ءبىزدىڭ ەلىمىزدە پوليۆينيلحلوريد (پۆح) ءوندىرىسى جوقتىڭ قاسى دەۋگە بولادى. دەگەنمەن تاياۋ جىلدار ىشىندە بۇل ولقىلىقتىڭ دا ورنى تولاتىنداي. وتكەن جىلدىڭ اياعىنا تامان «بايتەرەك» ۇبح» اق ەنشىلەس ۇيىمى «قازاقستاننىڭ دامۋ بانكى» اق (قدب) تۇركىستان وبلىسىنداعى جاڭا ءبىر ينۆەستيتسيالىق جوباعا قارجىلاندىرۋ اشتى. «ساستوبە» يننوۆاتسيالىق كەشەنى» كومپانياسى ىسكە اسىراتىن بۇل جوباعا كاۋستيكالىق سودا, پۆح جانە كالتسي كاربيدىن ءوندىرۋ جونىندەگى اۋقىمدى باعىتتار توپتاستىرىلعان.
جاڭا بىرەگەي ءوندىرىس ىشكى نارىققا وتاندىق بيزنەستە سۇرانىسقا يە دايىن تاۋارلاردىڭ كەڭ سپەكترىن وندىرۋگە شيكىزات بەرەدى.
كاۋستيكالىق سودا ءارتۇرلى ءوندىرىس سالاسىندا توقىما, حيميا, تاماق, مۇناي جانە باسقا دا كوپتەگەن سالادا قولدانىلادى. كىر جۋاتىن ۇنتاقتىڭ, سۋسابىنداردىڭ, جۋعىش جانە تازارتقىش زاتتاردىڭ كوپشىلىگىندە كاۋستيك بار, قاعاز, ۆيسكوزا, تاماق جانە اليۋميني توتىعىن وندىرۋدە دە قولدانىلادى.
پۆح سينتەتيكالىق ماتەريالدارعا جاتادى. ول مەديتسينالىق ونىمدەردى (قان پرەپاراتتارى مەن ىشكى اعزالاردى ساقتاۋعا جانە تاسىمالداۋعا ارنالعان كونتەينەرلەر, كاتەتەرلەر, ءدارى تامىزعىشتار, قولعاپتار, ماسكالار, تابلەتكالارعا ارنالعان قاپتامالار) وندىرۋدە, اۆتوموبيل جاساۋدا (تىعىزداعىشتار, سالوندى جابدىقتاۋ ەلەمەنتتەرى, ەلەكتريكانى وقشاۋلاۋ), قۇرىلىستا (پۆح-دان جاسالعان سەندۆيچ-پانەلدەر, تەرەزەلەرگە ارنالعان ۆينيل پروفيلدەر, كارىز قۇبىرلارى مەن وقشاۋلاعىش ماتەريالدار), قاپتاما رەتىندە (جۇمساق جانە قاتتى ىدىستارعا ارنالعان پلەنكا, بوتەلكەلەر, ءتىس پاستاسى مەن كرەمدەرگە ارنالعان تۇتىكتەر, ۇيالى تەلەفون كورپۋستارى جانە ولارعا كەرەك-جاراقتار) قولدانىلادى.
جوبانى قازاقستاننىڭ ەكىنشى دەڭگەيدەگى بانكىمەن بىرلەسە وتىرىپ قارجىلاندىرۋ اياسىندا قولداۋ جوسپارلانىپ وتىر. ونىڭ جالپى قۇنى – 153,88 ملرد تەڭگە, ونىڭ ىشىندە قدب-نىڭ قاتىسۋى 64,46 ملرد تەڭگەنى قۇرايدى.
– جوبانىڭ ماڭىزدىلىعى قازىرگى تاڭدا قازاقستاندا ءپوليۆينيلحلوريدتىڭ (پۆح) ءوندىرىسىنىڭ بولماۋىندا جاتىر, ال كەلەشەكتە بوي كوتەرەتىن كاسىپورىن ىشكى نارىقتىڭ وسى ونىمگە دەگەن قاجەتتىلىگىن تولىعىمەن جابادى. سونداي-اق جوبا كاۋستيكالىق سودانىڭ ىشكى نارىعىن ۇلعايتۋدى قوسا العاندا, جالپى, حيميا سالاسىنىڭ دامۋىنا سەرپىن بەرەدى, – دەپ ءتۇسىندىردى قدب باسقارما توراعاسى مارات ەلىباەۆ.
زاۋىت تۇركىستان وبلىسىنىڭ دامۋى ءۇشىن ماڭىزدى الەۋمەتتىك-ەكونوميكالىق اسەر ەتەدى. ونىڭ قۇرىلىس جۇمىستارى جۇرگىزىلەتىن كەزەڭىندە 1 مىڭعا جۋىق جۇمىس ورنى اشىلادى. ال ءوندىرىس وشاعى پايدالانۋعا بەرىلگەننەن كەيىن وتاندىق ماماندار ءۇشىن جاڭادان 346 جۇمىس ورنى قۇرىلادى.
جوبالىق قۋاتقا شىققان كەزدە كاسىپورىن جىلىنا 100 مىڭ تونناعا دەيىن كاۋستيكالىق سودا, 120 مىڭ توننا پۆح جانە 180 مىڭ توننا كالتسي كاربيدىن وندىرەدى. ىشكى نارىقتى قامتۋدان باسقا, ەاەو جانە ەۋروپالىق وداق ەلدەرىنە, سونداي-اق قىتاي مەن تۇركياعا ەكسپورت جوسپارلانعان.
– قدب تاراپىنان بولىنگەن ينۆەستيتسيالاردىڭ ارقاسىندا ءبىزدىڭ ەلىمىزدە الەۋمەتتىك ماڭىزى بار, قالا قۇراۋشى جانە ءوڭىر مەن بۇكىل قازاقستاننىڭ دامۋىنا قۋاتتى سەرپىن بەرەتىن جاڭا جوبا پايدا بولادى. وسى جوبانى ىسكە اسىرۋ بارىسىندا جاڭا جۇمىس ورىندارى اشىلادى, بيۋدجەتكە جىل سايىنعى سالىق تولەمدەرى ەداۋىر ۇلعايىپ, ونىڭ مولشەرى 10 ملرد تەڭگەدەن استام سومانى قۇرايتىن بولادى, – دەپ اتاپ ءوتتى «ساستوبە» يننوۆاتسيالىق كەشەنى» جشس ديرەكتورى بولات ەستەمەسوۆ.