قوناەۆ قالاسىنىڭ اكىمدىگى ەلدى مەكەندەر شەكاراسىنىڭ وزگەرۋىنە بايلانىستى مالىمدەمە جاسادى. شاھار باسشىسى نۇرلان قۇماتاەۆتىڭ ايتۋىنشا, زارەچنىي اۋىلدىق وكرۋگىنىڭ (زارەچنىي, ارنا اۋىلدارى) 9757 گەكتار جەرى «G4 city» جوباسىنىڭ قۇرامىنا ەنۋىنە بايلانىستى تۇرعىندار نەگىزسىز قاۋىپتەنىپ وتىر. ول اتالعان وزگەرىستىڭ حالىقتىڭ تۇرمىس-تىرشىلىگىنە ەش اسەر ەتپەيتىنىن اتاپ ءوتتى. سەبەبى, تۇرعىندار قازىرگى الەۋمەتتىك جانە اكىمشىلىك ورتالىقتا قىزمەت الاتىن بولادى.
«مۇنداي وزگەرىستەر «G4 city» جوباسىنىڭ جۇزەگە اسۋى ءۇشىن جاسالىپ وتىر. ءبىز اۋىلدىق وكرۋگ تۇرعىندارىنا الەۋمەتتىك جانە اكىمشىلىك قىزمەتتەر كورسەتۋدى ارى قاراي جالعاستىرا بەرەمىز. ونىڭ ۇستىنە, قازىرگى تاڭدا كوپتەگەن مەملەكەتتىك قىزمەتتەردى ەلەكتروندى ۇكىمەت پورتالى ارقىلى الۋعا بولادى. بالالاردى بالاباقشاعا كەزەككە قويۋ, مەكتەپكە وقۋعا بەرۋ – بارلىعى ەلەكتروندى فورمادا رەتتەلەدى. اۋىل حالقىنىڭ تىنىس-تىرشىلىگى ۇنەمى نازاردا», دەدى نۇرلان قۇماتاەۆ.
بۇدان بولەك, قوناەۆ قالالىق كوپسالالى اۋرۋحاناسىنىڭ ديرەكتورى ايمان راكيشەۆا الداعى ۋاقىتتا ەلدى مەكەن جۇرتى ىلە اۋدانى وتەگەن باتىر كەنتىندەگى مەديتسينالىق مەكەمەدە ەم قابىلدايدى دەگەن پىكىردى تەرىسكە شىعاردى.
«زارەچنىي اۋىلدىق وكرۋگىنىڭ تۇرعىندارى ءبىزدىڭ اۋرۋحانادا ەمدەلەدى. سونداي-اق اۋىلدا دارىگەرلىك امبۋلاتوريا بار ەكەنىن ەستەن شىعارماعانىمىز ءجون. بىزگە جۇگىنگەن ءار ناۋقاسقا تولىققاندى مەديتسينالىق كومەك كورسەتىلەدى», دەدى اۋرۋحانا باسشىسى.
ەستەرىڭىزگە سالا كەتەيىك, 31 قازان كۇنى قالالىق ءماسليحاتتىڭ كەزەكتەن تىس ءحىىى سەسسياسى ءوتتى. جيىندا قوناەۆ قالاسى مەن الماتى وبلىسىنداعى اۋىلدىق وكرۋگتەردىڭ شەكاراسىن وزگەرتۋ تۋرالى ماسەلە قارالدى.