ەلوردادا مەملەكەت جانە قوعام قايراتكەرى نۇرلان بالعىمباەۆ اتىنداعى كوشە پايدا بولدى, دەپ حابارلايدى Egemen.kz ەلوردا اكىمدىگىنىڭ ءباسپاسوز قىزمەتىنە سىلتەمە جاساپ.
اكىمدىكتىڭ مالىمەتىنشە, جاڭا كوشە استانانىڭ ەسىل اۋدانىندا ورنالاسقان, ونىڭ ۇزىندىعى 1100 مەتردى قۇرايدى. تۇركىستان كوشەسىنەن ۇلى دالا داڭعىلىنا دەيىن سوزىلادى.
«بۇگىن ەلوردادا مەملەكەت جانە قوعام قايراتكەرى نۇرلان بالعىمباەۆ اتىنداعى كوشە پايدا بولدى جانە ەسكەرتكىش تاقتا ورناتىلدى», دەپ حابارلايدى قالا اكىمدىگىنىڭ ءباسپاسوز قىزمەتى.
سالتاناتتى شاراعا قالا اكىمدىگىنىڭ, ەنەرگەتيكا مينيسترلىگىنىڭ وكىلدەرى, مۇناي-گاز سالاسىنىڭ ارداگەرلەرى, زيالى قاۋىم, سونداي-اق نۇرلان بالعىمباەۆتىڭ وتباسى مەن تۋعان-تۋىستارى قاتىستى.
ەنەرگەتيكا ۆيتسە-ءمينيسترى الىبەك جاماۋوۆ بالعىمباەۆتىڭ قازاقستانداعى مۇناي-گاز سالاسىن دامىتۋعا سىڭىرگەن ەڭبەگىن جانە ونىڭ مۇناي-گاز كەن ورىندارىن بارلاۋداعى, زاماناۋي تەحنولوگيالاردى ەنگىزۋدەگى, كادرلار دايارلاۋداعى جانە جاڭا كاسىپورىنداردى قۇرۋداعى باستى ءرولىن اتاپ ءوتتى.
استانا قالاسى اكىمىنىڭ ورىنباسارى ەسەت بايكەن بۇل وقيعانىڭ تاريحي ماڭىزىنا توقتالدى.
«نۇرلان وتەپ ۇلى ەل ۇكىمەتىن باسقارعان كەزدە كوپتەگەن يگى رەفورمالاردى قولعا الىپ, جۇمىستى جاقسارتۋعا كوپ ۇلەس قوستى. ال مۇناي-گاز سالاسىنا جەتەكشىلىك ەتكەن جىلدارى ەلدىڭ ينۆەستيتسيالىق الەۋەتىن كوتەرىپ, سالاعا تىڭ سەرپىن بەردى. ول سانالى عۇمىرىن ەل يگىلىگىنە, مۇناي-گاز سالاسىن دامىتۋعا ارناپ, ابىرويمەن عۇمىر كەشتى. اتقارعان كوپ ءىسى تاۋەلسىز ەل تاريحىنا التىن ارىپپەن جازىلعانى ءسوزسىز. ەلگە قىزمەت ەتكەن قايراتكەرلەردى ۇلىقتاۋ, جاس ۇرپاققا ناسيحاتتاۋ – قاجەت ءىس. وسى ارقىلى مىقتى ازاماتتار بۋىنىن تاربيەلەي الامىز. نۇرلان وتەپ ۇلىنىڭ ەسىمى ەشقاشان ۇمىتىلمايدى دەپ سەنىممەن ايتا الامىن», دەدى ەلوردا اكىمىنىڭ ورىنباسارى ەسەت بايكەن.
ايتا كەتەيىك, ەلورداداعى ءبىر كوشەگە بالعىمباەۆ ەسىمىن بەرۋ مەملەكەت باسشىسىنىڭ تاپسىرماسى ەدى.
نۇرلان بالعىمباەۆ 1997-1999 جىلدار ارالىعىندا قازاقستاننىڭ پرەمەر-ءمينيسترى بولدى. ودان كەيىن «قازاقويل» ۇلتتىق مۇناي-گاز كومپانياسى» جاق جانە «قازاقستان مۇناي-ينۆەستيتسيالىق كومپانياسى» اق پرەزيدەنتى بولدى.
وسىدان كەيىن بالعىمباەۆ 2009 جىلعا دەيىن قر تۇڭعىش پرەزيدەنتىنىڭ كەڭەسشىسى قىزمەتىن اتقاردى. سودان كەيىن ول يتالياندىق «Eni» مۇناي-گاز كومپانياسىمەن جوبالاردى جۇزەگە اسىرۋ جونىندەگى ۇيىمنىڭ باس ديرەكتورى قىزمەتىنە تاعايىندالدى. قازاقستاننىڭ بۇرىنعى پرەمەر-ءمينيسترى 2015 جىلدىڭ قازان ايىندا قايتىس بولدى.