استانادا وتكەن رەترو-فەستيۆال كەزىندە «بارىس ارەنا» سپورت كەشەنىندە 12 مىڭ ادام قازاقستان رەسپۋبليكاسىنىڭ مەملەكەتتىك ءانۇرانىن بىرگە ورىندادى, دەپ حابارلايدى Egemen.kz ەلوردا اكىمدىگىنىڭ ءباسپاسوز قىزمەتىنە سىلتەمە جاساپ.
اكىمدىكتىڭ مالىمەتىنشە, بۇل اسەرلى وقيعا ەل بىرلىگى مەن ءپاتريوتيزمنىڭ سيمۆولىنا اينالىپ, ءارتۇرلى جاستاعى كورەرمەندەردى بىرىكتىردى.
«بۇل جارقىن ءارى شابىتتاندىراتىن ءسات قاتىسۋشىلاردىڭ جۇرەگىندە ۇزاق ۋاقىت ەستە قالادى. ەلىمىزگە دەگەن ماقتانىش پەن ورتاق قۋانىش ءىس-شاراعا ەرەكشە كوڭىل-كۇي سىيلادى», دەلىنگەن حابارلامادا.
سونىمەن قاتار ەلوردادا تاۋەلسىزدىك كۇنى قۇرمەتىنە وراي قالانىڭ ورتالىق كوشەلەرىندەگى LED-ەكرانداردا, «قتج» عيماراتىنىڭ, ەكسپو كەشەنىنىڭ مەديافاسادتارىندا جانە «شولۋ دوڭگەلەگىندە» قازاقستان رەسپۋبليكاسىنىڭ مەملەكەتتىك تۋى بەينەلەندى.