تۇركيانىڭ ۇلتتىق ءبىلىم مينيسترلىگى تاريح پانىنە تۇبەگەيلى وزگەرىستەر ەنگىزىلگەنىن, ەندى «ورتالىق ازيا» تەرمينىنىڭ ورنىنا «تۇركىستان» اتاۋى قولدانىلاتىنىن حابارلادى. ءبىلىم سالاسىنداعى ساراپشىلار مۇنداي قادام بولاشاق ۇرپاقتىڭ تۇركىلىك رۋحتى, وتانشىلدىقتى سەزىنىپ تاربيەلەنۋىنە باعىتتالعانىن مالىمدەدى.
تۇركيا پرەزيدەنتى رەجەپ تايپ ەردوعان «تۇرىك عاسىرى» باعدارلاماسى اياسىندا تۇركى الەمىنىڭ بەرەكە-بىرلىگىن, جاسامپازدىعىن, مەيماندوستىعىن ايقىنداي وتىرىپ, «تۇركى ءداۋىرىن» جالعاستىرۋعا نيەتتى ەكەنىن جاريالادى.
«تۇركيا رەسپۋبليكاسى رەتىندە ءبىز بۇكىل تۇركى الەمىنىڭ بەيبىتشىلىگىنە, وركەندەۋىنە ءارى قاۋىپسىزدىگىنە قادام جاساۋدى جالعاستىرامىز. ءبىز «تۇرىك عاسىرى» تۋرالى كوزقاراسىمىزدى تۇركى مەملەكەتتەرىنىڭ ۇيىمىندا كەڭەيتە وتىرىپ, الداعى كەزەڭدى تۇركى داۋىرىنە اينالدىرۋ ءۇشىن يىق تىرەسە جۇمىس ىستەيمىز», دەدى ول.
تۇرىك تاريحشىلارى احمەت تاشاعىل مەن رامين سادىك «TRT Haber» ارناسىنا بەرگەن سۇحباتىندا «تۇركىستان» ۇعىمىنىڭ تاريحي ءمانىن ءتۇسىندىرىپ بەردى.
«تۇركىلەردىڭ وتانى دەگەن ماعىنانى بىلدىرەتىن «تۇركىستان» ءسوزى تاريحتىڭ العاشقى كەزەڭدەرىنەن بەرى قولدانىلىپ كەلەدى. XIX-عاسىردىڭ ەكىنشى جارتىسىنداعى شاپقىنشىلىقتان سوڭ تۇركىستان اتاۋى ورتالىق ازيا ۇعىمىمەن الماستىرىلىپ, كەڭىنەن قولدانىلا باستادى», دەدى ا.تاشاعىل.
ال رامين سادىك تۇركىستان تۇجىرىمداماسى جونىندەگى كوزقاراستى ۇلتتىق ءبىلىم مينيسترلىگىنىڭ وقۋلىقتارعا ەنگىزۋى وتە دۇرىس شەشىم ەكەنىن اتاپ ءوتتى.
«تۇركيا دا, تۇركىستان دا نەگىزىنەن تۇركىلەر تۇراتىن ايماقتى بىلدىرەدى. ءبىز تاريحىمىزعا, مادەنيەتىمىزگە, وتكەنىمىزگە قامقورلىق جاساۋىمىز كەرەك», دەدى تاريحشى.
رامين سادىك تۇركى الەمى ءۇشىن ورتاق تاريح, گەوگرافيا, ادەبيەت, كارتالار مەن ءالىپبيدى قۇرۋ جونىندەگى بەلسەندى جۇمىس اياسىندا ۇلتتىق ءبىلىم مينيسترلىگىنىڭ «تۇركىستان» تەرمينىن وقۋلىقتارعا ەنگىزۋى ەلەۋلى وزگەرىس ەكەنىن العا تارتتى. ونىڭ ايتۋىنشا, بۇل ترانسفورماتسيا – تەك تۇركياعا عانا ەمەس, بۇكىل تۇركى الەمىنە, سونداي-اق تۇركى مەملەكەتتەرىنىڭ ارىپتەس ەلدەرىنە ماڭىزدى باستاما جانە قۇندى ۇلەس.
وسىلايشا, تۇركيانىڭ ۇلتتىق ءبىلىم مينيسترلىگى ۇلى تۇركىستاننىڭ تاريحي داڭقىن قايتارۋعا زور قادام جاساپ وتىر.