تۇركيانىڭ مادەني استاناسى ىستانبۇل قالاسىندا حالىقارالىق تۇركسوي ۇيىمى مەن تۇركيا تەاترلار قاۋىمداستىعى جانە «تەاتر» گازەتىنىڭ ۇيىمداستىرۋىمەن تۇركى ەلدەرىنىڭ تەاتر قايراتكەرلەرىن ماراپاتتاۋ ءراسىمى ءوتتى.
القالى جيىنعا تۇركيانىڭ بەلدى دە بەلگىلى تەاتر ساڭلاقتارى مەن دۇنيەنىڭ ءتورت بۇرىشىنان قۇرمەتتى قوناقتار قاتىستى. تەاتر ونەرىندەگى ءار اتالىم بويىنشا جەڭىمپازدار انىقتالىپ, جۇلدەلەر تاپسىرىلدى. حالىقارالىق مارتەبەلى بايقاۋدىڭ قازىلار شەشىمىمەن قازاقستاننىڭ ەڭبەك سىڭىرگەن قايراتكەرى, جازۋشى-دراماتۋرگ دۋمان رامازانعا «تۇركى الەمىنىڭ ەڭ ۇزدىك دراماتۋرگى» اتاعى بەرىلدى. ماراپاتتى سالتاناتتى جيىندا حالىقارالىق تۇركسوي ۇيىمىنىڭ باس حاتشىسى سۇلتان راەۆ پەن «تەاتر» ەلارالىق باسىلىمىنىڭ باس رەداكتورى نۇرحان ۋسلۋ تاپسىردى.
«دۋمان رامازاننىڭ درامالارىمەن بۇرىننان تانىسپىن. درامانىڭ قىر-سىرىن جەتىك بىلەتىن, وي-ورامىن تەرەڭدەتكەن مىقتى دراماتۋرگ. تاريحي تاقىرىپتا دا, قازىرگى زامان تۋرالى دا ابدەن زەرتتەپ-ءبىلىپ جازادى. ونىڭ سوڭعى جىلدارى ۇلتتىق ساحنادا جاساعان تاريحي پولوتنولارى بۇگىنگى تەاتردىڭ بيىگىنە سايما-ساي. «كەرەي - جانىبەك», «ابىلاي حاننىڭ ارمانى», «جوشى حان» جانە باسقا دا تاريحي درامالارىندا ۇلتتىق قۇندىلىقتار مەن داستۇرلەرگە دەگەن تاريحي كوزقاراستى قاپىسىز بەينەلەگەن. قالەكي ساحناسىندا قويىلعان «جوشى حان» تاريحي دراماسى قازاق مادەنيەتىندەگى جاڭا كەزەڭنىڭ باستالعانىن پاش ەتەدى», دەدى سۇلتان راەۆ.