پرەمەر-مينيستر ولجاس بەكتەنوۆ استانانىڭ بىرقاتار ينفراقۇرىلىمدىق, الەۋمەتتىك جانە مادەني نىسانىنا باردى.
ۇكىمەت باسشىسى «ينتەرناتسيونالنىي» تۇرعىن الابىنداعى قۋاتى تاۋلىگىنە 105 مىڭ م3 بولاتىن №3 جاڭا سورعى-سۇزگى ستانساسىنىڭ جۇمىسىمەن تانىستى. ونىڭ ىسكە قوسىلۋى ەلوردانىڭ اۋىزسۋ قاجەتتىلىگىن تولىعىمەن جابۋعا مۇمكىندىك بەردى.
«وتكەن جىلى سۋمەن قامتاماسىز ەتۋدە پروبلەمالار بولدى. مەملەكەت باسشىسىنىڭ تاپسىرماسىمەن ءتيىستى شارالار قابىلدانىپ, 2027 جىلعا دەيىن قاجەتتى قۋات قورى قالىپتاستىرىلدى. ينجەنەرلىك ينفراقۇرىلىم ۇدايى وزىق قارقىنمەن دامۋعا ءتيىس. پروبلەمالارعا جول بەرىلمەۋى كەرەك», دەدى ولجاس بەكتەنوۆ.
وعان قوسا قانىش ساتباەۆ اتىنداعى كانالدان جانە قۋاتى تاۋلىگىنە 210 مىڭ م3 بولاتىن №4 سورعى-سۇزگى ستانساسىنان ۇزىندىعى 200 كم سۋ قۇبىرىن سالۋ جوبالارىن ازىرلەۋ باستالدى. بۇل ەلوردانىڭ 2035 جىلعا دەيىنگى قاجەتتىلىكتەرىن وتەيدى.
سونىمەن قاتار پرەمەر-مينيسترگە استانانىڭ باسقا دا تىرشىلىكتى قامتاماسىز ەتۋ جۇيەلەرىنىڭ دامۋى تۋرالى باياندالدى. ۇكىمەتتىڭ قولداۋىمەن بىرقاتار جاڭا نىسان قۇرىلىسى اياقتالدى. بۇگىنگى تاڭدا 3-ءشى جەو-نىڭ ءبىرىنشى كەزەگى, سونداي-اق قۋاتى ساعاتىنا 1 100 گكال بولاتىن «تۇران» جانە «وڭتۇستىك-شىعىس» ەكى گاز جىلۋ ستانساسى ىسكە قوسىلىپ, قالانىڭ جىلۋ بەرۋ قۋاتى 30%-عا ۇلعايدى.
استانانىڭ ەنەرگيا كوزدەرىنىڭ جالپى قۋاتى ساعاتىنا 3,7 مىڭ گكال-دان اسادى. قازىرگى جىلۋ بەرۋ ماۋسىمىندا قالانىڭ ەڭ جوعارى تۇتىنۋ دەڭگەيى شامامەن ساعاتىنا 3 مىڭ گكال-دى قۇرادى. وسىلايشا, پروفيتسيت ساعاتىنا 700 گكال-عا جەتىپ وتىر, بۇل قالانىڭ قاجەتتىلىكتەرىن 2027 جىلعا دەيىن قامتاماسىز ەتۋگە مۇمكىندىك بەرەدى.
بۇل رەتتە 2024 جىلى «تۇران» گاز جىلۋ ستانساسىنىڭ ەكىنشى كەزەگىن, «تەلمان» ستانساسىنىڭ ءبىرىنشى كەزەڭىن جانە 3-ءشى جەو-نىڭ كومىر بولىگىن تولىعىمەن اياقتاۋ, 2-ءشى جەو-نى كەڭەيتۋ جوباسىن باستاۋ جانە «وڭتۇستىك-باتىس» ستانساسىن جوبالاۋعا كىرىسۋ جوسپارلانىپ وتىر. وسى جوبالاردىڭ بارلىعىن ىسكە اسىرۋ 2035 جىلعا دەيىن قاجەتتى جىلۋ قورىن تولىق قامتاماسىز ەتۋگە مۇمكىندىك بەرەدى.
سونداي-اق ەلوردانى گازبەن قامتۋ جۇمىستارى جالعاسىپ جاتىر. بۇگىنگى تاڭدا 13 تۇرعىن ءۇي الابىندا 12,5 مىڭنان استام ابونەنت كوگىلدىر وتىنعا قول جەتكىزدى. قازىرگى ۋاقىتتا قۋاتتىلىعى 460 مىڭ م3/ساع بولاتىن ەكى اۆتوماتتاندىرىلعان گاز تاراتۋ ستانساسى جۇمىس ىستەيدى. بۇل رەتتە, جاڭا ەنەرگيا كوزدەرىنىڭ ىسكە قوسىلۋىن جانە تۇتىنۋدىڭ ءوسۋىن ەسكەرە وتىرىپ, بيىل قۋاتى 350 مىڭ م3/ساع جاڭا اگرس-3 قۇرىلىسىن باستاۋ جوسپارلانىپ وتىر. جوبانى اياقتاۋ مەرزىمى 2025 جىلعا دەيىن.
سونىمەن قاتار ۇكىمەت باسشىسىنا ەلوردانىڭ ەلەكترمەن جانە سۋمەن جابدىقتاۋ جۇيەلەرىن نىعايتۋ جۇمىستارى, اۆتوجولداردى كۇردەلى جوندەۋ جانە كارىزدىك جۇيەلەردى جاڭعىرتۋ جوسپارلارى تۋرالى اقپارات بەرىلدى.
ولجاس بەكتەنوۆ تولە بي كوشەسىندەگى 2 مىڭ ورىنعا ارنالعان جايلى مەكتەپ قۇرىلىسىنىڭ بارىسىمەن تانىستى. اتالعان نىساننىڭ اشىلۋى وسى جىلدىڭ تامىز ايىنا جوسپارلانعان.
مەملەكەت باسشىسى قاسىم-جومارت توقاەۆتىڭ تاپسىرماسىمەن «جايلى مەكتەپ» ۇلتتىق جوباسى جۇزەگە اسىرىلىپ كەلەدى. رەسپۋبليكادا 2024-2025 جىلدارى 740 مىڭ وقۋشىعا ارنالعان 369 جايلى مەكتەپتى, ونىڭ ىشىندە بيىل 217 مەكتەپتى ىسكە قوسۋ جوسپارلانىپ وتىر. ولاردىڭ قۇرىلىسى بىرىڭعاي ستاندارتپەن جۇرگىزىلەدى. بۇل رەتتە اۋىلدىق جەرلەردە 163 مەكتەپ سالىنادى.
ولجاس بەكتەنوۆ بۇل جۇمىستاردا وتاندىق ءوندىرىستىڭ قۇرىلىس ماتەريالدارى مەن جيھازدارىن بەلسەندى پايدالانۋدىڭ ماڭىزدىلىعىن اتاپ ءوتتى.
سونداي-اق پرەمەر-مينيستر شىۇ جەلىسى بويىنشا جانە دۇنيەجۇزىلىك كوشپەلىلەر ويىندارى اياسىندا وتەتىن ءىس-شارالار كەزىندە پايدالانىلاتىن تاۋەلسىزدىك سارايى مەن «قازانات» يپپودرومىنىڭ اۋماعىنداعى جوندەۋ جۇمىستارىنىڭ بارىسىن تەكسەردى.