قازاقستان قوعامدىق دامۋ ينستيتۋتىندا ساراپشىلار «ۇلتتىق قۇرىلتاي. ەلەۋلى كەزەڭ» اتتى جيىن وتكىزىپ, ۇلتتىق قۇرىلتايدىڭ IV وتىرىسىندا كوتەرىلگەن ماسەلەلەردى تالقىلادى.
الدىمەن ساراپشىلار ۇلتتىق قۇرىلتاي وتىرىستارىنا شولۋ جاسادى. قازاقستان قوعامدىق دامۋ ينستيتۋتى قوعامدىق ۇردىستەردى زەرتتەۋ ورتالىعىنىڭ باسشىسى ريززات تاسىمنىڭ ايتۋىنشا, ۇلتتىق قۇرىلتاي قىزمەتى كونسۋلتاتيۆتىك-كەڭەسشى سيپاتى جانە الەۋمەتتىك-ساياسي دامۋ ماسەلەلەرى بويىنشا كونسەنسۋسقا قول جەتكىزۋگە باعدارلانۋىمەن ەرەكشەلەندى. وسىلايشا, اتالعان الاڭ بۇگىنگى قوعامدىق-ساياسي ۇدەرىستەردى ساراپتاۋ ورنىنا اينالدى.
– پرەزيدەنت قاسىم-جومارت توقاەۆ بۋرابايداعى سوزىندە قازاقستان تاۋەلسىزدىگىنىڭ 40 جىلدىعىنا قانداي جەتىستىكتەرمەن جەتۋ كەرەكتىگىن اتاپ ءوتتى. جالپى, الداعى ۋاقىتتا نورماتيۆتىك-قۇقىقتىق قۇجاتتاردىڭ جۇيەلەنۋى مەن ەلدى جاڭعىرتۋعا باعىتتالعان بىرقاتار تۇجىرىمدامالىق قۇجات قابىلدانادى دەپ كۇتىلىپ وتىر. كەلەسى V ۇلتتىق قۇرىلتاي قىزىلوردا قالاسىندا وتەدى. بۇل – تاريحي مانگە يە شەشىم, ويتكەنى قىزىلوردا ءبىر كەزدەرى ەلدىڭ العاشقى استاناسى بولعان. دەمەك بولاشاققا باعىتتالعان تالقى تەرەڭ تاريحي تامىرعا سۇيەنىپ وتىر, – دەدى ر.تاسىم.
ال ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى قازاقستان حالقى اسسامبلەياسى كافەدراسىنىڭ مەڭگەرۋشىسى ناتاليا كالاشنيكوۆا ققدي مەن قحا كافەدراسى اراسىندا قۇرىلتايدا كوتەرىلگەن ماسەلەلەر شەڭبەرىندە زەرتتەۋ جۇمىستارىن ۇيىمداستىرۋ بويىنشا ارىپتەستىك قارىم-قاتىناس ورناتۋدى العا تارتتى.
– وسىنداي ىنتىماقتاستىق ارقىلى عىلىمي-ساراپشىلىق ديپلوماتيا سياقتى ماڭىزدى باعىت قالىپتاسادى دەپ ويلايمىن. بۇل قازىرگى جاعدايدا وتە ماڭىزدى. ەلدە ساراپشىلىق ورتا بەلسەندى تۇردە قالىپتاسىپ كەلەدى, شەتەلدە دە قىزىعۋشىلىق تۋدىراتىن ماڭىزدى ينتەللەكتۋالدىق ورتالىقتار بار. الايدا بۇل ورتالىقتار كوبىنە اۆتونومدى جۇمىس ىستەيدى. سول سەبەپتى ەكى جاقتى ىنتىماقتاستىق ءوز مۇمكىندىكتەرىمىزدى كەڭەيتۋگە زور مۇمكىندىك بەرەدى, – دەدى ول.
ۇلتتىق قۇرىلتاي شەڭبەرىندە قازاقستان قوعامدىق دامۋ ينستيتۋتى 2023 جىلدان باستاپ قوعامدىق-ساياسي تاقىرىپتار بويىنشا تالداۋ باياندامالارىن ازىرلەپ كەلەدى. قوعامدىق ۇردىستەردى زەرتتەۋ ورتالىعىنىڭ ساراپشى-مەنەدجەرى ولجاس تورەمۇراتوۆتىڭ ايتۋىنشا, وتكەن جىلى ەلدىڭ جالپىۇلتتىق قۇندىلىق باعدارىنىڭ نەگىزگى تەوريالىق جانە قولدانبالى اسپەكتىلەرىن زەرتتەۋ ناتيجەلەرى, جاستاردى قۇندىلىققا باعدارلاپ وقىتۋ جانە تاربيەلەۋ جۇيەسىن قۇرۋ نەگىزدەرى سەكىلدى باياندامالار ۇسىنىلعان. سونداي-اق وسى ورتالىقتىڭ ساراپشى-مەنەدجەرى ينديرا كۇنتۋوۆا ءاربىر تالداۋ بايانداماسى ۇلتتىق قۇرىلتاي مۇشەلەرىن قوسا العاندا, ساراپشىلارمەن جۇرگىزگەن جاپپاي ساۋالنامالار مەن تەرەڭدەتىلگەن سۇحباتتارعا نەگىزدەلگەنىن ايتتى.