بۇگىن الماتىدا جەڭىستىڭ 80 جىلدىعىنا ارنالعان «جەڭىستىڭ ەستەلىگى: ۇرپاقتار مەن حالىقتاردىڭ بىرلىگى» اتتى قازاقستان-رەسەي كونفەرەنتسياسى ءوتتى, دەپ جازادى Egemen.kz.
كونفەرەنتسيا جۇمىسىنا قر پرەزيدەنتى اكىمشىلىگىنىڭ ىشكى ساياسات ءبولىمىنىڭ مەڭگەرۋشىسى ابزال نۇكەنوۆ, قر مادەنيەت جانە اقپارات ءمينيسترى ايدا بالاەۆا, رەسەي فەدەراتسياسى پرەزيدەنتىنىڭ شەت ەلدەرمەن ايماقارالىق جانە مادەني بايلانىستار جونىندەگى باسقارماسى باسشىسىنىڭ ورىنباسارى انتون رىباكوۆ, رەسەي فەدەراتسياسىنىڭ جاستار ءىسى جونىندەگى فەدەرالدىق اگەنتتىگى باسشىسى گريگوري گۋروۆ, ەكى ەلدىڭ عالىمدارى مەن ساراپشىلارى, سونداي-اق بەلسەندى جاستار قاتىستى.
قر مادەنيەت جانە اقپارات ءمينيسترى ايدا بالاەۆا ءوز سوزىندە قازاقستاندىقتاردىڭ جەڭىسكە قوسقان ۇلەسىنە توقتالىپ, سوعىسقا ءار بەسىنشى رەسپۋبليكا تۇرعىنىنىڭ اتتانعانىن اتاپ ءوتتى. سوعىس جىلدارىندا 601 011 ادام قايتىس بولدى, 271 503 وتانداسىمىزدىڭ تاعدىرىنان ءالى كۇنگە دەيىن بەيحابارمىز.
مينيستر سونىمەن قاتار سوعىس جىلدارىندا قازاقستان قۋاتتى قورعانعا اينالعانىن ايتتى.
«سوعىس – بۇل تەك ادام شىعىنى عانا ەمەس, سونىمەن قاتار ەكونوميكالىق تا شىعىن. تۋرا ماعىناسىندا ايتقاندا, قازاقستان مايدانعا ءبارىن بەردى. سوعىس جىلدارىندا رەسپۋبليكا مايدانعا قورعاسىننىڭ 85 پايىزىن جەتكىزدى, ال ءار ءتورتىنشى وق لەنينوگورسكىدە (قازىرگى ريددەر) وندىرىلگەن شيكىزاتتان جاسالدى», دەدى ا. بالاەۆا.
بۇدان بولەك, قازاقستان بارلىق پوليمەتالل كەندەرىنىڭ 79 پايىزىن, ۆيسمۋتتىڭ 65 پايىزىن, موليبدەننىڭ 60 پايىزىن, مىستىڭ 35 پايىزىن ءوندىردى.
ونەركاسىپ ورىندارىن جاپپاي كوشىرۋ قازاقستاندى يندۋستريالىق ەلگە اينالدىرۋعا ىقپال ەتتى. بارلىعى 220 زاۋىت ەۆاكۋاتسيالانىپ, ەلدە ماشينا جاساۋ, ستانوك جاساۋ, وق-ءدارى ءوندىرىسى, حيميا ونەركاسىبى مەن قارا مەتاللۋرگيا سىندى جاڭا يندۋستريالىق سالالار قالىپتاستى.
«كاسىپورىنداردى كوشىرۋ جانارماي, ازىق-ت ۇلىك, قۇرىلىس ماتەريالدارى قاتتى تاپشى كەزدە جۇرگىزىلدى. ال كەيبىر زاۋىتتاردىڭ جاپان دالادا سالىنعانى – اسىرا ايتىلعان نارسە ەمەس, بۇل – تاريحي فاكت», دەدى مينيستر.