بەلارۋس رەسپۋبليكاسىنىڭ ورتالىق سايلاۋ كوميسسياسى جەكسەنبىدە وتكەن پرەزيدەنت سايلاۋىنىڭ الدىن الا قورىتىندىسىن جاريالادى. سايلاۋشىلاردىڭ باسىم بولىگى الەكساندر لۋكاشەنكوعا داۋىس بەرگەن.
سايلاۋدا ا.لۋكاشەنكو – 86,82 پايىز, بەلارۋس كوممۋنيستىك پارتياسى ورتالىق كوميتەتىنىڭ ءبىرىنشى حاتشىسى سەرگەي سىرانكوۆ – 3,21 پايىز, بەلارۋس ليبەرال-دەموكراتيالىق پارتياسى توراعاسى ولەگ گايدۋكەۆيچ – 2,02 پايىز, ۇلتتىق جيىننىڭ بۇرىنعى دەپۋتاتى اننا كانوپاتسكايا – 1,86 پايىز جانە بەلارۋستىڭ ەڭبەك جانە ادىلەت پارتياسىنىڭ توراعاسى الەكساندر حيجنياك 1,74 پايىز داۋىس جيناعان.
كانديداتتاردىڭ بارلىعىنا قارسى داۋىس بەرگەندەر 3,6 پايىزدى قۇراعان. جالپى سايلاۋعا حالىقتىڭ 85,7 پايىزى قاتىسقان. سايلاۋدىڭ ناقتى قورىتىندىسى 3 اقپاندا جاريالانادى.
سايلاۋعا تەك بەلارۋستا تۇراتىن ازاماتتار قاتىسقان, شەتەلدە سايلاۋ ۋچاسكەلەرى اشىلعان جوق.
قازاقستان رەسپۋبليكاسى پارلامەنتى سەناتىنىڭ دەپۋتاتتارى نۇرلان بەكنازاروۆ پەن ساكەن ارۋباەۆ حالىقارالىق بايقاۋشىلار رەتىندە بەلارۋس رەسپۋبليكاسىنداعى پرەزيدەنت سايلاۋىن مونيتورينگ جاساۋعا قاتىستى. نۇرلان بەكنازاروۆ سايلاۋدى بايقاۋعا بەلارۋس رەسپۋبليكاسىنىڭ ۇلتتىق جينالىسىنىڭ شاقىرۋىمەن, ال ساكەن ارۋباەۆ تمد پارلامەنتارالىق اسسامبلەياسىنىڭ اياسىندا قاتىستى.
«بەلارۋس رەسپۋبليكاسىنداعى پرەزيدەنت سايلاۋىن ۇيىمداستىرۋ دەڭگەيىنىڭ جوعارى ەكەنىنە, حالىقارالىق ستاندارتتارعا سايكەستىگىنە كۋا بولدىق. سايلاۋ ۇدەرىسىنىڭ اشىقتىعى مەن ايقىندىعى ەلدەگى دەموكراتيالىق ينستيتۋتتاردىڭ جەتىلگەندىگىن بىلدىرەدى. مەنىڭ ويىمشا, جاڭادان سايلانعان پرەزيدەنت ءبىزدىڭ مەملەكەتتەر اراسىنداعى ىنتىماقتاستىقتى نىعايتۋ باعىتىن جالعاستىرادى, ال ەكىجاقتى قارىم-قاتىناس ءوزارا قۇرمەت پەن سەنىم نەگىزىندە ودان ءارى دامي تۇسەدى», دەپ اتاپ ءوتتى ن.بەكنازاروۆ.
دەپۋتاتتار ساپار بارىسىندا داۋىس بەرۋ ۋچاسكەلەرىن, ونىڭ ىشىندە ورتالىقتان الىس اۋداندارداعى ۋچاسكەلەردى دە ارالادى.
«سايلاۋ ۇدەرىسى جوعارى دەڭگەيدە ۇيىمداستىرىلعانىن كورىپ وتىرمىز. ازاماتتارعا ءوز ەركىن ەش كەدەرگىسىز بىلدىرۋگە بارلىق جاعداي جاسالعان. بۇل سايلاۋعا جانە ەلدەگى دەموكراتيالىق ۇدەرىستەرگە دەگەن سەنىمدى نىعايتۋعا ىقپال ەتەدى», دەدى سەناتور س.ارۋباەۆ.