ەلىمىزدە حالىق سانى بويىنشا قازاقتاردان كەيىنگى ەتنوستىق توپ – ورىستار. ولار قازى-قارتامەن ەت اسىپ, قۇرت-ماي ازىرلەپ, قازاقتىڭ ۇلتتىق ءداستۇرىن ەرەكشە قۇرمەتتەيدى. قازاقتىڭ قوناقجاي, كەڭپەيىل قاسيەتىنە ءالى كۇنگە دەيىن ءتانتى بولىپ, العىسىن ايتىپ كەلەدى.
«مەن قازاقتاردىڭ سالت-داستۇرلەرى تۋرالى ءار كەز ايتىپ جۇرەمىن. كوپتەگەن قوناقجاي ادامدى كوردىم, بىراق ولار – مەنىڭ تۋعان جەرىمدەگىدەي قوناقجاي ەمەس. مەنىڭ قالام – تسەلينوگراد, اقمولا, استانا, اتى قانشا اۋىسسا دا وسى قوناقجاي قالپىنان تانبادى. مۇندايدى ەش جەردەن كورگەن ەمەسپىن. ءبارىمىز بىلەمىز, مەيمان كەلسە, ول جايدان-جاي كەتپەيدى. ونىڭ تاماعى توق بولادى, ءۇي يەسىنىڭ جيعان-تەرگەنى, ساقتاعانى, بارلىعى قوناق الدىنا اق داستارقان بولىپ جايىلادى. ال داستارقان باسىنداعى كوڭىل كۇي قانداي, ونى ەش جەردەن تاپپايسىڭ, اڭگىمە-دۇكەن ءبىر-بىرىنە ۇقسامايدى. ءار قازاقتان قاشاندا قوناقجايلىلىق, دوستىق نيەتتى كورۋگە بولادى. مۇنى تۋعانىمنان كورىپ كەلە جاتسام دا, تاڭعالۋمەن كەلەمىن, نە دەگەن دارقان كوڭىلدى حالىق», دەپ اعىنان جارىلدى ەلورداداعى «رۋسسكايا وبششينا» قوعامدىق بىرلەستىگىنىڭ باسشىسى اندرەي اۆدەەۆ.
سونداي-اق ول ەلىمىزدە ورىن العان رەفورمالارعا توقتالىپ, قولدايتىنىن دا جەتكىزدى, اسىرەسە قازاق ءتىلىنىڭ بولاشاعى زور ەكەنىن ايتىپ, سەنىم ءبىلدىردى.
«مەنەن قازاق ءتىلىن بىلەسىز بە, سويلەيسىز بە دەپ ءجيى سۇرايدى. ءبىرىنشى ماماندىعىم – ورىس ءتىلى ءپانىنىڭ مۇعالىمى, ودان سوڭ ينجەنەر ماماندىعىن يگەردىم. جاسىراتىنى جوق, مەكتەپتە قازاق ءتىلىن ماردىمدى وقىتپادى. الايدا وعان قاراپ قول قۋسىرىپ وتىرۋعا بولمايدى, ارينە. قازاقستاندا مەملەكەتتىك ءتىل قازاق ءتىلىنىڭ مارتەبەسى بيىك, قولدانىلۋ اياسى كەڭ بولۋى كەرەك. زاڭدى تۇرعىدان العاندا دا ۇستەمى بيىك بولۋى شارت. ءبىز وسىعان جەتىپ كەلەمىز, جەتتىك دەۋگە دە بولادى», دەپ پىكىرىن ءبىلدىردى كەيىپكەرىمىز.
اقمولا وبلىسىندا ءوسىپ-ونگەن, 30 جىلدان اسا ۋاقىت ەڭبەك ەتىپ كەلە جاتقان ول قازاقستان وتانىم بولىپ قالا بەرمەك, ەندى ەشقايدا قوزعالعىسى كەلمەيتىنىن, اسىرەسە استانادان كەتپەيتىنىن ايتتى. ويتكەنى استانانىڭ قالىپتاسۋ تاريحىنا كۋا بولعانداردىڭ ءبىرى. وتباسىن قۇرىپ, ءۇش بالاسى دۇنيەگە كەلگەن جەرىنەن جىراقتا جۇرگەنىن ءتىپتى ەلەستەتە دە المايدى. ايتۋىنا قاراعاندا, بالالارى دا تۋعان جەرلەرىنەن كەتكىسى جوق.
ءوزى باسقارىپ وتىرعان «رۋسسكايا وبششينا» قوعامدىق بىرلەستىگىنىڭ قىزمەتى دە, جەتىستىگى دە زور ەكەن. 2013 جىلى قۇرىلعان بىرلەستىكتە تەك ورىستار ەمەس, وزگە ەتنوس وكىلدەرى دە بار. ولاردىڭ بارلىعى دوستىق ۇيىندە قازاق تىلىندە وتەتىن «مامىلە» سۇحبات كلۋبىنىڭ كەزدەسۋلەرىنە قاتىسادى. اتالعان كلۋبقا مەملەكەتتىك ءتىلدى مەڭگەرۋگە نيەت بىلدىرگەندەر جينالادى.
جالپى, «رۋسسكايا وبششينانىڭ» وكىلدەرى ەرىكتى تۇردە قالانىڭ مادەني دامۋىنا ۇلەس قوسىپ كەلەدى. بىرلەستىك جانىنان قۇرىلعان انسامبل بار. سونداي-اق بىرلەستىك وكىلدەرى ەلورداداعى ۋنيۆەرسيتەتتەردىڭ بىرىندە قۇرىلعان ستۋدەنتتىك اسسامبلەيانىڭ مۇشەلەرىنە كەڭەس بەرىپ, جاستاردى قولداپ, ولارمەن بىرنەشە مادەني ءىس-شارا وتكىزگەن. وسىلاي قوعام ومىرىنە ارالاسىپ, بەلسەندىلىك تانىتقانى ءۇشىن پرەزيدەنت قاسىم-جومارت توقاەۆتىڭ العىسحاتىنا يە بولعان. ا.اۆدەەۆتىڭ ايتۋىنشا, بىرلەستىك وكىلدەرىنەن ەشقانداي جارنا الىنبايدى. ونى ءوزى باسشىلىققا كەلگەندە الدىرىپ تاستاپتى.
«ەلىمىز ەتنوسارالىق قارىم-قاتىناس ماسەلەلەرىن ءتيىمدى شەشىپ جاتىر دەپ سەنىممەن ايتا الامىز. مەن مۇنى قازاقستان حالقى اسسامبلەياسىندا قىزمەت ەتەتىن ادامنىڭ كوزقاراسىمەن ايتىپ وتىرمىن. ءبىزدىڭ قۇرعان مودەل بىرەگەي, قوعام ەرەكشە. وسىنى باعالاۋىمىز كەرەك», دەدى «رۋسسكايا وبششينا» باسشىسى.