مەملەكەت باسشىسىنا سەنىم جوعارى

قزسي زەرتتەۋىنە سۇيەنسەك, مەم­لەكەت باسشىسى قاسىم-جومارت تو­قاەۆقا حالىقتىڭ 80,5 پايىزى سەنىم بىلدىرگەن. كەيىنگى جىلدارى بۇل كورسەت­كىش الەۋمەتتىك-ەكونوميكا­لىق قيىندىققا قاراماستان تۇراقتى تۇردە جوعارى بولىپ وتىر. «بۇل ازا­ماتتاردىڭ كوشباسشىنى جانە ونىڭ شەشىمدەرىن قولداۋعا دايىن ەكەنىن كورسەتەدى», دەيدى ينستيتۋت ساراپشىلارى.

قاراشا ايىندا جۇرگىزىلگەن ساۋال­ناماعا سايكەس قاتىسۋشىلاردىڭ 77,7 پايىزى ەل باسشىلىعىنىڭ سايا­سي باعىتىن قولداعان. سونداي-اق رەسپون­دەنتتەردىڭ 46 پايىزى ازاماتتاردى بىرىكتىرەتىن قۇندىلىق رەتىندە ەلدىڭ تولقۇجاتى مەن ازاماتتىعىن اتاعان.

– ساۋالناما دەرەكتەرى كورسەتكەن­دەي, حالىقتىڭ باسىم كوپشىلىگى قازاق­ستاندى ۇلتتىڭ ازاماتتىلىعى, ياعني تۇلعانىڭ ناقتى مەملەكەتپەن بەرىك قۇقىقتىق بايلانىسى باسىم ءبىرتۇتاس ۇلت رەتىندە قاراستىرادى. وسىلايشا, ۇلتتىق بىرەگەيلىك قازاقستاننىڭ مادەني ارتۇرلىلىگىنىڭ بىرىكتىرۋشى فاكتورى بولا وتىرىپ, مەملەكەتتەگى سەنىم مەن ىنتىماقتاستىقتىڭ وسۋىنە ىقپال ەتەدى, – دەيدى پرەزيدەنت جانىنداعى قسزي ساياسي زەرتتەۋلەر ءبولىمىنىڭ باس ساراپشىسى ايگەرىم ءابدىراشيتوۆا.

سونداي-اق الەۋمەتتىك ساۋالناما ناتيجەسى كورسەتكەندەي, تۇرعىندار بيىلعى جىلدىڭ جايلى بولعانىن ايتقان. حالىقتىڭ تورتتەن ءبىر بولىگى (25,1 پايىز) جىل «وتە تابىستى بولدى», ال تەڭ جارتىسى (52,3 پايىز) «جالپى جاقسى بولدى» دەپ جاۋاپ بەرگەن. «حالىقتىڭ 77,4 پايىزى كەلەر جىلدان كوپ جاقسىلىق كۇتەدى, جاۋاپتارىنىڭ كوبى وپتيميستىك كوزقاراستى كورسەتىپ وتىر», دەدى قسزي باس عىلىمي قىزمەت­كەرى ايگۇل زابيروۆا.

ال ىشكى ساياسي سالاداعى ەڭ ماڭىزدى 3 وقيعانىڭ قاتارىنا رەسپوندەنتتەر ايەلدەردىڭ قۇقىقتارى مەن بالالار­دىڭ قاۋىپسىزدىگىن قامتاماسىز ەتۋ جونىندەگى زاڭدى قابىلداۋ اياسىندا بىرىڭعاي زاڭدى ونلاين پەتيتسيا ينس­تيتۋتىن ەنگىزۋدى, تۇرمىستىق زورلىق-زومبىلىقتى كريميناليزاتسيالاۋدى, سونداي-اق 6 قازاندا وتكەن اەس سالۋ بويىنشا جالپىحالىقتىق رەفەرەندۋمدى اتاپ كورسەتكەن.

– رەفەرەندۋم – ەلدە كەيىنگى بەس جىلدا بولعان ەلەۋلى وزگەرىستىڭ ءبىر ايعاعى, «حالىق ۇنىنە قۇلاق اساتىن مەملەكەت» ۇعىمىنىڭ ايقىن كورىنىسى. بۇكىلحالىقتىق داۋىس بەرۋ ەنەر­گەتيكالىق كەشەننىڭ دامۋ باعىتىن, اتوم ەنەرگەتيكاسىنىڭ بولاشاعىن جانە ونىڭ ەلىمىزدىڭ ەنەرگەتيكالىق تاۋەلسىزدىگىنە ىقپالىن ايقىندادى, – دەدى قزسي ستراتەگيالىق تالداۋ ءبولىمىنىڭ باسشىسى ەلنار بەرىكباەۆ.

ەلىمىزدىڭ ەكونوميكالىق سالاداعى جەتىستىكتەرى تۋرالى ايتا كەلە, قسزي ساراپشىلارى مەملەكەت باسشىسى جاڭا ەكونوميكالىق باعىت ۇسىن­عانىن اتاپ ءوتتى. وسى رەتتە ساراپشىلار ەكونوميكاداعى 3 باستى جە­تىستىك رەتىندە شاعىن جانە ورتا كا­سىپكەرلىكتى قولداۋ مەن دامىتۋدىڭ كەشەندى باعدارلاماسىن قابىلداۋ, مەملەكەتتىك ساتىپ الۋدىڭ جاڭا ەرەجە­لەرىن بەكىتۋ ارقىلى بيزنەسكە جاڭا «ەكونوميكالىق ليفتتەردى» قۇرۋ, سونداي-اق «ەكونوميكانى ىرىقتان­دىرۋ جونىندەگى شارالار تۋرالى» پرەزيدەنت جارلىعىنا قول قويۋدى كورسەتتى.

– ەلدىڭ ينفراقۇرىلىمىن دامىتۋ جوسپارىندا 204 جوبا بار. ەنەرگەتيكا سالاسىندا – 46, كولىك سالاسىندا – 59, سۋمەن جابدىقتاۋ جانە كاناليزاتسيا بو­يىنشا – 89, تسيفرلىق ينفراقۇرىلىم بويىنشا 10 جوبا قابىلداندى. ولاردى جۇزەگە اسىرۋ كەزىندە حالىقارالىق قارجى ۇيىمدارىمەن ءوزارا بايلانىس ماڭىزدى. وسى ورايدا دۇنيەجۇزىلىك بانك, ازيا دامۋ بانكى, ەۋروپالىق قايتا قۇرۋ جانە دامۋ بانكى, يسلام دامۋ بانكى, ەۋرازيالىق دامۋ بانكى, ت.ب. ۇيىمدارمەن ىنتىماقتاس­تىق جۇرگىزىلىپ جاتىر, – دەدى قسزي ديرەكتورىنىڭ ورىنباسارى نۇرلان ساقۋوۆ.

ينستيتۋت ساراپشىلارى قازاق­ستاننىڭ حالىقارالىق سالاداعى باس­تى جەتىستىگى رەتىندە حالىقارالىق ساراپشىلار قاۋىمداستىعى الدىندا ەلىمىزدىڭ «ورتا دەرجاۆا» رەتىندە ماقۇلدانۋىن اتاپ ءوتتى. بۇل ەلىمىزدىڭ جاھاندىق ۇدەرىستەردەگى ءرولىنىڭ ارتقانىن جانە ءتۇرلى كوپجاقتى فورماتتاردا شەشىم قابىلداۋعا ىقپال ەتۋ مۇمكىندىكتەرىنىڭ كەڭەيگەنىن كورسەتەدى. سونداي-اق مەملەكەت باسشىسىنىڭ نەگىزگى سەرىكتەس ەلدەرگە, ونىڭ ىشىندە قاتار, فرانتسيا, موڭعوليا, رەسەي, وزبەكستان, قىتاي جانە ازەربايجانعا جاساعان ساپارلارىن ەرەكشە اتاپ ءوتۋ قاجەت.

– بۇل ساپارلار ستراتەگيالىق سەرىك­تەستىكتى نىعايتۋعا ىقپال ەتىپ, ەلدىڭ كوپۆەكتورلى جانە تەڭگەرىمدى سىرتقى ساياساتقا بەيىلدىلىگىن تانىتتى جانە ەل ەكونوميكاسىن قايتا جانداندىرۋدىڭ باسىم باعىتتارىنىڭ ءبىرى شيكىزاتتىق ەمەس جانە وڭدەۋشى سالالاردى دامىتۋعا مۇمكىندىك بەردى, – دەدى ساراپشى سانات كوشكىمباەۆ.