الماتىدا تۇڭعىش قازاق تىلىندە «بالالار مەن جاسوسپىرىمدەر اراسىنداعى گادجەتتەرگە تاۋەلدىلىكتىڭ الدىن-الۋ شارالارى» اتتى وقۋ-ادىستەمەلىك نۇسقاۋلىق جارىق كوردى.
قاراپ وتىرساق, الماتىدا باستاۋىش سىنىپ وقۋشىلارىنىڭ 35%-ى تاۋلىگىنە كەم دەگەندە 1-2 ساعات گادجەتكە تەلمىرەدى. بۇل بالالاردىڭ 33%-ى عالامتوردا بايلانىپ وتىراتىن بولسا, 9%-ى گادجەتكە مۇلدەم قارامايدى. ال 13-15 جاستاعى جاسوسپىرىمدەردىڭ 69%-ى كۇندىز-ءتۇنى 2 ساعاتتاي نەمەسە ودان كوپ ۋاقىت ۆيرتۋالدى الەمگە سۇڭگيدى.
سونىمەن دۇنيەجۇزىلىك پسيحيكالىق ساۋلىق كۇنى قارساڭىندا «بالالار مەن جاسوسپىرىمدەر اراسىنداعى گادجەتتەرگە تاۋەلدىلىكتىڭ الدىن-الۋ شارالارى» اتتى وقۋ-ادىستەمەلىك قۇرال جارىق كوردى.
وقۋ-ادىستەمەلىك قۇرالدا الماتى قالالىق پسيحيكالىق ساۋىقتىرۋ ورتالىعى قىزمەتكەرلەرىنىڭ قالا مەكتەپتەرىندەگى بالالار مەن جاسوسپىرىمدەردىڭ گادجەتكە تاۋەلدىلىگىن زەرتتەۋ ناتيجەلەرىنىڭ قورىتىندىسى جاريالانعان. ورتالىقتىڭ ديرەكتورى ساپار راحمەنشەەۆتىڭ ايتۋىنشا, زەرتتەۋ جۇمىستارىنا 6-18 جاس ارالىعىنداعى 3300 وقۋشى تارتىلسا, ولاردىڭ 1664-ءى – قىز بالالار , 1636-ءى – ۇلدار (49,5%).
– مۇعالىمدەر مەن اتا-انالارعا ارنالعان مۇنداي نۇسقاۋلىق قازاق جانە ورىس تىلدەردە ءبىرىنشى رەت جارىق كوردى. كىتاپشادا بالالارداعى گادجەتتەرگە جالپى تاۋەلدىلىكتىڭ قاي دەڭگەيدە ەكەنىن انىقتاۋ بارىسىندا قانداي سۇراقتار قويۋ كەرەك, قالاي كومەكتەسۋ كەرەكتىگى جايىندا ماعلۇماتتار بار. زەرتتەۋ جۇمىستارى 2022-2023 جىلدارى الماتى قالاسىنىڭ جالپى ءبىلىم بەرەتىن مەكتەپتەرىنىڭ باسشىلارى, اتا-انالارىنىڭ كەلىسىمى ارقىلى ساۋالناما ادىسىمەن جۇرگىزىلدى. گادجەتكە تاۋەلدى بالانىڭ ويىنپازعا اينالۋى وپ-وڭاي. بۇل دەرتپەن كۇرەسۋ ءۇشىن الدىمەن قۇمار ويىندارىنا ەلىكتىرەتىن جارنامالاردى توقتاتۋ كەرەك, – دەيدى ساپار راحمەنشەەۆ.
ماماندار اتسالىسقان زەرتتەۋلەردىڭ ناتيجەسىندە باستاۋىش سىنىپتاعى بالالاردىڭ, جاسوسپىرىمدەردىڭ بويىنداعى گادجەتكە تاۋەلدىلىكتىڭ بەلگىلەرى, سەبەپتەرى انىقتالعان. بۇل نۇسقاۋلىق – الماتى قالالىق پسيحيكالىق ساۋىقتىرۋ ورتالىعى مەن الماتى قالالىق ءبىلىم باسقارماسى جانە قازاقستان-رەسەي مەديتسينالىق ۋنيۆەرسيتەتىنىڭ بىرلەسكەن جوباسى.
بۇگىن − دۇنيەجۇزىلىك پسيحيكالىق ساۋلىق كۇنى الماتى قالالىق پسيحيكالىق ساۋىقتىرۋ ورتالىعىعىندا اشىق ەسىك كۇنى ءوتتى. ورتالىقتىڭ پسيحولوگتارى, پسيحياترلارى, تەراپەۆتەرى مەن نەۆروپوتولوگتارى تەگىن مەديتسينالىق, پسيحولوگيالىق كەڭەس بەردى.