ءماجىلىس سپيكەرى ەرلان قوشانوۆتىڭ توراعالىعىمەن بيۋرو وتىرىسى ءوتىپ, الداعى جالپى وتىرىستىڭ كۇن ءتارتىبى ناقتىلاندى.
دەپۋتاتتاردىڭ تالقىلاۋىنا بايلانىس, تسيفرلاندىرۋ جانە اقپاراتتاندىرۋ سالاسىنىڭ ينۆەستيتسيالىق احۋالىن ارتتىرۋ ماسەلەلەرى تۋرالى زاڭ جوباسىن ءبىرىنشى وقىلىمدا قاراۋ ۇسىنىلدى.
دەپۋتاتتاردىڭ باستاماسىمەن ازىرلەنگەن زاڭ جوبا تەلەكوممۋنيكاتسيالىق ينفراقۇرىلىمدى دامىتۋعا, قالالار مەن اۋىلدىق ەلدى مەكەندەردە بايلانىستىڭ قولجەتىمدىلىگىن قامتاماسىز ەتۋگە جانە ساپاسىن جاقسارتۋ ءۇشىن جاعداي جاساۋعا باعىتتالعان. تۇزەتۋلەر سپۋتنيكتىك تەحنولوگيالار مەن يننوۆاتسيالاردى قولدانۋ اياسىن كەڭەيتۋدى قامتاماسىز ەتۋدى كوزدەپ وتىر.
سونداي-اق ەكى راتيفيكاتسيالىق جوبا ۇسىنىلادى. ولار – قازاقستان مەن قىرعىز ۇكىمەتتەرى اراسىنداعى اۆياتسيالىق ىزدەستىرۋ جانە قۇتقارۋ سالاسىنداعى ىنتىماقتاستىق تۋرالى كەلىسىم جانە قازاقستان مەن ليتۆا اراسىنداعى ازاماتتىق, وتباسىلىق جانە قىلمىستىق ىستەر بويىنشا قۇقىقتىق كومەك پەن قۇقىقتىق قاتىناستار تۋرالى شارتقا وزگەرىس ەنگىزۋ تۋرالى حاتتاما.
بۇدان باسقا دەپۋتاتتار «قازاقستان رەسپۋبليكاسىنىڭ سوت جۇيەسى جانە سۋديالارىنىڭ مارتەبەسى تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا وزگەرىستەر مەن تولىقتىرۋلار ەنگىزۋ تۋرالى» كونستيتۋتسيالىق زاڭىنىڭ جوباسى بويىنشا پارلامەنت پالاتالارىنىڭ بىرلەسكەن كوميسسياسىنىڭ قۇرامىن سايلايتىن بولادى.
سونىمەن قاتار ءماجىلىس كوميتەتى قارجى نارىعىن دامىتۋ جانە قارجىلىق كورسەتىلەتىن قىزمەتتەردى تۇتىنۋشىلاردىڭ قۇقىقتارىن قورعاۋ ماسەلەلەرى بويىنشا تۇزەتۋلەردى جۇمىسقا الادى.