ەلىمىزگە رەسمي ساپارمەن كەلگەن ارمەنيا رەسپۋبليكاسىنىڭ پرەزيدەنتى ۆااگن حاچاتۋريان پرەزيدەنت جانىنداعى مەملەكەتتىك باسقارۋ اكادەمياسىندا ءدارىس وقىدى. مەملەكەتتىك قىزمەتشىلەرگە ول ارمەنيانىڭ مەملەكەتتىك باسقارۋ قۇرىلىمىن, تاريحىن, كولىك-لوگيستيكالىق الەۋەتىن, الەۋمەتتىك-ەكونوميكالىق سالاسىن, ينۆەستيتسيا, جۇمىسسىزدىق ماسەلەلەرىن ايتىپ بەردى.
«ارمياندىق «بەيبىتشىلىك تىرەگى»: وڭتۇستىك كاۆكازدىڭ ۇلتتىق ارتىقشىلىعى جانە تۇراقتى دامۋىنىڭ كەپىلى» تاقىرىبىنداعى ءدارىسىن ارمەنيا باسشىسى ءوز تىلىندە وقىدى. ول ءار ۇلت انا تىلىندە سويلەۋى ماڭىزدى ەكەنىن ايتتى.
– رەسمي كەزدەسۋلەردە مەن دە, پرەمەر-ءمينيسترىمىز دە ءوز تىلىمىزدە سويلەيمىز. مۇنى وتە ماڭىزدى دەپ سانايمىن. بۇل ءوزىمىزدى كورسەتۋ ءۇشىن عانا ەمەس, شىن مانىندە, ءبىزدىڭ تاۋەلسىز, باقۋاتتى مەملەكەت ەكەنىمىزدى تاعى ءبىر مارتە دالەلدەيدى, – دەدى ۆ.حاچاتۋريان.
ارمەنيا پرەزيدەنتىنىڭ ايتۋىنشا, ءوز ەلىندەگى جۇمىسسىزدىق – 12 پايىز. دەسە دە مەملەكەتتە جۇمىس كۇشى تاپشىلىعى سەزىلەدى.
– وتانداستارىمىزعا بەلگىلى ءبىر سالادا جۇمىس ىستەۋ ءتيىمسىز بولىپ كورىنەدى, سوندىقتان ولار جۇمىس ىستەگىسى جوق. سول سەبەپتى جۇمىسسىزدار دەپ ەسەپتەلەدى. دەگەنمەن ءبىزدىڭ كوشى-قون ساياساتىمىز بار جانە سول ارقىلى ءۇندىستاننان, باسقا دا شەت مەملەكەتتەردەن جۇمىس كۇشىن تارتامىز. نەگىزى ءتۇرلى باعالاۋعا سايكەس, جۇمىسسىزدىق دەڭگەيى 5 پايىزدان اسپاۋعا ءتيىس, – دەدى ول.
اكادەميادا ارمەنيا پرەزيدەنتىنە پروكتورينگ ەلەمەنتتەرى بار Admission (قابىلداۋ كوميسسياسى) اقپاراتتىق جۇيەسى مەن iCademium (LMS) جۇيەسى كورسەتىلدى. سونداي-اق ۆااگن حاچاتۋريان بىلىكتىلىكتى ارتتىرۋ كۋرستارى تىڭداۋشىلارىنىڭ كوممۋنيكاتيۆتىك داعدىلارىن ارتتىرۋ ماقساتىندا پايدالانىلاتىن مەديا-ستۋديانىڭ مۇمكىندىكتەرىمەن, ۇزدىكسىز ءبىلىم بەرۋ پلاتفورماسى جانە قاشىقتان وقىتۋ كۋرستارىن جازۋعا ارنالعان JALINGA بەينەستۋدياسىمەن تانىستى.
ۆااگن حاچاتۋريان ءوز سوزىندە قازاقستان مەن ارمەنيا اراسىنداعى دوستىق پەن ىنتىماقتاستىق تۋرالى شارتقا قول قويىلعانىنا 25 جىل تولعانىن اتاپ ءوتتى. سونداي-اق ەكى ەل اراسىنداعى دوستىق قارىم-قاتىناس ۇزاق جىلعا جالعاساتىنىنا سەنىم ءبىلدىردى.
ءوز كەزەگىندە مەملەكەتتىك باسقارۋ اكادەمياسىنىڭ رەكتورى ەرلان ءابىل اكادەميانىڭ ءبىلىم الۋشىلارى اقپاراتتى ءبىرىنشى باسشىدان العانى ماڭىزدى ەكەنىن جەتكىزدى.
اكادەميانىڭ ديپلوماتيا ينستيتۋتىنىڭ ماگيسترانتى كەزدەسۋدەن العان اسەرىمەن ءبولىستى.
– ارمەنيا پرەزيدەنتىمەن كەزدەسۋ وتە قىزىقتى ءارى پايدالى بولدى. ارمەنيا ەكونوميكاسىنىڭ, كولىك-لوگيستيكا سالاسىنىڭ, اۋىل شارۋاشىلىعىنىڭ دامۋى تۋرالى ءبىراز اقپارات الدىق, ماكروەكونوميكالىق كورسەتكىشتەرىمەن تانىستىق. بۇل – ەرەكشە سيپاتقا يە كەزدەسۋ. پرەزيدەنتتىڭ اكادەمياعا كەلىپ, بىزگە ءدارىس وقۋىنىڭ ءوزى بىلىمگە نازار اۋداراتىنىن بىلدىرەدى, – دەدى تەمىرلان سايلاۋ ۇلى.
پرەزيدەنتتىڭ دارىسىنە ارمەنيانىڭ رەسمي دەلەگاتسياسى, ونىڭ ىشىندە ارمەنيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى, قازاقستاننىڭ ارمەنيا رەسپۋبليكاسىنداعى توتەنشە جانە وكىلەتتى ەلشىسى, ارمەنيا رەسپۋبليكاسىنىڭ ءبىلىم, عىلىم, مادەنيەت جانە سپورت ءمينيسترى, ارمەنيا رەسپۋبليكاسى سىرتقى ىستەر ءمينيسترىنىڭ ورىنباسارى, «ارمەنيا-قازاقستان» پارلامەنتارالىق دوستىق توبىنىڭ جەتەكشىسى, پرەزيدەنت اكىمشىلىگى جانە باق وكىلدەرى, قر سىرتقى ىستەر مينيسترلىگىنىڭ قىزمەتكەرلەرى, ماگيسترانتتار, دوكتورانتتار, سونداي-اق اكادەميا قىزمەتكەرلەرى قاتىستى.