ءورت ەندى باستالعاندا اقكەنت تۇرعىندارى ەرىك توكەن ۇلى مەن داۋلەتقالي نۇرلان ءتورت دوسىمەن سول ماڭدا سىرتتا تۇرعان. ولار ءورت سوندىرۋشىلەر كەلگەنگە دەيىن, ودان كەيىن دە قۇتقارۋ جۇمىسىنا باسىنان اياعىنا دەيىن قاتىسىپتى. كىلەم تاۋىپ اكەلىپ جۇرگەن دە سولار ەكەن, دەپ حابارلايدى Egemen.kz.
«ەسىك الدىندا ءتورت دوسىممەن تۇرعان ەدىك. اقىرىنداپ الدىمەن ءتۇتىن شىعا باستادى. ەشكىم جوق ول كەزدە. الدىمەن بىرنەشە بالانى, قىزدى الىپ شىقتىم. ودان كەيىن ءتۇتىن قويۋلانىپ كەتتى. جوعارى قاباتتان جايمالاردى ءبىر-بىرىنە بايلاپ, تاعى ءبىر بالانى ءتۇسىردىم. تومەندە جىگىتتەر ونى قاعىپ الدى. 15-20 مينۋتتا 4 رەت وسىلاي كوتەرىلىپ شىقتىم. ودان كەيىن ءبىزدى عيماراتقا جولاتپاي قويدى», دەدى داۋلەتقالي نۇرلان ۇلى.
داۋلەتقالي وسى كەزدە ءبىرىنشى قاباتتاعى پاتەردىڭ ءبىرىنىڭ تەرەزەسىنەن كىلەم, ماتراستى كورگەنىن ايتتى.
«تەرەزەنى سىندىردىق تا ولاردى الىپ شىقتىق. ولارمەن كەم دەگەندە 7-8 ادامدى توسىپ الدىق», دەيدى.
سونداي-اق ەرىك توكەن ۇلى ەسىنەن تانىپ قالعان ۇلكەن كىسىگە جاساندى جولمەن دەم بەرىپ, العاشقى مەديتسينالىق كومەك كورسەتكەنىن ايتتى.
ء«بىر كەزدە ەسىن جينادى, جەدەل جاردەم كولىگىنە سالىپ جىبەردىك. ءبىر ايەل 6-قاباتتان ەكى بالاسىن لاقتىردى. ماتراسپەن توسىپ الدىق. ودان كەيىن ءوزى جانە اپكەسى سەكىردى. سول كەزدە ءوزى ەسىنەن تانىپ قالدى. وعان دا دەم بەرىپ, ەسىن جيدىردىق», دەيدى ەرىك توكەن ۇلى.