ءماجىلىس سپيكەرى ەرلان قوشانوۆتىڭ توراعالىعىمەن جالپى وتىرىس ءوتتى. جيىندا دەپۋتاتتار دەنساۋلىق ساقتاۋ سالاسىنداعى نورمالاردىڭ ارتىق (شامادان تىس) زاڭنامالىق رەگلامەنتتەلۋىن بولعىزباۋ تۋرالى زاڭ جوباسىن ءبىرىنشى وقىلىمدا ماقۇلدادى. سونداي-اق تۇركىستان قالاسىنىڭ ەرەكشە مارتەبەسى تۋرالى زاڭ مەن وعان ىلەسپە تۇزەتۋلەردى جانە پوشتا تۋرالى قۇجاتتى ەكىنشى وقىلىمدا قابىلدادى. بۇعان قوسا ەكى قۇجاتتى راتيفيكاتسيالادى.
دەنساۋلىق ساقتاۋ ءمينيسترى اقمارال ءالنازاروۆا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ سالاسىنداعى نورمالاردىڭ ارتىق (شامادان تىس) زاڭنامالىق رەگلامەنتتەلۋىن بولعىزباۋ ماسەلەلەرى بويىنشا وزگەرىستەر ەنگىزۋ تۋرالى» زاڭ جوباسى پرەزيدەنتتىڭ «مەملەكەتتىك اپپارات قىزمەتىن بيۋروكراتيالاندىرۋ جونىندەگى شارالار تۋرالى» قاۋلىسى نەگىزىندە ازىرلەنگەنىن ايتتى. تۇزەتۋلەر ارتىق اكىمشىلىك رەتتەۋدى ازايتۋعا مۇمكىندىك بەرەدى.
– وسىلايشا, مەملەكەتتىك ورگاننىڭ شەشىمدەردى قابىلداۋ جانە قابىلداۋ ۇدەرىسىن جەدەلدەتۋ, ونىڭ ىشىندە ءتيىستى ءتارتىپتى ايقىندايتىن نورماتيۆتىك قۇقىقتىق اكتىلەردى ازىرلەۋ كەزىندە وكىلەتتىكتەرىن كەڭەيتۋ ارقىلى اسا ماڭىزدى قوعامدىق قاتىناستاردى جەدەل جۇزەگە اسىرۋ مۇمكىندىگى پايدا بولادى. دەنساۋلىق ساقتاۋ سالاسىنداعى ارتىق اكىمشىلىك رەتتەۋدى قىسقارتۋعا جانە دەنساۋلىق ساقتاۋ سالاسىنداعى راسىمدەردى جەڭىلدەتۋگە باعىتتالعان نورمالاردى دەبيۋروكراتيزاتسيالاۋعا جول اشىلادى, – دەدى مينيستر.
مەملەكەتتىك ورگاننىڭ ارنايى قۇزىرەتتەرى مەن وزگە دە ناقتىلايتىن نورمالارى بۇدان بىلاي زاڭعا تاۋەلدى اكتىلەر دەڭگەيىندە بەلگىلەنەدى, مەملەكەتتىك ورگانداردىڭ زاڭنامالىق نورمالاردى ىسكە اسىرۋ جونىندەگى وكىلەتتىكتەرى جازىلادى.
دەپۋتاتتار تۇركىتىلدەس مەملەكەتتەردىڭ ىنتىماقتاستىق كەڭەسىن قۇرۋ تۋرالى ناحچىۆان كەلىسىمىنە وزگەرىستەر ەنگىزۋ جونىندەگى حاتتامانى راتيفيكاتسيالادى. كەلىسىمگە مەملەكەت باسشىلارى 2022 جىلى 11 قاراشادا سامارقاند قالاسىندا قول قويعان ەدى. سىرتقى ىستەر ءمينيسترىنىڭ ورىنباسارى الىبەك باقاەۆ نەگىزگى كەلىسىمگە 10 وزگەرىس ەنگىزۋ قاراستىرىلعانىن, ونىڭ ءبىرى ۇيىمنىڭ اتاۋى مەن نىسانىن وزگەرتۋگە باعىتتالعانىن اتاپ ءوتتى.
– حاتتامانىڭ باپتارىندا نەگىزگى كەلىسىمنىڭ اتاۋىن «تۇركى مەملەكەتتەرى ۇيىمىن قۇرۋ تۋرالى ناحچىۆان كەلىسىمى» دەپ وزگەرتۋ, «تۇركى مەملەكەتتەرى ۇيىمى» دەپ اتالاتىن تولىققاندى حالىقارالىق ۇيىم قۇرۋ كوزدەلگەن. سونداي-اق تۇركى ينتەگراتسياسى شەڭبەرىندەگى ۇيىمداردى ەكى ساناتقا ءبولۋ قاراستىرىلادى: ساباقتاس ورگاندار رەتىندە تۇركسوي مەن تۇركپا ايقىندالىپ, ۇلەستەس ۇيىمدار رەتىندە تۇركى اكادەمياسى مەن تۇركى مادەنيەتى جانە مۇراسى قورى كورسەتىلدى, – دەدى ءا.باقاەۆ.
ءماجىلىس دەپۋتاتى يۋليا كۋچينسكايا حاتتامانى راتيفيكاتسيالاۋ قازاقستان رەسپۋبليكاسى ءۇشىن باۋىرلاس حالىقتارمەن ءوزارا ءتيىمدى قارىم-قاتىناستىڭ جانە ەلىمىزدىڭ تۇركى الەمىندەگى كوشباسشىلىق ۇستانىمىن نىعايتۋدىڭ بەرىك نەگىزى بولاتىنىنا نازار اۋداردى.
بۇدان سوڭ دەپۋتاتتار 2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا ەۋرازيالىق ەكونوميكالىق وداققا مۇشە مەملەكەتتەردىڭ اراسىندا كەدەندىك اكەلۋ باجدارىنىڭ سومالارىن اۋدارۋعا قاتىستى بولىكتە وزگەرىستەر ەنگىزۋ تۋرالى حاتتامانى راتيفيكاتسيالادى.
ۇلتتىق بانك توراعاسى تيمۋر سۇلەيمەنوۆ حاتتامادا ەۋرازيالىق ەكونوميكالىق وداق تۋرالى شارتقا رەسەي فەدەراتسياسىمەن جانە بەلارۋس رەسپۋبليكاسىمەن كەدەندىك باجدار بويىنشا ەسەپ ايىرىسۋدى ەكى جىل مەرزىمىنە رەسەي رۋبلىمەن اۋدارۋ جونىندەگى وزگەرىستەر ەنگىزىلگەنىنە توقتالدى. دەپۋتات مارحابات جايىمبەتوۆ ءوز بايانداماسىندا ۋاقىتشا مەحانيزم ەنگىزۋدىڭ سەبەبى رەسەي مەن بەلارۋسپەن اقش دوللارىمەن ەسەپ ايىرىسۋدان باس تارتۋ ەكەنىن اتاپ ءوتتى. ۋاقىتشا وزگەرىستەر ەنگىزۋ ەاەو ەلدەرىنىڭ بيۋدجەتتەرىنە كەدەن باجدارىن ۇزدىكسىز اۋدارۋدى قامتاماسىز ەتۋگە مۇمكىندىك بەرەدى.
جالپى وتىرىستا «تۇركىستان قالاسىنىڭ ەرەكشە مارتەبەسى تۋرالى» زاڭ مەن وعان ىلەسپە تۇزەتۋلەر ەكىنشى وقىلىمدا قابىلداندى. زاڭ مەملەكەت باسشىسىنىڭ ءتيىستى تاپسىرماسىن ورىنداۋ ماقساتىمەن ازىرلەنگەن.
– تۇركىستان قالاسىنا ەرەكشە مارتەبە بەرۋدىڭ نەگىزگى ماقساتتارى, مىندەتتەرى مەن قاعيداتتارى ايقىندالادى, تۇركىستان قالاسىنىڭ اۋماعىندا تاريح جانە مادەنيەت ەسكەرتكىشتەرىن قورعاۋ قامتاماسىز ەتىلەدى; ورتالىق مەملەكەتتىك ورگانداردىڭ, سونداي-اق تۇركىستان قالاسىنىڭ جەرگىلىكتى وكىلدى جانە اتقارۋشى ورگاندارىنىڭ وكىلەتتىكتەرىن قايتادان قاراستىرىپ, جاڭا قۇزىرەت بەرىلەدى, – دەدى جۇمىس توبىنىڭ جەتەكشىسى تەمىر قىرىقباەۆ.
ىلەسپە تۇزەتۋلەردە ساۋلەت, قۇرىلىس جانە قالا قۇرىلىسى قىزمەتىن نورماتيۆتىك رەتتەۋگە جانە تاريحي-مادەني مۇرا ەسكەرتكىشتەرىن قورعاۋعا باعىتتالعان 1 كودەكس پەن 5 زاڭعا وزگەرىستەر مەن تولىقتىرۋلار ەنگىزىلەدى.
ءماجىلىس «پوشتا تۋرالى» زاڭعا پوشتا بايلانىسى نارىعىن دامىتۋعا باعىتتالعان پارلامەنتتىك تۇزەتۋلەردى ەكىنشى وقىلىمدا قابىلدادى. دەپۋتات ەكاتەرينا سمىشلياەۆا تسيفرلىق تەحنولوگيالار ارقىلى ءتيىستى پين-كود نەمەسە كۋار-كود بولعان كەزدە ءۇشىنشى تۇلعالارعا پوشتانى قابىلداپ الۋ مۇمكىندىگى بەرىلەتىنىن ايتتى. سونىمەن قاتار بۇل تاۋاردى ماركەتپلەيستەردەن پوشتا بولىمشەسىنە جانە ۇيگە جەتكىزۋدى جەڭىلدەتەدى.
– جوبادا سالەمدەمەلەردى قابىلداۋ ءۇشىن پوشتاماتتاردى ورنالاستىرۋ جانە پايدالانۋ ءتارتىبى كوزدەلەدى. پوشتا ينفراقۇرىلىمىن ساقتاۋ بويىنشا نورمالار قابىلداندى. پوشتا فيليالدارى جابىلعان كەزدە وپەراتور بۇل تۋرالى جەرگىلىكتى اتقارۋشى ورگاندارعا جابىلعانعا دەيىن 3 اي بۇرىن حابارلاۋعا ءتيىس. ۇلتتىق پوشتا وپەراتورى ءدارى-دارمەكتەر مەن مەديتسينالىق بۇيىمداردى, جەتكىزۋمەن جانە ساقتاۋمەن اينالىسا الادى, – دەدى جۇمىس توبىنىڭ جەتەكشىسى ە.سمىشلياەۆا.
سونداي-اق جەكە تۇلعالارعا مەملەكەتتىك قولداۋ شارالارىن ۇسىنۋعا ارنالعان «الەۋمەتتىك اميانعا» قۇقىقتىق مارتەبە بەرىلەدى. جيىندا ءماجىلىس اڭشىلىق سالاسى جانە جانۋارلار دۇنيەسىن ساقتاۋ ماسەلەلەرى تۋرالى زاڭ جوباسى مەن وعان ىلەسپە تۇزەتۋلەردى جۇمىسقا قابىلدادى.
ءارى قاراي دەپۋتاتتار مەملەكەتتىك ورگاندارعا وزەكتى الەۋمەتتىك-ەكونوميكالىق ماسەلەلەر بويىنشا 13 دەپۋتاتتىق ساۋال جولدادى.