قازىرگى ينتەرنەت زامانىندا اقپاراتتاردى باقىلاۋ وڭايعا سوقپاي تۇر. اۋقىمى كەڭەيگەن سايىن زياندى ماتەريالداردىڭ سانى كوبەيىپ بارادى. ال بىزگە بالالاردى جەلىدەگى قاۋىپتەن قورعاۋ ماڭىزدى. وسىعان وراي, اتا-انالار بالالارىنىڭ قاۋىپسىزدىگىن ينتەرنەتكە شەكتەۋ قويۋ ارقىلى ساقتاي الادى.
مەملەكەتتىك ورگاندار بالالار مەن جاسوسپىرىمدەردى ينتەرنەتتەن كەلەر قاۋىپتەن ساقتاۋعا بارلىق قاجەتتى شارا قابىلداپ جاتىر. دەگەنمەن الەمجەلىدەگى زاڭسىز ارەكەتتەرگە مەملەكەتتىك قۇرىلىمداردىڭ كۇشى جەتەر ەمەس. سوندىقتان باق سالاسىنداعى زاڭنامالىق تالاپتاردىڭ ورىندالۋىن قاداعالايتىن مادەنيەت جانە اقپارات مينيسترلىگى اتا-انالارعا بالالارىنىڭ ينتەرنەتتەگى قاۋىپسىزدىگىن قاداعالاۋعا شاقىرىپ, پايدالى قوسىمشالاردى ۇسىنادى. قوسىمشالار – زاڭسىز كونتەنتكە قول جەتكىزۋدى شەكتەۋگە, ونلاين-ارەكەتتەردى قاداعالاۋعا جانە قۇرىلعىلاردى پايدالانۋ ۋاقىتىن باقىلاۋعا كومەكتەسەدى.
ماسەلەن, Kaspersky Safe Kids قوسىمشاسى سايتتاردى بۇعاتتاپ, گەولوكاتسيا, بالانىڭ بەلسەندىلىگى تۋرالى ەسەپتىك اقپارات بەرەدى. اتالعان قوسىمشانىڭ سايتىندا اتا-انالارعا ءتۇرلى كەڭەس بار. مىسالى, 3-5 ارالىعىندا بالالار ينتەرنەتتەگى كونتەنت, ويىندارمەن العاش تانىسا باستايدى. وسى كەزدە ولاردى تسيفرلىق قاۋىپسىزدىكپەن قامتۋ قاجەت. Kaspersky Safe Kids ماماندارى YouTube-تە قاۋىپسىز ىزدەۋ ارقىلى بالالاردى قاجەتسىز مازمۇننان قورعاۋدى ۇسىنادى. سونداي-اق قۇرىلعىلاردى پايدالانۋ ۋاقىتىن شەكتەۋ قاجەت. وزگە سايتتاردى بۇعاتتاپ بالالاردى تانىمدىق, ءبىلىم بەرۋ قولدانبالارىن پايدالانۋعا شاقىرعان ءجون.
Dr.Web Security Space قوسىمشاسى انتيۆيرۋس ورناتىپ, اتا-انا باقىلاۋىن قامتاماسىز ەتەدى جانە كونتەنتتى سۇزگىدەن وتكىزەدى. يسپانيا جاساپ شىعارعان Qustodio قوسىمشاسى دا كونتەنتتى سۇزگىدەن وتكىزىپ, ەكران ۋاقىتىن شەكتەۋگە, الەۋمەتتىك جەلىلەردى باقىلاۋعا كومەكتەسەدى. ال اقش-تىڭ Net Nanny مەن Kidslox قوسىمشاسى كونتەنتتى بۇعاتتاپ, ەكران ۋاقىتىن شەكتەۋ مەن ورنالاسقان جەردى قاداعالاۋعا مۇمكىندىك بەرەدى. Norton Family قوسىمشاسى سۇزگىدەن وتكىزىپ, پايدالانۋ ۋاقىتىن شەكتەۋ جانە ىزدەۋ سۇراۋلارىن قاداعالاۋعا ارنالعان. ۋكراينا جاساپ شىعارعان Parental Control Kroha قوسىمشاسى ينتەرنەتتەگى قوسىمشالاردى بۇعاتتاپ, ۆەب-باقىلاۋ, بەلسەندىلىككە مونيتورينگ جاسايدى. ال Google Family Link – Android جۇيەسىندە بەلسەندىلىكتى باقىلاۋعا ارنالعان تەگىن قوسىمشا. ونى اتا-انا مەن بالانىڭ قۇرىلعىلارىنا ورناتۋ قاجەت. Kidlogger – بەلسەندىلىكتى قاداعالاۋعا مۇمكىندىك بەرەتىن ءپاسسيۆتى باقىلاۋ.
سونداي-اق Android قۇرىلعىسىنان Google Play ارقىلى, iOS قۇرىلعىسىنان «ەكران ۋاقىتى» جانە «ورنالاسقان جەردى انىقتاۋ» ارقىلى گەوپوزيتسيانى قاداعالاۋعا بولادى. TikTok Family Pairing ارقىلى جاسوسپىرىمدەردىڭ TikTok قولدانۋىن باقىلاۋعا, ەكران ۋاقىتىن شەكتەۋگە جانە كونتەنتتى سۇزگىدەن وتكىزۋگە بولادى.