قر عىلىم جانە جوعارى ءبىلىم ءمينيسترى ساياسات نۇربەك اقش-تا جوعارى ءبىلىم مەن عىلىم سالاسىنداعى ستراتەگيالىق ارىپتەستىكتى دامىتۋعا باعىتتالعان بىرقاتار كەزدەسۋلەر وتكىزدى, دەپ حابارلايدى Egemen.kz.
قازاقستان رەسپۋبليكاسى عىلىم جانە جوعارى ءبىلىم مينيسترلىگى مەن گارۆارد ۋنيۆەرسيتەتىنىڭ قۇرامىنداعى دەۆيس اتىنداعى رەسەي جانە ەۋرازيالىق زەرتتەۋلەر ورتالىعى ءوزارا تۇسىنىستىك تۋرالى مەموراندۋمعا قول قويدى.
قۇجات اياسىندا تاراپتار اكادەميالىق جانە عىلىمي باعىتتاردا بىرلەسكەن باستامالاردى ىسكە اسىرۋعا ۋاعدالاستى. اتاپ ايتقاندا, تاريح, ساياسات, ەكونوميكا, تۇراقتى دامۋ جانە باسقا دا سالالار بويىنشا اكادەميالىق الماسۋلار, سونىڭ ىشىندە ستيپەنديالار مەن عىلىمي تاعىلىمدامالار ۇيىمداستىرۋ قاراستىرىلعان. عالىمدارعا بىرلەسكەن جوبالار شەڭبەرىندە گارۆارد ۋنيۆەرسيتەتىنىڭ كىتاپحانا جانە ارحيۆ قورلارى ۋاقىتشا قولجەتىمدى بولادى.
تاراپتار قازاقستاننىڭ تاريحي مۇراسىن ساقتاۋ جانە ىلگەرىلەتۋ ماسەلەسىنە ايرىقشا نازار اۋداردى. وسىعان بايلانىستى گارۆارد ۋنيۆەرسيتەتىنىڭ حوۋتون كىتاپحاناسىمەن بىرلەسىپ, قازاقستاننىڭ سيرەك كىتاپتارى مەن قولجازبالارىنان تۇراتىن جيناقتى تسيفرلاندىرۋ جانە كاتالوگتاۋ جوباسىن ىسكە قوسۋ تۋرالى كەلىسىمگە قول جەتكىزىلدى. جوبا اياسىندا زەرتتەۋشىلەر مەن ستۋدەنتتەر ءۇشىن قولجەتىمدى بولاتىن ەلەكتروندىق دەرەكقور ازىرلەنىپ, قازاقستان مەن اقش كىتاپحانالارى مەن ارحيۆتەرىنىڭ ماماندارى اراسىندا سيرەك باسىلىمداردى ساقتاۋ, جۇيەلەۋ جانە زەرتتەۋ بويىنشا تاجىريبە الماسۋ كوزدەلىپ وتىر.
سونداي-اق قازاقستاندىق جيناقتارعا ارنالعان كورمەلەر مەن مادەني ءىس-شارالار وتكىزۋ جوسپارلانعان. بۇل ەلىمىزدىڭ باي مادەني جانە تاريحي مۇراسىنا جاھاندىق نازار اۋدارتۋعا مۇمكىندىك بەرەدى. سونىمەن قاتار سيرەك كىتاپتار كوللەكتسياسى نەگىزىندە قازاقستاندىق ۋنيۆەرسيتەتتەردىڭ ستۋدەنتتەرى مەن زەرتتەۋشىلەرىنە ارنالعان وقۋ كۋرستارىن ازىرلەۋ مۇمكىندىگى قاراستىرىلادى.
ىنتىماقتاستىقتىڭ ماڭىزدى باعىتى رەتىندە قازاقستاندىق ءبىلىم جانە عىلىمي مەكەمەلەرگە حوۋتون كىتاپحاناسىنىڭ ەلەكتروندىق دەرەكقورىنا قولجەتىمدىلىك بەرۋ قاراستىرىلىپ وتىر. بۇل عىلىمي-زەرتتەۋ جۇمىستارى مەن ءبىلىم بەرۋ ۇدەرىسىنىڭ مۇمكىندىكتەرىن ەداۋىر كەڭەيتەدى. مەموراندۋم اياسىندا قازاقستاندىق جيناقتار ماتەريالدارى نەگىزىندە عىلىمي جوبالار مەن جاريالانىمداردى قولداۋ دا كوزدەلگەن. بۇل قازاقستاننىڭ تاريحى مەن مادەنيەتىن تەرەڭىرەك زەردەلەۋگە جول اشادى.
جاسالعان كەلىسىم ەكىجاقتى ارىپتەستىكتىڭ جاڭا كوكجيەكتەرىن اشىپ, اكادەميالىق تاجىريبە الماسۋعا مۇمكىندىك بەرەدى جانە قازاقستاندا عىلىم مەن جوعارى ءبىلىمدى دامىتۋعا ەلەۋلى ۇلەس قوسادى.