15-17 ناۋرىزدا رەسەيدە پرەزيدەنت سايلاۋى وتەدى. ەلدىڭ ورتالىق سايلاۋ كوميسسياسى قاڭتار ايىندا ۆلاديمير ءپۋتيندى كانديدات رەتىندە تىركەدى. ساياسي ناۋقان الدىندا رەسەي باسشىسى فەدەرالدىق جينالىسقا جولداۋ جاسادى. ول «سوعىسقا قاتىسۋشىلار ءۇشىن يپوتەكا جەڭىلدەتىلەدى, تۇراقتى ديسپانسەرلىك سالىق شەگەرىلەدى, بيزنەستىڭ ءبىر بولىگى تەكسەرىستەن بوساتىلىپ, وتباسىلىق نەسيە ۇزارتىلادى», دەپ ۋادە بەردى.
ۆ.پۋتين فەدەرالدى جينالىسقا ارناعان جولداۋىن باتىسقا سەس كورسەتۋدەن باستادى. ول ۋكرايناعا اسكەري كونتينگەنت جىبەرسە, «باتىس ەلدەرى قايعىلى جاعدايعا تاپ بولادى», دەپ قورقىتتى دەدى.
ء«بىر كەزدەرى ءوز كونتينگەنتتەرىن ەلىمىزدىڭ اۋماعىنا جىبەرگەن مەملەكەتتەردىڭ تاعدىرى ەسىمىزدە. بىزدە دە قارۋ بار, ءيا, ولار بۇل تۋرالى بىلەدى», دەدى پۋتين. بۇدان سوڭ رەسەي پرەزيدەنتى ۋكرايناداعى قاقتىعىستا قولدانىلىپ جاتقان «كينجال» جانە «تسيركون» گيپەرسونيكالىق كەشەندەرىمەن ماقتاندى. سونداي-اق ول 2018 جىلى جاساعان جولداۋىندا ۇسىنعان باسقا دا قارۋلاردىڭ سىناقتاردان ءساتتى وتكەنىن ايتتى. بۇعان قوسا پۋتين ستراتەگيالىق يادرولىق كۇشتەر دە قولدانۋعا تولىق دايىن ەكەنىن مالىمدەدى.
جولداۋدىڭ جيىرما مينۋتىن باتىسپەن قاقتىعىس تاقىرىبىنا ارناعان رەسەي باسشىسى, ەلدىڭ الەۋمەتتىك جانە ەكونوميكالىق قولداۋىنا باسا نازار اۋداردى. ول بەس جاڭا ۇلتتىق جوبانىڭ ىسكە قوسىلعانىن ايتتى.
جوبانىڭ العاشقىسى «وتباسى» دەپ اتالادى. بۇل بويىنشا 2030 جىلعا دەيىن وتباسىلىق يپوتەكا ۋاقىتى ۇزارتىلىپ, ءۇشىنشى بالا تۋىلعاننان كەيىن يپوتەكالىق نەسيە وتەلەدى. تۋ دەڭگەيى تومەن ايماقتارعا وتباسىن قولداۋ باعدارلاماسى اياسىندا 75 ميلليارد رۋبل بولىنەدى.
ەكىنشى ۇلتتىق جوبا دەنساۋلىق ساقتاۋ سالاسىن دامىتۋعا باعىتتالعان. پۋتين ۇسىنعان ءىس-شارالاردىڭ قاتارىندا ايەلدەر كونسۋلتاتسيالارى جەلىسىن كەڭەيتۋ جانە بالالار ەمحانالارى مەن اۋرۋحانالارىن جاڭعىرتۋ, ديسپانسەرلەۋگە سالىق شەگەرىمى, شاعىن قالالار مەن اۋىلداردا سپورت وبەكتىلەرىن سالۋ بار.
ءۇشىنشى ۇلتتىق جوبا «رەسەي جاستارى» – مەكتەپ, كوللەدج ديرەكتورلارىنىڭ كەڭەسشىلەرى 5 مىڭ رۋبل, ال شاعىن ەلدى مەكەندەردەگى سىنىپ جەتەكشىلەرى مەن مەكتەپ كۋراتورلارى 10 مىڭ رۋبل سىياقى الادى. «كادرلار» ءتورتىنشى ۇلتتىق جوباسى ءتۇرلى سالاداعى مامانداردى دايارلاۋعا باعىتتالعان. ال سوڭعى «دەرەكتەر ەكونوميكاسى» جوباسىنا كەمىندە 700 ميلليارد رۋبل ءبولۋ جوسپارلانعان. پۋتين «اقپاراتتىق ەگەمەندىك» جانە «جاساندى ينتەللەكتى دامىتۋدىڭ ۇلتتىق ستراتەگياسى» تۋرالى ۇزاق سويلەدى. ونىڭ يدەياسىنا سايكەس 2030 جىلعا قاراي رەسەيلىك سۋپەركومپيۋتەرلەردىڭ جالپى قۋاتى 10 ەسە ارتۋى كەرەك. ول كاسىپكەرلەردى رەسەيدىڭ IT يندۋسترياسىنا ينۆەستيتسيا سالۋعا شاقىردى.
سونىمەن قاتار رەسەي پرەزيدەنتى ۇكىمەتكە سالىقتان قۇتىلۋ ءۇشىن بيزنەسىن «كىشىرەيتكەن» شاعىن كومپانيالارعا راقىمشىلىق جاساۋدى تاپسىردى. ول «مۇنداي كومپانيالارعا وتكەن كەزەڭدەر ءۇشىن ايىپپۇل, سانكتسيالار سالىنبايدى, سالىقتار قايتا ەسەپتەلمەيدى», دەپ ۋادە بەردى.
سونداي-اق 2030 جىلعا قاراي پۋتين ەڭ تومەنگى جالاقى مولشەرىن 35 مىڭ رۋبلگە دەيىن ارتتىراتىنىن ايتتى (قازىر ول 19 مىڭنان ءسال اسادى). رەسەي باسشىسىنىڭ ايتۋىنشا, قازىر رەسەي حالقىنىڭ 9 پايىزدان استامى (13,5 ميلليون ادام) كەدەيلىك دەڭگەيىندە, 2030 جىلعا قاراي ونى 7 پايىزعا دەيىن تومەندەتۋ كوزدەلگەن.
قاراپ وتىرساق, ۆلاديمير پۋتين ءوزىنىڭ جوسپارلارىن 2030 جىلعا دەيىن جاساقتاعان. بيىلعى پرەزيدەنتتىك سايلاۋدا جەڭىسكە جەتسە, ول كەزدە ونىڭ بەسىنشى پرەزيدەنتتىك مەرزىمى اياقتالادى. ءپۋتيننىڭ ايتۋىنشا, 2030 جىلعا قاراي رەسەي روبوتتار سانى بويىنشا الدىڭعى 25 ەلدىڭ قاتارىنا كىرۋى, يمپورتتىڭ ۇلەسى ءىجو-ءنىڭ 17 پايىزىنا دەيىن تومەندەۋى جانە مەكتەپتەردى كۇردەلى جوندەۋ ماسەلەسى شەشىلۋى كەرەك. ول سوڭعى ماسەلەگە 400 ميلليارد رۋبل بولۋگە ۋادە بەردى.
وتكەن سەنبى كۇنى مەملەكەت باسشىسى قاسىم-جومارت توقاەۆ رەسەي پرەزيدەنتى ۆلاديمير پۋتينمەن تەلەفون ارقىلى سويلەستى. كرەملدىڭ ءباسپاسوز قىزمەتىنىڭ حابارلاۋىنشا قاسىم-جومارت توقاەۆ رەسەي پرەزيدەنتىنىڭ فەدەرالدىق جينالىسقا جولداۋى مازمۇندى, باعدارلامالىق سيپاتتا بولعانىن ەرەكشە اتاپ ءوتتى.