ءا.مامبەتوۆ اتىنداعى مەملەكەتتiك دراما جانە كومەديا تەاترىندا قازاقستاننىڭ ەڭبەك سىڭىرگەن قايراتكەرى, 2019–2023 جىلدارى مادەنيەت ۆيتسە-ءمينيسترى قىزمەتىن اتقارعان نۇرعيسا داۋەشوۆتىڭ «تيەك» اتتى شىعارماشىلىق كەشى ءوتتى.
مەملەكەتتىك قىزمەتتە جۇرسە دە, بەكزات ونەردەن قول ۇزبەگەن نۇرعيسا داۋەشوۆ شىعارماشىلىق كەشىندە كۇي اتاسى قۇرمانعازىنىڭ «امان بول, شەشەم, امان بول», «كوكالا ات», «بايجۇما», «تورەمۇرات», ماحامبەتتىڭ «جۇمىر قىلىش», نۇرعيسا تىلەنديەۆتىڭ «اققۋ», تۇياقبەردى شامەلوۆتىڭ «قالي-مامەن – كۇمبىر كۇي», قىرىمگەرەي قاجىموۆتىڭ «جايىق تولعاۋى», قارشىعا احمەدياروۆتىڭ «كۇتكەندە» سەكىلدى شىعارمالارىن ورىنداپ, كوپشىلىكتىڭ كوڭىلىن دەمەدى.
ونەر يەسى ءار كۇيدىڭ شىعۋ تاريحىنا توقتالىپ, اڭگىمەسىن ءوزىنىڭ مادەنيەت سالاسىندا كورگەن-بىلگەن ەستە قالارلىق ەرەكشە ساتتەرىمەن تۇزدىقتاي ءبىلدى. كۇي كەشىندە ە.راحماديەۆ اتىنداعى مەملەكەتتىك اكادەميالىق فيلارمونيانىڭ كامەرالىق حورىنىڭ سۇيەمەلدەۋىمەن تولەگەن مومبەكوۆتىڭ ايگىلى «سالتانات» كۇيى العاش رەت پارتيتۋرا نۇسقاسىندا ورىندالدى.
نۇرعيسا داۋەشوۆتى قولداي كەلگەن ونەردەگى قاناتتاس دوستارى دا حالىقتىڭ قوشەمەتىنە بولەندى. اتاپ ايتقاندا, كۇيشىلەر باتىرجان مىقتىباەۆ پەن اباي قويشىباەۆ, باتىس قازاقستان وبلىستىق فيلارمونياسىنىڭ انشىلەرى داستان ەسەنتەمىروۆ پەن ەرنار ءومىرالى, ۇلتتىق ۇلان ءان-بي ءانسامبلىنىڭ ءسوليسى اسحات امىرعالي, قۇمدى انيماتسيا ونەرىنىڭ شەبەرى ايجان جاركەشوۆا, كۇي ايتىسقا شىققان قىرعىزدىڭ مادەنيەت قايراتكەرى گۇلشات تالايبەكوۆا جۇرتشىلىقتىڭ ىستىق ىقىلاسىنا يە بولدى.