قازاقستان رەسپۋبليكاسى مادەنيەت جانە اقپارات مينيسترلىگىنىڭ ارحيۆ, قۇجاتتاما جانە كىتاپ ءىسى كوميتەتى گەرالديكالىق جۇمىس باسقارماسى مەن «گەرالديكالىق زەرتتەۋلەر ورتالىعى» رمم-ءنىڭ ۇيىمداستىرۋىمەن «مەملەكەتتىك رامىزدەر مەن ۆەدومستۆولىق جانە ولارعا تەڭەستىرىلگەن وزگە دە ناگرادالار گەرالديكاسى ماسەلەلەرى» تاقىرىبىندا رەسپۋبليكالىق سەمينار ءوتتى, دەپ جازادى Egemen.kz.
ەكى كۇندىك سەمينارعا ەلىمىزدىڭ بارلىق وڭىرلەرىنەن مەملەكەتتىك ورگانداردىڭ, سونداي-اق قازاقستان رەسپۋبليكاسى ىشكى ىستەر مينيسترلىگى مەن ساۋدا جانە ينتەگراتسيا مينيسترلىگىنىڭ وكىلدەرى, ءماجىلىس دەپۋتاتتارى مەن قوعام قايراتكەرلەرى قاتىستى.
ءىس-شارانىڭ باستى ماقساتى – مەملەكەتتىك رامىزدەر مەن ۆەدومستۆولىق ناگرادالار گەرالديكاسىن تالقىلاۋ, ولاردى ناسيحاتتاۋ, ۇلتتىق ستاندارتتار مەن زاڭ تالاپتارىنىڭ ساقتالۋىن قامتاماسىز ەتۋ, سونداي-اق ادال ەڭبەك يەلەرىن ماراپاتتاۋ ءراسىمىن بىرىزدەندىرۋ.
ايتا كەتەيىك, مەملەكەت باسشىسى ۇلتتىق قۇرىلتايدا گەرالديكا ماسەلەسىنە بىرنەشە مارتە توقتالىپ وتكەن بولاتىن. ماسەلەن, تۇركىستاندا وتكەن ۇلتتىق قۇرىلتايدا وڭىرلىك نىشانداردى جۇيەلەۋ ماسەلەسىن كوتەرسە, تاياۋدا بۋرابايدا وتكەن جيىندا ۆەدومستۆولىق ماراپاتتاردى رەتكە كەلتىرۋدى تاپسىردى.
جيىن بارىسىندا وڭىرلىك نىشانداردى زاڭ تالاپتارىنا سايكەس بەكىتۋ جانە ولاردى بىرىزدەندىرۋ, مەملەكەتتىك رامىزدەرگە قاتىستى قۇقىق بۇزۋشىلىقتاردى دەر كەزىندە انىقتاپ, ءتيىستى شارالار قابىلداۋ, مەملەكەتتىك رامىزدەردى پايدالانۋ ءتارتىبى مەن ۇلتتىق ستاندارتتاردىڭ ساقتالۋى, سونداي-اق مەملەكەتتىك رامىزدەر كۇنىن مەرەكەلەۋ ماسەلەلەرى تالقىلاندى.
اتاپ ايتقاندا, سەميناردىڭ العاشقى كۇنىندە ارحيۆ, قۇجاتتاما جانە كىتاپ ءىسى كوميتەتى گەرالديكالىق جۇمىس باسقارماسىنىڭ باسشىسى گۇلدانا ارگەنوۆا پرەزيدەنت تاپسىرماسىنا سايكەس وڭىرلىك نىشانداردى بىرىزدەندىرۋ جونىندە اتقارالىپ جاتقان جۇمىستاردى باياندادى.
ال ىشكى ىستەر مينيسترلىگى تىل دەپارتامەنتىنىڭ باس مامانى ايدا باياليەۆا قازاقستان رەسپۋبليكاسىنىڭ مەملەكەتتىك رامىزدەرىنە قاتىستى قۇقىق بۇزۋشىلىقتاردى ۋاقتىلى انىقتاۋ جانە شارا قولدانۋ تاقىرىبىندا ءسوز قوزعادى.
سونداي-اق, قر ساۋدا جانە ينتەگراتسيا مينيسترلىگىنىڭ ستاندارتتاۋ جانە تاۋارلاردىڭ شىققان ەلدەرى باسقارماسىنىڭ باسشىسى قازبەك نۇربەك قازاقستان رەسپۋبليكاسىنىڭ مەملەكەتتىك تۋى مەن مەملەكەتتىك ەلتاڭباسى) ۇلتتىق ستاندارتتارىنىڭ ساقتالۋى مەن قولدانىلۋى جونىندە ايتىپ بەردى.
سەمينارعا قاتىسۋشىلار اتالعان ماسەلەلەرگە قاتىستى سۇراقتارى مەن وي-پىكىرلەرىن ورتاعا سالىپ, كەڭىرەك تالقىلادى.
سەميناردىڭ ەكىنشى كۇنى قازاقستان رەسپۋبليكاسى پارلامەنتى ءماجىلىسىنىڭ زاڭناما جانە سوت-قۇقىقتىق رەفورما كوميتەتىنىڭ مۇشەسى ابزال قۇسپان مەملەكەتتىك رامىزدەرگە قاتىستى جاۋاپكەرشىلىكتى كۇشەيتۋ ماسەلەسىن كوتەرىپ, زاڭنامالىق وزگەرىستەر ەنگىزۋگە قاتىستى ويلارىن ورتاعا سالدى.
قازاقستان رەسپۋبليكاسىنىڭ مەملەكەتتىك ەلتاڭباسى اۆتورى جانداربەك مالىبەكوۆ مەملەكەتتىك رامىزدەردىڭ ءمانى مەن ماڭىزىنا توقتالىپ, وڭىرلىك نىشانداردى بىرىزدەندىرۋ تۋرالى باستاماعا قولداۋ ءبىلدىردى.
سونىمەن قاتار تۇڭعىش ءرامىزتانۋشى ەربول شايمەردەنوۆتىڭ جارى, ۇستاز كۇلاش قايىرجانقىزى ءسوز سويلەپ, مەملەكەتتىك رامىزدەردى ازىرلەۋ كەزىندەگى قيىندىقتار مەن ەستەلىكتەر جونىندە وي ءبولىستى.
ءىس-شارا سوڭىندا سەمينارعا قاتىسۋشىلارعا سەرتيفيكاتتار مەن ەستەلىك سىيلىقتار تابىستالدى.