ەل حالقىنىڭ جايلى تۇرمىسى, باقۋاتتى ءومىر ءسۇرۋى, بەيبىت ەڭبەك ەتىپ, الاڭسىز كۇن كەشۋى, ەڭ الدىمەن, ەلدەگى قاۋىپسىزدىكتىڭ تۇراقتىلىعىندا دەيمىز. بۇل تۋرالى مەملەكەت باسشىسى حالقىنا ارناعان ءار جولداۋىندا ايرىقشا ايتىپ كەلەدى. ال ىشكى ءتارتىپتى قاشاندا ىشكى ىستەر ورگاندارى جۇزەگە اسىرىپ جاتقانى بەلگىلى. حالقىما, ەلىمە ادال قىزمەت ەتەمىن دەپ كەۋدەسىنە قولىن قويىپ انت-سۋ ىشكەن ناعىز پوليتسەيلەر ادامداردىڭ قاۋىپسىزدىگى مەن قوعامدىق ءتارتىپتى قورعاۋدا تالاپ دەڭگەيىنەن شىعىپ جاتقانى راس. مىنە, سونىڭ دالەلىندەي ەلوردادا مينيستر ق.قاسىموۆتىڭ توراعالىعىمەن ءىىم كەڭەيتىلگەن القا وتىرىسى بولدى.
ونىڭ جۇمىسىنا قازاقستان رەسپۋبليكاسى پرەزيدەنتىنىڭ كومەكشىسى – قاۋىپسىزدىك كەڭەسىنىڭ حاتشىسى ن.ەرمەكباەۆ, پرەزيدەنت اكىمشىلىگى قۇقىق قورعاۋ جۇيەسى ءبولىمىنىڭ مەڭگەرۋشىسى ە.كەنەنباەۆ جانە ءىىم ورتالىق اپپاراتى مەن كوميتەتتەرى, ءوڭىرلىك ىشكى ىستەر, قىلمىستىق-اتقارۋ جۇيەسى, توتەنشە جاعدايلار دەپارتامەنتتەرى جەكە قۇرامىنىڭ, سونداي-اق, ۇلتتىق ۇلاننىڭ ءوڭىرلىك قولباسشىلارىنىڭ جانە ۆەدومستۆولىق وقۋ ورىندارى باسشىلارى قاتىستى. القا وتىرىسىندا, جوعارىدا ايتقانىمىزداي, وتكەن جىلعى قىزمەت قورىتىندىلارى, تاياۋ ۋاقىتتارعا ارنالعان ىشكى ىستەر ورگاندارىنىڭ باسىم مىندەتتەرى, سونداي-اق ىشكى ءىستەر ورگاندارىنداعى ءتارتىپ, زاڭدىلىق جانە سىبايلاس جەمقورلىققا قارسى ءىس-قيمىل جاعدايى تالقىلاندى.
قالمۇحانبەت قاسىموۆ وتكەن جىلى ءىىم رەفورمالاۋ ءجونىندەگى ءىس-شارالاردى ىسكە اسىرۋدا ەلەۋلى كەزەڭ بولعانىن اتاپ ءوتتى. زاماناۋي تالاپتارعا سايكەس ىشكى ىستەر ورگاندارىنىڭ جاڭا جۇيەسىنىڭ نەگىزى قالانعان «ىشكى ىستەر ورگاندارى تۋرالى» زاڭ قابىلداندى. قۇقىق قورعاۋ جۇيەسىن ودان ءارى جاڭعىرتۋدىڭ مەملەكەتتىك باعدارلاماسىن جانە قۇقىق قورعاۋ ورگاندارىنىڭ كادرلىق ساياساتىنىڭ تۇجىرىمداماسىن ىسكە اسىرۋ جۇمىستارى جۇرگىزىلدى. مينيستر حابارلاعانداي, ەسەپكە الۋ-تىركەۋ ساياساتىن قاتاڭداتۋ ناتيجەسىندە قىلمىستاردى جاسىرۋدىڭ بۇرىنعى امالى ءتۇپ-تامىرىمەن جويىلدى.
سونىڭ ارقاسىندا سوڭعى جىلدارى العاشقى رەت قىلمىستىڭ تومەندەۋى بايقالىپتى. بىرقاتار قىلمىس تۇرلەرى ازايعان, ونىڭ ىشىندە كىسى ءولتىرۋ, دەنساۋلىققا اۋىر زيان كەلتىرۋ, توناۋ, قاراقشىلىق, باسقا اۋىر جانە اسا اۋىر قىلمىستار, سونداي-اق كامەلەتكە تولماعاندار, بۇرىن سوتتالعاندار جاساعان قىلمىستار, كوشەلەردە ورىن الاتىن قىلمىستار تومەندەگەن كورىنەدى. وسىعان وراي مينيستر, قىلمىستىڭ تومەندەۋى ناتيجەسىندە قىلمىستاردىڭ اشىلۋى, جابىرلەنۋشىلەردىڭ بۇزىلعان قۇقىعىن قايتا قالپىنا كەلتىرۋ جونىندەگى ءبىزدىڭ نەگىزگى مىندەتىمىز شەشىلدى, دەپ اتاپ ءوتتى. ءسويتىپ, نە كەرەك, قىلمىستىڭ باسىم تۇرلەرىن, ونىڭ ىشىندە اۋىر جانە اسا اۋىر قىلمىستاردى اشۋ جاقساردى.
ق.قاسىموۆ ءىىم جۇيەسىنىڭ اعىمداعى جىلعى قىزمەتى مەملەكەت باسشىسى ن.ءا.نازارباەۆتىڭ قازاقستان حالقىنا «نۇرلى جول – بولاشاققا باستار جول» جولداۋىندا بەلگىلەنگەن اۋقىمدى مىندەتتەردى ناتيجەلى ىسكە اسىرۋ ءۇشىن جاعداي تۋعىزۋعا, قىزمەتتەر مەن بولىنىستەردىڭ جەدەل-قىزمەتتىك جۇمىس كورسەتكىشتەرىن تومەندەتپەي, قىلمىستار تۋرالى بارلىق وتىنىشتەر مەن ارىزدارعا مۇلتىكسىز جەدەل دەن قويۋدى قامتاماسىز ەتە وتىرىپ, قىلمىستىق زاڭنىڭ جانە قىلمىستىق سوت ءوندىرىسىنىڭ جاڭا ۇلگىسىنە اۋىسۋدى جالعاستىرۋعا باعىتتالۋى ءتيىس ەكەنىنە نازار اۋداردى. وسىلايشا ءىىم اعىمداعى جىلعى تۇڭعىش القا وتىرىسىنىڭ قورىتىندىسى بويىنشا مينيسترلىكتىڭ ورتالىق اپپاراتىنىڭ جانە وڭىرلىك دەپارتامەنتتەردىڭ قىزمەت باسشىلارىنا وزگە دە قارالعان پروبلەمالار بويىنشا ناقتى تاپسىرمالار بەرىلدى.
الەكساندر تاسبولاتوۆ,
«ەگەمەن قازاقستان».