتاعىن يەلەندى. ول پاۋەرليفتينگ سپورت تۇرىنەن قازاقتان شىققان تۇڭعىش «حالىقارالىق دارەجەدەگى ەڭبەك سىڭىرگەن سپورت شەبەرى» اتاعىنىڭ يەگەرى. الەمنىڭ رەكوردىن 5 رەت جاڭارتتى. پاۋەرليفتينگشىلەردىڭ بۇكىلالەمدىك رەيتينگتەرىندە ەكى تۇرىنەن دە 4 ورىنعا شىعىپ, ۇزدىك 5-تىككە ەندى.
2009 جىلى ءۇندىستاندا العاش رەت ازيا چەمپيونى اتانعان جاس شاعىنان بەرى ول دۇنيەجۇزىنىڭ تۇكپىر-تۇكپىر ەلدەرىن كورىپ, تالاي جارىستاردا توپ جارىپ, ەلىمىزدىڭ اتىن اسقاقتاتتى.
«2017 جىلى ءساۋىر ايىندا اقش-تىڭ كيللين قالاسىندا (تەحاس شتاتى) ەرەسەكتەر اراسىندا پاۋەرليفتينگتىڭ جاتىپ سىعىمداپ كوتەرۋ (كلاسسيكالىق) ءتۇرى بويىنشا الەم چەمپيوناتىندا قازاق ۇلتىنان شىققان تۇنعىش الەم چەمپيونى اتانعان مەزەتتەگى سەزىمدەردى سوزبەن جەتكىزۋ مۇمكىن ەمەس, ەلىمىزدىڭ ءانۇرانى ويناعاندا كوزىمنەن جاس پارلادى», دەيدى ابدۋلكاريم قارامان.
سپورتشى قازىرگى ۋاقىتتا دا 13 مىڭ تۇرعىنى بار تۋعان جەرى اقادىر كەنتىندە تۇرادى, سول ءىرى كەنتتە ەكى باپكەر, ياعني اكەسى ءدارىباي وسپانوۆ اقساقال ەكەۋى جاتتىقتىرۋشى بولىپ جۇمىس ىستەيدى. اكەلى-بالالى سپورتشىلاردىڭ شاكىرتتەرىنىڭ دە جەتىستىكتەرى ايتارلىقتاي. شاكىرتتەرى مارعۇلان بەكەن, جانات ساتىبالدى, ازات زەينەديلوۆ – ازيا چەمپيوندارى, ال انتون مارچەنكو ەسىمدى شاكىرتى الەمنىڭ ءۇش دۇركىن, ازيانىن ءۇش مارتە چەمپيونى اتانعان. ودان بولەك, وننان استام سپورت شەبەرى, ەلۋدەن استام قر-نىڭ چەمپيوندارى, جەتپىستەن استام سپورت شەبەرىنە ۇمىتكەر شاكىرتتەرى بار.
«قاراجات بولىنەتىندىكتەن جارىستاردىڭ بارلىعىنا بارۋعا مۇمكىندىگىمىز بار. بىراق, جاستارعا ستيپەنديا تولەۋگە جانە سبورگا شىعۋعا مۇمكىندىك بولماي جاتىر جانە اقادىر كەنتىندە سپورتزال سالۋ ماسەلەسى ءالى شەشىمىن تاپپادى, نەبارى 90 كۆادرات مەتر جەردە عانا جاتتىعۋ جاساپ جاتىرمىز», دەيدى ول.
پاۋەرليفتينگ – سپورتتىڭ ەڭ اۋىر ءتۇرى. ولاي دەيتىنىمىز, ءار پاۋەرليفتينگىشى ورتا ەسەپپەن اپتاسىنا 5 رەت جاتتىعۋعا قاتىسىپ, ءار جاتتىعۋ سايىن زىلتەمىردى 20 توننا كوتەرگەندە جىلىنا 5 000 توننا كوتەرەدى ەكەن. سوندىقتان ولار ۆيتاميندەرگە تولى ساپالى تاماقتاردى جەيدى ءارى ديەتا ۇستانادى.
«سودان دا بولار, پاۋەرليفتينگپەن جىگەرى جەتكەندەر عانا اينالىسادى. وكىنىشكە وراي, بۇل سپورت ءتۇرى جابىلادى دەگەن اڭگىمە بار, مەن بۇعان مۇلدە كەلىسپەيمىن. قازاقستاننىڭ پاۋەرليفتينگى بۇكىل الەمگە ايگىلى. باسقا جەتىستىكتەردى ايتپاعاندا, بيىل قازاقستان قۇراماسى ەرەسەكتەر اراسىندا 54 ەلدىڭ سپورتشىلارى اراسىندا توپ جاردى. جاقسى دامىعان سپورت تۇرلەرى جابىلۋعا لايىقتى ەمەس», دەيدى ابدۋلكاريم ءدارىباي ۇلى.