تۇركىستان وبلىسىنىڭ اكىمى دارحان ساتىبالدى مادەنيەت سالاسىن دامىتۋ باعىتىنداعى جۇمىستاردى سارالاۋ ءۇشىن مادەنيەت جانە ونەر قايراتكەرلەرىن قابىلدادى. كەزدەسۋگە قازاقستاننىڭ ەڭبەك سىڭىرگەن قايراتكەرى نۇرعيسا داۋەشوۆ, پروديۋسەر, رەجيسسەر, ستسەناريست سەرجان مولداسان ۇلى, ءانشى, قازاقستاننىڭ ەڭبەك سىڭىرگەن قايراتكەرى مەيرامبەك بەسپاەۆ قاتىسىپ, تۇركىستاندا ونەر, مادەنيەت سالالارىن دامىتۋ باعىتىندا پىكىر الماستى, دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.
بيىل «كونگرەسس حولل» كوپسالالى كەشەنىنە قوسىمشا مادەنيەت قىزمەتكەرلەرىنە 100 شتات بىرلىگى بەرىلگەن بولاتىن. جاڭا جۇمىس ورىندارىنا ماماندار الۋ ءۇشىن ارنايى حابارلامالار بەرىلىپ, الەۋمەتتىك جەلىلەردە تاراتىلدى. سونداي-اق استانا, الماتى قالالارىنا وكىلدەر جىبەرىلىپ, ونەر ماماندارىن دايارلايتىن جوعارى وقۋ ورىندارىندا اقپاراتتىق, تۇسىندىرمە جۇمىستارى جۇرگىزىلدى. ناتيجەسىندە ارنايى كاستينگ جاريالانىپ, العاشقى ىرىكتەۋگە قازاقستاننىڭ ءار وڭىرىنەن وتىنىشتەر تۇسكەن.
«تۇركىستان – بارشاعا ورتاق قالا. اتىنىڭ ءوزى تۇركى ەلدەرىنىڭ مادەني-رۋحاني استاناسى بولۋعا لايىق ەكەنىن بىلدىرەدى. قوجا احمەت ياساۋي كەسەنەسى دە – تالاي ءتۋريستىڭ كەلۋىنە باستى سەبەپ. ەندى وبلىستىڭ مادەنيەتى دە جاندانىپ, وسى ورايدا اتا-بابالارىمىزدان قالعان ءداستۇر مەن ۇلتتىق قۇندىلىقتى ساقتاپ قالۋىمىز كەرەك. ۇلتتىق بولمىسىمىز مادەنيەتىمىز ارقىلى كورىنىس تابۋى ءتيىس. شەتەل تۋريستەرىن ءوزىمىزدىڭ بولمىسىمىزبەن, ونەرىمىزبەن قىزىقتىرا الامىز. تۇركىستاندا سىرتتان كەلگەن قوناقتار قىزىعاتىنداي, ەرەكشە ءستيلى بار, ءوز ونەر ۇجىمى قالىپتاسسا دەگەن ويمەن وسى باستامانى قولعا الىپ وتىرمىز. ونەر مەن مادەنيەتتە تۇركىستاننىڭ ءوز برەندى قالىپتاسۋى قاجەت», دەگەن دارحان ساتىبالدى جاڭا ونەر ۇجىمىنىڭ رەپەرتۋارىن بايىتۋ, تىڭ يدەيالاردى جۇزەگە اسىرۋ جولىندا دايىندىعىن كۇشەيتۋدى تاپسىردى.
وبلىستىق مادەنيەت جانە تۋريزم باسقارماسىنىڭ باسشىسى ءازىمحان قويلىباەۆ وسى باعىتتا بەكىتىلگەن ارنايى جوسپارعا سايكەس قازىرگى تاڭداعى شىعارماشىلىق ۇجىمداردى قالىپتاستىرۋ جۇمىستارى تۋرالى باياندادى. رۋحانيات ورداسىنا الماتى, شىمكەنت, قاراعاندى, تاراز, قىزىلوردا, پەتروپاۆل قالالارى مەن تۇركىستان وبلىسىنىڭ اۋداندارىنان 80-گە جۋىق ءتۇرلى ونەر يەلەرى كەلىپ, ءوز باقتارىن سىناپ, بايقاۋدان سوڭ 54 جاس مامان ىرىكتەلىپ الىنعان. بۇگىندە جاڭا ۇجىممەن پروديۋسەر, رەجيسسەر, ستسەناريست, تەلەجۇرگىزۋشى سەرجان مولداسان ۇلى تىعىز جۇمىس ىستەپ جاتىر.
«باستاپقىدا ۋايىم بولدى, تاۋەكەل ەتتىم. ىرىكتەۋدەن وتكەن جاستار وتە تالانتتى. مۇنداعى تالانتتار ءبىرىن-ءبىرى ىزدەپ كەلگەندەي. ونەرپازداردىڭ اراسىنان ۆوكالدىق, كلاسسيكالىق, ءداستۇرلى انشىلەر مەن ۇلتتىق اسپاپتار وركەسترى جانە بي ۇجىمى جاساقتالىپ جاتىر. 25 قازان – رەسپۋبليكا كۇنى قارساڭىندا ونەر كورسەتەمىز دەپ جوسپارلاپ وتىرمىز. جىگىتتەر تالانتتى, بىرنەشە اسپاپتا ويناي الادى. ەرەكشە جاڭالىعىمىز, تۇركىستان تۋرالى ميۋزيكل جازىپ جاتىرمىز. ناتيجەسىن الدا كورە جاتارسىزدار. ەڭ باستىسى جيناقتالعان ونەر ۇجىمىن وسى ايماققا ءسىڭىرىپ, تالاپتارىن اشۋ – مىندەتىمىز», دەدى پروديۋسسەر.
مۋزىكانت, قازاقستاننىڭ ەڭبەك سىڭىرگەن قايراتكەرى نۇرعيسا داۋەشوۆ تۇركىستاننىڭ مادەني تىنىسى وزگە وبلىستاردان كوش ىلگەرى ەكەنىن تىلگە تيەك ەتتى.
ء«ۇش جىل قاتارىنان ءوتىپ جاتقان «تۇركىستان داۋىسى-2023» رەسپۋبليكالىق جاس ورىنداۋشىلار بايقاۋى تۇركىستاننىڭ برەندى دەسەك بولادى. دەڭگەيى جوعارى. ەلىمىزدىڭ وزگە وڭىرلەرىندە مۇنداي رەسپۋبليكالىق ءان دوداسى جوقتىڭ قاسى. ال ەندى شتات اشۋ ماسەلەسىنىڭ قانشالىقتى قيىن ەكەنىن جاقسى بىلەمىن. بۇل وبلىستا جۇمىس جۇيەگە قويىلعاندىعىن كورسەتەدى. وقۋ ءبىتىرىپ جاتقان تالانتتار كوپ, ال جۇمىس ورنى جەتىسپەيدى. جالپى ونەر ۇجىمىنىڭ دامۋىنا كيىم, باسپانا ماسەلەسىمەن قاتار, ەلىمىزگە جانە شەتەلگە گاسترولدىك ساپارلار شابىت بەرەدى. ساتتىلىك تىلەيمىن», دەدى ول.
ءانشى, قازاقستاننىڭ ەڭبەك سىڭىرگەن قايراتكەرى مەيرامبەك بەسپاەۆ تۇركىستانداعى وسىنداي جاڭالىققا قۋانعانىن جەتكىزىپ, بىرقاتار ۇسىنىسىن ءبىلدىردى.
«التىنبەك قورازباەۆ اعامىز ءبىر كەزدەرى ءبارىمىزدىڭ باسىمىزدى وسىلاي قوسىپ ەدى, بۇل وقيعا سول شاقتى ەسكە ءتۇسىردى. جالپى ونەر ۇجىمدارىن قولداۋ وتە ماڭىزدى. سەرجان باۋىرىمىزدى وسىعان جەتەكشىلىك ەتۋگە كوندىردىك, ويتكەنى ول كوپتەگەن ىسكە باستاماشى بولعان ىسكەر ازامات. رايىمبەك سەيتمەتوۆ اعامىز دا كەزىندە وسىندا كەلىپ, قانشاما مىقتى شاكىرت تاربيەلەدى, تەاتر اشتى. جاڭا ۇجىم تۇركىستاننىڭ ابىرويىن اسقاقتاتادى دەپ سەنەم», دەگەن ءانشى ونەر ۇجىمىن قولداۋعا دايىن ەكەنىن, بولاشاقتا بىرگە ونەر كورسەتەتىنىن جەتكىزدى.