وسىدان بەس جىل بۇرىن ۇدەمەلى يندۋستريالىق-يننوۆاتسيالىق دامۋ مەملەكەتتىك باعدارلاماسى اياسىندا ىلە اۋدانى, بايسەركە اۋىلىنا كەلىپ ءسۇت ونىمدەرىن وڭدەيتىن زاۋىت سالۋعا كىرىسكەن ينۆەستورعا حالىق زور سەنىم ارتقانى اقيقات. ويتكەنى, اگرارلى وبلىستا اق مول بولعانىمەن وزىندىك قۇنىن اقتاماي ءراسۋا بولىپ جاتقان-تىن. قۇنى 3 068 ملن. تەڭگە تۇراتىن جوبانى نەبارى جارتى جىلدا جۇزەگە اسىرۋ ءۇشىن قۇرىلىس جۇمىستارىن جۇرگىزۋگە تۇرعىلىقتى حالىقتان 137 ادامدى جۇمىسقا قابىلداپ, ۋادە ۇدەسىنەن شىعا بىلگەن ينۆەستورعا حالىق رازى بولدى. ءسويتىپ, جەتىسۋ جەرىنە شەتەلدىك ينۆەستيتسيا تارتىپ, وتاندىق اۋىلشارۋاشىلىق ونىمدەرىن قابىلداپ, ءسۇت, ايران, يوگۋرت, ىرىمشىك سىندى جاڭا ءسۇت ونىمدەرىن رىنوكقا شىعارىپ, ۇلكەن سۇرانىسقا يە بولعان ەدى بۇل زاۋىت. تاعى ءبىر ارتىقشىلىعى – اۋىلدا جاڭا جانە قوسىمشا جۇمىس ورىندارىن اشىپ مەملەكەتتىك سالىق تولەمدەرىن دە دەر كەزىندە قۇيۋدا.
«الەمدە ءسۇت ونىمدەرىن ءوندىرۋدە كوشباسشى بولىپ تانىلعان كومپانيامىزدىڭ ۇستانىمى – وسى ءدام ارقىلى ادام دەنساۋلىعىنا پايدا تيگىزۋ. 140 ەلدە ءونىمىمىز ساتىلادى. ال قازاقستان رىنوگىنا كەلگەنىمىزگە 10 جىل بولدى. بىراق الماتى وبلىسىندا زاۋىت قۇرىلىسىن سالىپ, جۇمىس جۇرگىزۋ ءۇشىن ۇدەمەلى يندۋستريالىق-يننوۆاتسيالىق مەملەكەتتىك دامۋ باعدارلاماسى ارقىلى 17 ميلليون ەۋرو ينۆەستيتسيا سالۋعا شەشىم قابىلداعاننان كەيىن عانا ءبىزدىڭ وسى ەلگە كەلۋىمىز ايقىندالىپ, ءىسىمىز ىلگەرى باستى. مۇنى ءبىز ۋاقىت تالابى دەپ تۇسىنەمىز. بۇگىندە ىلە اۋدانىنداعى زاۋىتتا ءبىز 50-دەن استام ءسۇت ونىمدەرىن ءوندىرىپ, تەك قازاقستان عانا ەمەس, كورشى مەملەكەتتەرگە دە شىعارىپ ساتۋدامىز. جالپى, 300-گە جۋىق قازاقستاندىق, سونىڭ ىشىندە 67 جەتىسۋلىق ءبىزدىڭ كومپانيامىزدا جۇمىس ىستەيدى. ەڭ باستىسى, سول جۇمىسكەرلەر سانى تۇراقتى تۇردە وسۋدە. ونىڭ نەگىزگى تەتىگى شىعارعان ونىمىمىزگە سۇرانىستىڭ كۇننەن كۇنگە ءوسۋى بولىپ وتىرعانى بەلگىلى. الماتى وبلىسىنداعى 11 ءىرى اۋىلشارۋاشىلىق قۇرىلىمىمەن ۇزاق مەرزىمدى كەلىسىم جاساسىپ, سيىر ءسۇتىن ساتىپ الىپ وڭدەيمىز. FSSC 22000 ستاندارتىنا سايكەس كەلەتىن ءسۇت ونىمدەرىمىز دۇنيەجۇزىنە كەڭىنەن تانىلعان ەڭ قاۋىپسىز تاماق بولىپ سانالادى. ءبىز قويعان تالابىمىزعا ساي جۇمىسقا قابىلداعان قىزمەتكەرلەرىمىزدى وقىتىپ, ۇيرەتەمىز. بىرقاتار مەنەدجەرلەرىمىز رەسەيگە, فرانتسياعا جىبەرىلىپ, تاجىريبەلەرىن تولىقتىرىپ, بىلىكتىلىكتەرىن ارتتىرىپ, سونى وسى ەلدىڭ يندۋستريالىق دامۋىنا جۇمساۋدامىز. ولاردىڭ باسقا دۇنيەگە قىزىقپاي, تۋىپ-وسكەن جەرىنە ورالۋى دا ءبىز ءۇشىن قۋانىش. ءسوز سوڭىندا ايتارىم, كەز كەلگەن ەل الەۋمەتتىك تۇرعىدا دامىماي, ەكونوميكالىق ءوسۋ ونبەيدى. سوندىقتان بالالار ويناي ءجۇرىپ وي-ءورىسىن دامىتۋى ءۇشىن «بالالار الاڭى» اتتى ۇلى ماقسات اياسىندا جاڭا قۇرىلىستاردىڭ بوي كوتەرۋىنە ءبىز اتسالىسامىز. ءسويتىپ, قازاقستاننىڭ الەمدەگى دامىعان 30 ەلدىڭ قاتارىنان ورىن الۋىنا وزىندىك ۇلەسىمىزدى قوسۋدى ماقسات ەتۋدەمىز», دەدى ورتالىق ازيا جانە كاۆكازداعى «Danone Berkut» جشس باس ديرەكتورى رەنو شامونال.
قورىتا ايتقاندا, بۇل ءوڭىردىڭ مالى ءوسىمتال بولادى. سونىڭ ىشىندە سۇرانىسقا وراي ءسۇت باعىتىنداعى سيىر مالىن اسىلداندىرۋ دۇرىس جولعا قويىلعان. قۇدايعا شۇكىر, سول ءسۇتتى سيىرلار بەرەكە بۇلاعىن اعىزۋدا. مالىنىڭ قوڭىن تايدىرماۋدى ويلاعان شارۋا ءسۇتتى ىرگەدەگى وڭتۇستىك مەگوپوليسكە تاسىمالداپ اۋرەگە تۇسپەيتىنى تاعى بار. بىراق ءسۇت ونىمدەرىن قابىلدايتىن بۇل ءوندىرىس ورنى – «Danone Berkut» جشس شيكىزات ساپاسىنا, سانيتارلىق تازالىعىنا قاتاڭ تالاپ قويۋدا. ارينە, تالاپ قويۋمەن شەكتەلمەي, ءسۇت وتكىزەتىن شارۋا قوجالىقتارى مۇشەلەرىن شيكىزاتتى ساقتاۋ, تاسىمالداۋ سەكىلدى قاجەتتىلىكتەرگە جان-جاقتىلى وقىتىپ, ۇيرەتىپ, كەڭەس بەرۋدە دە تياناقتىلىق تانىتۋدا. بىلە-بىلسەك, بۇل دا وركەنيەتكە ۇمتىلۋدىڭ تىڭ قادامى ەمەس پە؟!
نۇربول الدىباەۆ,
«ەگەمەن قازاقستان».
الماتى وبلىسى,
ىلە اۋدانى,
بايسەركە اۋىلى.