سەنات سپيكەرى ماۋلەن اشىمباەۆتىڭ توراعالىعىمەن پالاتا وتىرىسى ءوتتى. وندا سەناتورلار مەملەكەت باسشىسى جولداۋدا بەلگىلەپ بەرگەن تاپسىرمالاردان تۋىندايتىن زاڭ شىعارۋ قىزمەتىندەگى جانە ماسليحاتتارمەن جۇمىس بارىسىنداعى مىندەتتەردى تالقىلادى. سونداي-اق ولار دەپۋتاتتىق ساۋالدارىن جولدادى, دەپ حابارلايدى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
پالاتانىڭ جاڭا سەسسياداعى العاشقى وتىرىسىن اشقان ماۋلەن اشىمباەۆ سەناتتىڭ الداعى جۇمىسى ەل پرەزيدەنتىنىڭ جولداۋدا ايتقان باستامالارى مەن رەفورمالارى اياسىندا جۇرگىزىلەتىنىن اتاپ ءوتتى. اتالعان ستراتەگيالىق باعىتتاردى ىسكە اسىرۋ كەزىندە بيۋدجەتتىك جانە الەۋمەتتىك پراگماتيزمگە, ينفراقۇرىلىمدى دامىتۋعا, تسيفرلاندىرۋعا جانە باسقا دا قاعيداتتارعا باسا ءمان بەرىلگەن.
«كاسىپكەرلەر ءۇشىن ءتيىمدى شارتتاردى قامتاماسىز ەتە وتىرىپ, سالىق رەجيمدەرىن وڭتايلاندىرۋ جۇمىستارى جۇرگىزىلەدى. بانك سەكتورىن ەكونوميكاعا كوبىرەك ينۆەستيتسيا سالۋ ءۇشىن ىنتالاندىرۋ شارالارى دا قابىلدانادى. ۇكىمەت جانىنداعى ينۆەستيتسيالىق شتابتىڭ ءرولى ارتىپ, ەل ەكونوميكاسىنا ينۆەستيتسيا تارتۋعا جانە وتاندىق ونەركاسىپتى قولداۋعا باعىتتالعان قوسىمشا شارالار قولعا الىنادى. ورتا بيزنەس جاڭا جەڭىلدىكتەر مەن ارتىقشىلىقتارعا يە بولادى. سول ارقىلى 2029 جىلعا قاراي ورتا بيزنەستىڭ ەكونوميكاداعى ۇلەسىن 15 پايىزعا دەيىن جەتكىزۋ ءۇشىن قولايلى جاعداي جاسالادى. مەملەكەت باسشىسى ەنەرگەتيكا سەكتورى مەن كولىك سالاسىن دامىتۋدىڭ ناقتى جولدارىن دا ايقىنداپ بەردى», دەدى سەنات توراعاسى.
سونىمەن قاتار پالاتا سپيكەرى اەس سالۋ ماسەلەسىنە قاتىستى جالپىۇلتتىق رەفەرەندۋم وتكىزۋ جانە كەلەسى جىلدان باستاپ اۋداندار مەن وبلىستىق ماڭىزى بار قالالاردىڭ اكىمدەرىن تىكەلەي سايلاۋ ازاماتتاردىڭ مەملەكەتتىك شەشىمدەر قابىلداۋ ۇدەرىسىنە قاتىسۋ مۇمكىندىگىن كەڭەيتە تۇسەتىنىن ايتتى. بيۋدجەت قاراجاتىن ءتيىمدى جۇمساۋعا, شىعىستاردى شەكتەۋگە جانە قاتاڭ باقىلاۋعا ارنالعان شارالار دا قابىلدانادى.
«پرەزيدەنتىمىز قاسىم-جومارت كەمەل ۇلى توقاەۆتىڭ جولداۋدا بەرگەن تاپسىرمالارىن ىسكە اسىرۋ بارىسىندا ولاردى زاڭنامالىق تۇرعىدان قامتاماسىز ەتۋ اسا ماڭىزدى مىندەت.بۇل جۇمىستى سەنات ءماجىلىس پەن ۇكىمەتتەگى ارىپتەستەرىمەن جانە ساراپشىلارمەن بىرلەسىپ جۇرگىزەدى. مەملەكەت باسشىسىنىڭ قازاقستاننىڭ ورنىقتى دامۋىنا ارنالعان بارلىق باستاماسىن ساپالى ءارى ۋاقتىلى جۇزەگە اسىرۋعا بار كۇش-جىگەرىمىزدى جۇمساۋىمىز قاجەت», دەدى ماۋلەن اشىمباەۆ.
پالاتا وتىرىسىندا دەپۋتاتتار جولداۋدا ايتىلعان اۋىل شارۋاشىلىعىن دامىتۋ, كوممەرتسيالىق بانكتەردىڭ قاراجاتىن تارتا وتىرىپ, اگروونەركاسىپتىك كەشەندى ينۆەستيتسيالاۋ سياقتى مىندەتتەرگە دە كوڭىل بولىنگەن. جۇمىسشى ماماندىقتار تۇجىرىمداماسىنىڭ ماڭىزى, ەڭبەك قۇندىلىقتارىن دارىپتەۋ, ۇلت دەنساۋلىعىن نىعايتۋعا ارنالعان شارالار, ازاماتتاردى الەۋمەتتىك قولداۋ جۇيەسىن جاڭعىرتۋ جانە ءبىلىم بەرۋ ساپاسىن ارتتىرۋ باعىتىنداعى باسىمدىقتار دا ءسوز بولدى. ەكولوگيالىق جاعدايدى جاقسارتۋ جانە قورشاعان ورتانى قورعاۋ ماسەلەلەرى دە نازاردان تىس قالعان جوق.
سونداي-اق سەناتورلار وتىرىستا «قازاقستان رەسپۋبليكاسىنىڭ ۇكىمەتى مەن قىرعىز رەسپۋبليكاسىنىڭ مينيسترلەر كابينەتى اراسىنداعى «قاراسۋ» جانە «اق-تىلەك» اۆتوجول وتكىزۋ پۋنكتتەرى اۋدانىندا يندۋستريالىق ساۋدا-لوگيستيكالىق كەشەندى قۇرۋ جانە ونىڭ قىزمەتىن رەتتەۋ تۋرالى كەلىسىمدى راتيفيكاتسيالاۋ تۋرالى» زاڭدى قارادى. ايتا كەتەيىك, قۇجات ينفراقۇرىلىم نىساندارىن سالۋ ءۇشىن ينۆەستيتسيا تارتۋ, كەشەندى باسقارۋ, سالىق سالۋ, ۆاليۋتالىق باقىلاۋ جانە ءوتۋ ءتارتىبى سياقتى ماسەلەلەردى رەتتەيدى. ماقۇلدانعان زاڭ قازاقستان مەن قىرعىزستان اراسىندا ءوندىرىس, كاسىپكەرلىكتى قولداۋ جانە دامىتۋ سالالارىنداعى ىنتىماقتاستىقتى ارتتىرۋعا ىقپال ەتەدى.
سونداي-اق پالاتا وتىرىسىندا سەناتورلار وزدەرىنىڭ دەپۋتاتتىق ساۋالدارىن دا جولدادى.
سۇلتانبەك ماكەجانوۆ ەكونوميكاعا سالىناتىن ينۆەستيتسيا دەڭگەيىنىن تومەندەۋىنە نازار اۋدارىپ, ينۆەستورلارعا بەرىلەتىن سالىقتىق جەڭىلدىكتەردى پايدالانۋدىڭ تيىمدىلىگىن سىنعا الدى. سونداي-اق ول كەيبىر جوبالاردىڭ قانشالىقتى ورىندى ەكەنىنە دە نازار اۋداردى.
اسەم راحمەتوۆا قازاقستاندا ينتەرنەت-الاياقتىقتىڭ بەلەڭ العانىنا الاڭداۋشىلىق ءبىلدىرىپ, ۇكىمەتتى وسى سالاداعى جازانى قاتاڭداتۋعا شاقىردى. بۇل رەتتە سەناتور الدىن الۋ شارالارى ءۇشىن ونلاين-پلاتفورمالار مەن جەدەل جەلىلەر ازىرلەۋدى, جاساندى ينتەللەكتتى ەنگىزۋدى جانە حالىق اراسىندا اقپاراتتىق-ءتۇسىندىرۋ جۇمىستارىن ارتتىرۋدى ۇسىندى.
الىبەك ناۋتيەۆ اتىراۋ وبلىسىندا سمەتالىق قۇننىڭ وسۋىنە بايلانىستى بىرقاتار بيۋدجەتتىك ينۆەستيتسيالىق جوبانىڭ قۇرىلىس توقتاپ قالۋى مۇمكىن ەكەنىن ايتتى. سەناتور ۇكىمەت باسشىسىنا جەرگىلىكتى بيۋدجەتتىڭ شەكتەۋلى مۇمكىندىكتەرىن ەسكەرە وتىرىپ, رەسپۋبليكالىق بيۋدجەتتەن تۇزەتۋلەردىڭ ۇلعايتىلعان سومالارىن قارجىلاندىرۋ مۇمكىندىگىن قاراستىرۋدى ۇسىندى.
رۋسلان رۇستەموۆ قىزىلوردا وبلىسىندا كۇرىش شارۋاشىلىعىنىڭ دامۋىنا كەدەرگى كەلتىرەتىن پروبلەمالاردى اتاپ ءوتتى. سەناتور قالىپتاسقان جاعدايدى شەشۋ ءۇشىن عىلىمي نەگىزدەلگەن جانە يننوۆاتسيالىق ادىستەردى ەنگىزۋ كەرەكتىگىن ايتتى. وسىعان بايلانىستى ول قازاق كۇرىش شارۋاشىلىعى عىلىمي-زەرتتەۋ ينستيتۋتىنىڭ عىلىمي-تەحنيكالىق ينفراقۇرىلىمىن قايتا قۇرۋ جونىندە ۇسىنىس جاسادى.
عالياسقار سارىباەۆ جەتىسۋ وبلىسىنىڭ تۇرعىندارىمەن كەزدەسۋ كەزىندە كوتەرىلگەن وڭىردەگى وزەكتى ماسەلەلەرگە توقتالدى. دەپۋتات سۋ باسۋ ايماعىندا ورنالاسقان اۋىل ماڭىندا الاكول كولىنىڭ قورشاۋ بوگەتى جوق ەكەنىن ايتىپ, الاڭداۋشىلىق ءبىلدىردى. سونداي-اق سەناتور بالقاش كولىنىڭ جاعالاۋىنداعى ينجەنەرلىك جەلىلەردىڭ جاي-كۇيىنە دە ەرەكشە نازار اۋداردى.
ارمان وتەعۇلوۆ اگروونەركاسىپتىك سەكتوردىڭ دامۋىن تەجەيتىن پروبلەمالاردى اتاپ كورسەتىپ, ولاردى شەشۋ جولدارىن ۇسىندى. ول وسىنداي شارالاردىڭ ءبىرى وتاندىق شارۋالاردىڭ يمپورتتىق تۇقىمدارعا تاۋەلدىلىگىن جويۋ جانە ەكسپورتتى ۇلعايتۋ بويىنشا ارنايى باعدارلاما ازىرلەۋ ەكەنىن ايتتى.