رۋدنىي قالالىق سوتىندا الاياقتىق, سونداي-اق سەنىمگە قيانات جاساۋ ارقىلى بوتەننىڭ مۇلكىن ۇرلاۋ بويىنشا ايىپتالۋشىعا قاتىستى قىلمىستىق ءىس قارالدى, دەپ حابارلايدى Egemen.kz.
«رۋدنىي قالالىق ءبىلىم ءبولىمىنىڭ بالالاردى تاربيەلەۋ-ساۋىقتىرۋ كەشەنى باسشىسىنىڭ حاتشىسى قىزمەت بابىن پايدالانىپ, بۇرىن جولداما ساتىپ العان ادامدارعا جالعاسىپ جاتقان اكتسيالار تۋرالى حابارلامالار جىبەرگەن, سوعان سايكەس 2023 جىلدىڭ جازعى ماۋسىمىنا لاگەرلەرگە جولدامالاردى 2022 جىلعا ارنالعان جولداما قۇنىمەن جانە 50% جەڭىلدىكپەن ەرتە برونداۋ مۇمكىن ەكەنىن, بولاشاقتا بوس ورىنداردىڭ بولماي قالاتىنىن جانە جولداما قۇنى ءوسىپ كەتەتىنىن اتاپ كورسەتكەن», دەلىنگەن جوعارعى سوتتىڭ ءباسپاسوز قىزمەتىنىڭ مالىمدەمەسىندە.
ودان ءارى, وسى لاگەرلەرگە جولدامالارعا قول جەتكىزىپ, ولاردىڭ كوشىرمەلەرىن جاساپ, ءوزى ارقىلى ساتىلعان جولدامالاردىڭ سانى تۋرالى باسشىلىعىن جاڭىلىستىرۋ ارقىلى العان اقشاسىنا ولاردى ساتىپ الۋشىلارعا اۋدارعان.
سونىمەن بىرگە, ول لاگەرلەردىڭ شەكتەن تىس بالالاردى قابىلداۋعا مۇمكىندىگى جوق ەكەنىن انىق بىلگەن جانە جوعارىدا كورسەتىلگەن تارتىپپەن بارلىعىنا جولداما ساتۋدى جالعاستىرىپ, تولەمدى ءوز ەسەپشوتىنا الىپ وتىرعان.
«كەشەن حاتشىسىنىڭ قىلمىستىق ارەكەتى ناتيجەسىندە مەملەكەتكە 18,4 ميلليون تەڭگە (اسا ءىرى كولەمدە) زالال كەلتىرىلگەن. پروكۋرور سوتتالۋشىنى 5 جىلعا شارتتى تۇردە باس بوستاندىعىنان ايىرۋدى سۇرادى», دەلىنگەن حابارلامادا.
سوتتالۋشى ءوز كىناسىن تولىق مويىنداپ, شارتتى تۇردە باس بوستاندىعىنان ايىرۋعا كەلىسەتىنىن مالىمدەگەن.
قك-ءنىڭ 190-بابى 4-بولىگىنىڭ 2-ت بويىنشا قارالعان ىستە ايىپتالۋشىنىڭ جاساعان ىسىنە شىن جۇرەكتەن وكىنۋى, جاس بالاسىنىڭ بولۋى جانە كەلتىرىلگەن زياندى جارتىلاي وتەۋى جاۋاپكەرشىلىكتى جەڭىلدەتەتىن ءمان-جايلار دەپ تانىلدى. اۋىرلاتاتىن فاكتورلار انىقتالماعان.
سوتتالۋشى تاعىلعان ايىپ بويىنشا كىنالى دەپ تانىلدى جانە جاس بالاسىنىڭ بولۋىنا بايلانىستى وعان 5 جىلعا باس بوستاندىعىنان شارتتى تۇردە ايىرۋ جازاسى تاعايىندالدى.
مەكەمەنىڭ ازاماتتىق تالاپ قويۋى قاناعاتتاندىرىلىپ, ماتەريالدىق شىعىندى وتەۋ ءۇشىن سوتتالۋشىدان 16 ملن تەڭگە ءوندىرىلدى.
ۇكىم زاڭدى كۇشىنە ەنگەن جوق.