كەشە ورتالىق رەفەرەندۋم كوميسسياسىنىڭ توراعاسى نۇرلان ءابدىروۆ حالىقارالىق بايقاۋشىلارمەن بەس كەزدەسۋ وتكىزدى.
نۇرلان ءابدىروۆ بەلارۋس رەسپۋبليكاسى وسك توراعاسى يگور كارپەنكومەن, امەريكا قۇراما شتاتتارىنداعى سايلاۋعا جاردەمدەسۋ جونىندەگى كوميسسيانىڭ ۆيتسە-توراعاسى دونالد پالمەرمەن, تۇركى مەملەكەتتەرى ۇيىمى (تمۇ) باس حاتشىسىنىڭ ورىنباسارى سادي دجافاروۆ باستاعان تمۇ بايقاۋشىلار ميسسياسىنىڭ دەلەگاتسياسىمەن, تۇركيانىڭ جوعارى سايلاۋ كەڭەسىنىڭ مۇشەلەرى چوپۋر الي جانە ۇركەر اليمەن كەزدەسۋلەر وتكىزدى. سونداي-اق مولدوۆا ورتالىق سايلاۋ كوميسسياسىنىڭ مۇشەسى ميرچەي كاتىرەۋمەن دە كەزدەسۋ ءوتتى.
ي.كارپەنكومەن كەزدەسۋدە ورك باسشىسى تمد-عا قاتىسۋشى ەلدەردىڭ ورتالىق سايلاۋ ورگاندارى باسشىلارىنىڭ كونسۋلتاتيۆتىك كەڭەسىنە توراعالىق ەتۋ شەڭبەرىندە بەلارۋس وسك-مەن ءوزارا ءىس-قيمىل تۋرالى ءسوز قوزعادى.
د.پالمەرمەن سويلەسە وتىرىپ, ن.ءابدىروۆ قازاقستانداعى سايلاۋ ۇدەرىستەرىن العاش رەت اقش-تاعى سايلاۋعا جاردەمدەسۋ جونىندەگى كوميسسيانىڭ وكىلى بايقاپ وتىرعانىن اتاپ ءوتتى.
«قازاقستانداعى دەموكراتيالىق رەفورمالار تۋرالى تولىق اقپارات العانىما ريزامىن. اقش ءۇشىن داۋىس بەرۋدىڭ اشىق ءارى انىق بولۋى ماڭىزدى. قازاقستانعا العاش رەت كەلىپ وتىرمىن ءارى بۇل – مەن ءۇشىن رەفەرەندۋمعا قاتىسا وتىرىپ, قازاقستاننىڭ سايلاۋى مەن رەفەرەندۋمى بويىنشا جۇيەنى جاقسىراق زەردەلەۋگە ۇلكەن مۇمكىندىك. رەفەرەندۋمعا دايىندىق بىرنەشە ايعا سوزىلدى, كوپ جۇمىس اتقارىلدى. ەلدەرىمىزدىڭ سايلاۋ ورگاندارى اراسىندا تاجىريبە الماسۋدى جالعاستىرۋ ءۇشىن ءبىز قازاقستاننىڭ وسك وكىلدەرىن 2024 جىلعى 5 قاراشادا اقش-تاعى پرەزيدەنتتىك سايلاۋدى بايقاۋعا شاقىردىق», دەدى د.پالمەر.
ونىڭ ايتۋىنشا, اقش-تاعى ماڭىزدى ماسەلەلەردىڭ ءبىرى – مۇگەدەكتىگى بار ادامداردىڭ سايلاۋ قۇقىعىن قامتاماسىز ەتۋ. ول قازاقستاندا دا بۇل ماسەلەلەرگە ۇلكەن ءمان بەرىلەتىنى تۋرالى حاباردار بولعانىن ايتتى.
تمۇ-مەن ىنتىماقتاستىق قازاقستان پرەزيدەنتى قاسىم-جومارت توقاەۆتىڭ تمۇ-نا مۇشە مەملەكەتتەردىڭ ورتالىق سايلاۋ ورگاندارىنىڭ كونسۋلتاتيۆتىك كەڭەسىن قۇرۋ تۋرالى باستاماسىن ىسكە اسىرۋ اياسىندا, سونداي-اق تۇركيا جانە مولدوۆامەن ەكىجاقتى مەموراندۋمداردى ىسكە اسىرۋ شەڭبەرىندە دە جۇزەگە اسىرىلادى.
كەزدەسۋلەردە ن.ءابدىروۆ قوناقتاردى 6 قازانعا بەلگىلەنگەن رەسپۋبليكالىق رەفەرەندۋمعا دايىندىق پەن ونى وتكىزۋ بارىسىنان حاباردار ەتتى, پلەبيستسيتتى وتكىزۋگە قاتىستى كەزدەسۋلەرگە قاتىسۋشىلاردىڭ ناۋقاننىڭ نەگىزگى كەزەڭدەرى مەن ونىڭ قورىتىندىلارىن شىعارۋ جونىندەگى سۇراقتارىنا جاۋاپ بەردى.
كەزدەسۋ بارىسىندا ورك توراعاسى ەلىمىزدە حالىقارالىق بايقاۋشىلاردىڭ سايلاۋ ناۋقاندارىنا قاتىسۋىنا, ونىڭ ىشىندە ەلىمىزدىڭ دەموكراتيالىق دامۋىن قولداۋدىڭ ايعاعى رەتىندە باسا ءمان بەرىلەتىنىن اتاپ ءوتتى.
كەزدەسۋلەرگە قاتىسۋشىلار ناۋقاندى ۇيىمداستىرۋشىلاردىڭ جوعارى كاسىبي دايىندىق دەڭگەيىن اتاپ ءوتىپ, داۋىس بەرۋ كۇنى وبەكتيۆتى ءارى بەيتاراپ تۇردە بايقاۋدى جۇزەگە اسىرۋعا دايىن ەكەنىن ءبىلدىردى.