گەرمانيانىڭ بەدەلدى عىلىمي-ساراپتامالىق ورتالىعى – «عىلىم جانە ساياسات قورى» «ورتا دەرجاۆالار – حالىقارالىق ساياساتتاعى ماڭىزدى فاكتورلار» اتتى كولەمدى ماقالالار جيناعىن جارىققا شىعاردى. جيناقتا قازاقستان العاش رەت ورتا دەرجاۆالار قاتارىنا ەندى. قازاقستان بۇرىن-سوڭدى بۇل ساناتقا ەنبەگەن ەدى, دەپ جازادى Egemen.kz sayasat.kz-كە سىلتەمە جاساپ.
«ورتا دەرجاۆالار» ساناتىنا الەمدىك ارەناداعى ساياسي جانە ەكونوميكالىق ماڭىزدى مەملەكەتتەر ەنەدى. بۇل تىزىمنەن قازاقستان بيىل العاش رەت تابىلدى. «ورتا دەرجاۆالار» ساناتىندا تۇركيا, يزرايل جانە ءۇندىستان سىندى مەملەكەتتەر دە بار.
بۇل ۇيىمنىڭ گەرمانيا ۇكىمەتىمەن جانە پارلامەنتىمەن ارىپتەستىگىن ەسكەرە وتىرىپ, ەۋروپالىق وداق ەلدەرىنىڭ ورتالىق ازياداعى قازاقستانعا كوبىرەك نازار اۋداراتىنىن بولجاۋعا بولادى.
ۇيىمنىڭ قازاقستاندى «ورتا دەرجاۆالار» ساناتىنا قوسۋىنا ەلدەگى سىرتقى ساياسات, تۇراقتى دامۋ, ەنەرگەتيكا مەن ناقتى شەشىمدەر اسەر ەتكەن.
«عىلىم جانە ساياسات قورىنىڭ» ماقالاسى ەۋروپالىقتارعا وزگەرىس تۋرالى سيگنال بەرەدى: ەندى ولار بۇرىن ستراتەگيالىق قاشىقتا بولعان ەلدەرمەن دە ساناسۋعا ءماجبۇر بولادى, ايتسە دە ولارمەن سەرىكتەستىكتە بولۋ ەكونوميكالىق جانە ساياسي جاعىنان ءتيىمدى. ەۋروپالىق وداق ەلدەرىنىڭ اقپاراتتىق كۇن تارتىبىندە قازاقستان جاڭا ەكونوميكالىق جانە ساياسي ارىپتەس رەتىندە عانا ەمەس, ينۆەستيتسيالار ءۇشىن الاڭ رەتىندە دە ءجيى تانىلاتىنىن ايتۋعا بولادى. ونىڭ كىرىسپەسى پرەزيدەنت ق.توقاەۆتىڭ شەت مەملەكەتتەرگە ساپارلارى اياسىندا باستالىپ تا كەتتى.
وسىلايشا, 2023 جىلعى جۇمىس ساپارلارى كەيبىر ەۋروپالىقتاردىڭ ساناسىندا قازاقستاننىڭ يدەولوگيالىق كوزقاراستاردان تىس ءوز مۇددەلەرىن سەنىمدى قورعايتىن جانە ديپلوماتيا ونەرى قاجەت بولعان جەردە جاۋاپكەرشىلىكتى ءوز موينىنا الۋعا دايىن ەگەمەن ەل رەتىندەگى بەينەسىن بەكىتىپ ۇلگەردى», دەپ جازدى اقپاراتتىق پورتال.