سەنات توراعاسى ماۋلەن اشىمباەۆ باستاعان دەپۋتاتتار ۇلتتىق عارىش ورتالىعىنا بارىپ, عارىش اپپاراتتارىن شىعاراتىن قۇراستىرۋ-سىناۋ كەشەنىنىڭ قىزمەتىمەن تانىستى. كەزدەسۋدە اتالعان سالانى دامىتۋعا ارنالعان جوبالاردى ىسكە اسىرۋ, ولاردى دامىتۋ كەلەشەگى تالقىلاندى.
م.اشىمباەۆ اتاپ وتكەندەي, ەلىمىز ءۇشىن عارىش سالاسىن دامىتۋ مەملەكەتتىڭ ەگەمەندىگى مەن قاۋىپسىزدىگىن قامتاماسىز ەتۋ جولىنداعى ستراتەگيالىق ماڭىزعا يە. سوندىقتان مەملەكەت باسشىسى بۇل باعىتقا ۇنەمى باسا ءمان بەرىپ كەلەدى.
سەنات توراعاسى عارىش سالاسىنداعى جۇمىستى جەتىلدىرۋ ءۇشىن كادر تاپشىلىعىن شەشۋگە, ءبىلىم بەرۋ ساپاسىن ارتتىرۋعا, ۇلتتىق سپۋتنيكتىك باعدارلامانى دامىتۋعا, جوبالاردى كوممەرتسيالاندىرۋعا جانە باسقا دا ماڭىزدى ماسەلەلەرگە ەرەكشە نازار اۋدارۋ قاجەت ەكەنىن اتاپ ءوتتى.
ءوز كەزەگىندە, تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ سەناتورلارعا اتالعان سالانى ىلگەرىلەتۋ ماقساتىمەن قولعا الىنعان جۇمىستار جونىندە ايتىپ بەردى. تسيفرلىق دامۋ, يننوۆاتسيالار جانە اەروعارىش ونەركاسىبى ۆيتسە-ءمينيسترى مالىك ولجابەكوۆ ۇلتتىق عارىش ورتالىعىنىڭ الداعى كەزەڭگە ارنالعان جوسپارلارى مەن جوبالارىنا توقتالدى.
ءىس-شارادا ءتسدياوم اەروعارىش كوميتەتىنىڭ توراعاسى باۋبەك ورالماعامبەتوۆ «بايقوڭىر» عارىش ايلاعىنىڭ ۇشىرۋ قىزمەتتەرى مەن دامۋ كەلەشەگى تۋرالى باياندادى. سونداي-اق كەزدەسۋ بارىسىندا جەردى قاشىقتىقتان زوندتاۋدىڭ جانە سپۋتنيكتىك بايلانىس پەن حابار تاراتۋدىڭ عارىشتىق جۇيەسىنە قاتىستى ماسەلەلەر ءسوز بولدى.
سونىمەن قاتار دەپۋتاتتار سپۋتنيكتى سىناۋعا ارنالعان اكۋستيكالىق كامەرا, ەلەكتروماگنيتتىك ۇيلەسىمدىلىك كامەراسى, شاعىن جانە ۇلكەن تەرموۆاكۋمدىق كامەرا سياقتى عارىش اپپاراتتارىن شىعاراتىن قۇراستىرۋ-سىناۋ كەشەنىنىڭ ۋچاسكەلەرىنە باردى جانە جەردى قاشىقتىقتان زوندتاۋدىڭ سپۋتنيكتىك توپتاماسى ءوندىرىسىنىڭ تانىستىرىلىمىنا قاتىستى.