دۇنيەجۇزىلىك دەنساۋلىق ساقتاۋ ۇيىمىنىڭ دەرەگىنە جۇگىنسەك, الەمدە ءار 45 سەكۋند سايىن ءبىر سۋيتسيد وقيعاسى تىركەلەدى. بۇل – ساعاتىنا 80, تاۋلىگىنە 2 مىڭعا جۋىق, ال جىلىنا 700 مىڭنان اسا ادام ءوز-وزىنە قول جۇمساپ, اجال قۇشادى دەگەن ءسوز. كەيىنگى 25 جىلدىڭ ىشىندە سۋيتسيد سانى ەداۋىر قىسقارعانىمەن, ءالى كۇنگە اسا وزەكتى پروبلەما كۇيىندە قالىپ وتىر.
ادام ءومىرىن جالماۋ تۇرعىسىنان سوعىس پەن كىسى ءولتىرۋ قىلمىسىنان اسىپ تۇسكەن بۇل كەسەلدىڭ سەبەپتەرى جايىندا ءسوز سويلەگەن ساراپشىلار پىكىرى سان-ساققا جۇگىرەدى. بىرەۋ وعان يتەرمەلەيتىن جايتتى ومىردەن تۇڭىلگەن جاننىڭ اينالاسىنان ىزدەسە, ەندى ءبىرى بار كىنارات ادامنىڭ ءوز ىشىندە ەكەنىن العا تارتادى. بالكىم بۇل ەكى پىكىردە دە شىندىقتىڭ تابى بار شىعار. قالاي دەسەك تە, ەلىمىزدە ءوز ءومىرىن ءوزى قيعاندار جۇرتتىڭ جاعاسىن ۇستاتىپ وتىر.
ەرەسەك ادام سۋيتسيد جاساسا, ونىڭ سەبەبىن ءومىردىڭ ءتۇرلى قيىنشىلىعىنان ىزدەۋگە بولاتىن شىعار. بالكىم, نەسيەسىن تولەي الماي, قارىزعا بەلشەسىنەن باتۋ, وتباسىلىق قيىندىقتار, اجىراسۋ, ماسكۇنەمدىك پەن ناشاقورلىققا سالىنۋ, ت.ب. ال ون ەكىدە ءبىر گ ۇلى اشىلماعان مەكتەپ وقۋشىلارىنىڭ ءوز-وزىنە قول جۇمساۋىن قالاي تۇسىنۋگە بولادى؟ ءومىردىڭ اششى-تۇششىسىن تاتىپ كورمەگەن, اكە-شەشەسىنىڭ اينالاسىنان شىقپاعان ءجاسوسپىرىمنىڭ دۇنيەدەن باز كەشۋىنە نە سەبەپ؟ بۇل ماسەلەنىڭ شىعۋ توركىنى تەرەڭدە ەكەنىن كورسەتەدى. اتاپ ايتقاندا, ونىڭ ءتۇپ-تۇقيانىن وتباسىنداعى تاربيە مەن يماندىلىقتىڭ السىزدىگىنەن, ىشكى رۋحاني شيەلەنىسىنەن ىزدەگەن ءجون سەكىلدى.
بۇگىندە ءبىز بەتپە-بەت كەلىپ وتىرعان اۋىر شىندىقتىڭ ءبىرى – وتباسىندا اتا-انا مەن بالا اراسىنداعى بايلانىستىڭ ءۇزىلۋى. جۇمىسباستى اكە-شەشەنىڭ بالاعا قارايتىن شاماسى جوق, ولار ءوز ىسىمەن الەك. ال بالا ۇلكەننىڭ مەيىرىمى مەن نازارىنان تىس قالعاندىقتان, ءوزىن جالعاندا جاناشىرى جوق جالعىز ادامداي سەزىنىپ, الدىنان شىققان ءاربىر قيىندىقتى ءتۇپسىز تراگەديا دەپ قابىلدايدى. دەپرەسسياعا تۇسەدى, ومىردەن تۇڭىلەدى. وعان قولداۋ بولار اتا-انانىڭ كوڭىلى – دالادا.
مامانداردىڭ ايتۋىنشا, ومىردە وڭ-سولىن ەندى تانىپ كەلە جاتقان جاسوسپىرىمگە اكە-شەشە مەن ۇلكەندەردىڭ قولداۋى اۋاداي قاجەت. سونىڭ ىشىندە رۋحاني قولداۋ – يماندىلىق تاربيەنىڭ ورنى ايرىقشا. بۇل – ۇلى يماندى, قىزى يبالى بولىپ ءوسۋىن قالايتىن ءاربىر شاڭىراقتان تابىلۋعا ءتيىس تاربيە. ويتكەنى جاستايىنان ادامگەرشىلىكتىڭ اردا قاسيەتىن بويىنا سىڭىرگەن بالا مىنەزى كوركەم بولۋمەن قاتار, ءومىردىڭ قيىنشىلىقتارىنا ءتوزىمدى كەلەدى. اقىل كىرە باستاعان شاعىنان بالانىڭ ءومىر تۋرالى تۇسىنىگىن قالىپتاستىرۋ, جاقسى امالداردىڭ قايىرى, جامان ىستەردىڭ سۇراۋى بولاتىنىن ۇعىندىرۋدىڭ ماڭىزى زور.
ءدىنتانۋشى ىسقاق ءابدىراحمانوۆتىڭ ايتۋىنشا, ەڭ الدىمەن اتا-انا مەن بالا اراسىنداعى كوركەم قاتىناس ۇزىلمەي, ولارعا ءومىردىڭ كەرەمەت ساتتەرى جايىندا ءجيى ايتىپ وتىرۋ كەرەك. جاراتىلىستاعى كوز جاۋىن الار تابيعي قۇبىلىستار, ولاردىڭ شىعۋ تەگى, ومىردەگى اسەرلى وقيعالار تۋرالى اڭگىمە قوزعالسا, جاس بالا قيالعا بەرىلىپ, ءوزى-اق كوز الدىنا كەرەمەت ءومىردى ەلەستەتىپ, الدىنا جارقىن ماقسات قويا بىلەدى.
«ەسى كىرگەن بالاعا ادامنىڭ ءوز-وزىنە قول جۇمساۋى ۇلكەن كۇنا ەكەنىن قۇران اياتتتارى مەن حاديستەر نەگىزىندە دالەلدەۋ دۇرىس بولماق. قۇراندا ء«وز قولدارىڭمەن وزدەرىڭە قاۋىپ توندىرمەڭدەر» دەلىنگەن. ومىردە باسىنا تۇسكەن بالەكەتتەن ءولىم ارقىلى وڭاي قۇتىلامىن دەۋ تۋرا جولدان اداستىراتىنىن, بۇل اللانىڭ ىسىنە قارسى شىعۋمەن پارا-پار ەكەنىن, سول ءۇشىن قاندايدا ىسكە باراردا الدىمەن ساۋ اقىلعا سالۋ قاجەت ەكەنىن ايتىپ ءتۇسىندىرۋ كەرەك. مۇنىڭ ءبارىن بالاعا قاراپايىم تىلمەن جەتكىزىپ, يماني تاربيە بەرۋ – اتا-اناعا مىندەت. ءاربىر ىستەلگەن ارەكەت ءۇشىن جاۋاپكەرشىلىك بولاتىنىن سەزىنگەن جاسوسپىرىمدە ءوز-وزىنە قول جۇمساۋعا دەگەن نيەت بولمايدى. جۇرەگىندەگى يمانى كۇنالى ىستەن قورعاپ تۇرادى. اقىلدى تاياقپەن ميعا قوندىرۋ مۇمكىن ەمەس. بالامەن دوسپەن سىرلاسقانداي تۇششىمدى اڭگىمە وربىتكەن ماڭىزدى», دەيدى ى.ءابدىراحمانوۆ.
ال جاستايىنان يماندىلىق تاربيە العان سانالى پەندە باسىنا كەلەتىن ءتۇرلى جاعىمسىز ويدىڭ ءبارى ىزگى جولدان تايدىرۋعا تىرىسقان ءىبىلىستىڭ ايلاسى مەن تۇزاعى ەكەنىن جاقسى بىلەدى دە, تيىسىنشە بۇل ونى سۋيتسيد سەكىلدى قاتە قادام جاساۋدان تىياتىنىن ايتادى.
وسى ورايدا سۋيتسيد جاساۋدىڭ دىنىمىزدەگى ۇكىمى جايىندا ايتا كەتكەن ورىندى بولار. بۇل تۋرالى قازاقستان مۇسىلماندارى ءدىني باسقارماسى شاريعات جانە ءپاتۋا ءبولىمى ارنايى ءپاتۋا شىعارعان. وندا ادام بالاسىنىڭ ءوز-وزىنە قول جۇمساۋى ادامدىق تۇرعىدان دا, ءدىن تۇرعىسىنان دا ۇلكەن كۇنا ەكەنى ايتىلادى.
«اللا تاعالا قاسيەتتى قۇراندا: «...ءوز-وزدەرىڭدى ولتىرمەڭدەر. راسىندا, اللا سەندەرگە ەرەكشە مەيىرىمدى», دەگەن... وزىنە قول جۇمساعان كىسى اۋىر كۇناعا باتقانىمەن, دىننەن شىقپايدى. عۇلامالاردىڭ كوپشىلىگى ءوز-ءوزىن ولتىرگەن ادامنىڭ جانازاسى وقىلادى دەپ ءپاتۋا بەرگەن. الايدا مۇنداي جاعدايدا كۇنانىڭ اۋىرلىعىن ءبىلدىرۋ ءارى باسقالارعا ساباق بولۋ ماقساتىندا جانازانى ءمۇفتي, ءدىن عالىمدارى, يمامدار ەمەس, جەرگىلىكتى يمامنىڭ ۇيعارىمىمەن جانازا شارتتارىن بىلەتىن باسقا كىسىلەردىڭ شىعارعانى ءجون», دەلىنگەن ءپاتۋادا.
ءسوز سوڭىندا ءبىزدىڭ ءدىنىمىز ادام بالاسىن قورقىتۋشى ەمەس, ەڭ الدىمەن جاقسىلىققا تالپىندىرىپ, دۇنيەنىڭ قيىندىعى مەن سىناعىنا شىداپ, سابىر قىلعانداردى جاقسىلىقپەن قۋاندىرۋشى ءارى جانناتپەن سۇيىنشىلەۋشى ەكەنىن ۇمىتپاعان ابزال. قاسيەتتى قۇراندا: «كىم اللادان شىن قورىقسا, اللا ونى كەز كەلگەن قيىندىقتان قۇتقارادى جانە كۇتپەگەن جەردەن ريزىق-نەسىبە بەرەدى», دەلىنگەن.
ىزگى امال جاساعانداردىڭ ومىردە قۋانىشقا كەنەلەتىنى, قانداي قيىندىققا تاپ بولسا دا, ونى وتكىنشى سىناق دەپ قابىلداپ, مويىماعانداردىڭ جولى اشىلاتىنى, وزگەگە مەيىرىمدىلىك كورسەتكەندەردىڭ ءوزى دە اينالاسىنان مەيىرىم كورەتىنى, ت.ب. حاديستەردە دە كەڭىنەن بايان ەتىلەدى. مۇنىڭ ءبارى يماني تاربيەنىڭ تىرەگى, ءجاسوسپىرىمدى سۋيتسيد سەكىلدى جاعىمسىز ىستەن ساقتايتىن ونەگەلىك وزەگى ەكەنى ءسوزسىز.