ەلىمىزدە جىل باسىنان بەرى وندىرىستە 69 ادام كوز جۇمعان. ال جازاتايىم وقيعالاردان 640 جۇمىسكەر زارداپ شەككەن. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى ەڭبەك جانە الەۋمەتتىك قورعاۋ كوميتەتىنىڭ ەكى توقسان بويىنشا قورىتىندى ەسەبىندە جاريالانعان.
جالپى, 6 ايدىڭ قورىتىندىسى بويىنشا وندىرىستىك جاراقاتتانۋ 2022 جىلدىڭ ەكىنشى جارتىجىلدىعىمەن سالىستىرعاندا 4%-عا تومەندەدى. ۆەدومستۆو مالىمەتىنە سۇيەنسەك, بيىل 6 ايدا وندىرىستىك جاراقاتتانۋ كوەففيتسيەنتى (1 000 جۇمىسكەرگە شاققانداعى جازاتايىم وقيعالاردىڭ جيىلىگى) 0,09% قۇرادى. «وندىرىستىك ايماقتاردا جاراقات الۋدىڭ ەڭ جوعارى دەڭگەيى ساقتالعان. ماسەلەن, قاراعاندى وبلىسىندا – 79 ادام, شقو-دا – 53 ادام, اباي وبلىسىندا – 50 ادام, پاۆلودار وبلىسىندا – 46 ادام, قوستاناي وبلىسىندا – 44 ادام, اقتوبە وبلىسىندا 40 ادام زارداپ شەككەن. سونداي-اق الماتى قالاسىندا 50 ادام زارداپ شەكتى», دەلىنگەن حابارلامادا.
ەكونوميكانىڭ سالالارى بويىنشا ەڭ كوپ زارداپ شەككەندەر تاۋ-كەن مەتاللۋرگيا كەشەنىنىڭ ونەركاسىپتەرىندە – 21,8% جانە قۇرىلىس سالاسىندا – 10,6%. جازاتايىم وقيعالاردىڭ ورىن الۋىنىڭ نەگىزگى سەبەپتەرى: جابىرلەنۋشىنىڭ ءوزىنىڭ ورەسكەل ابايسىزدىعى – 33,3%; وندىرىستەگى جۇمىستىڭ ءتيىستى دەڭگەيدە ۇيىمداستىرىلماۋى – 27,1%; ەڭبەك قاۋىپسىزدىگى جانە ەڭبەكتى قورعاۋ ەرەجەلەرىن بۇزۋ – 9,3%; جول قوزعالىسى ەرەجەلەرىن بۇزۋ 8,4%. سوڭعى بەس جىلدىڭ ىشىندە مەملەكەتتىك ورگاندار مەن جۇمىس بەرۋشىلەردىڭ ەڭبەكتى قورعاۋ سالاسى بويىنشا قابىلدانعان كەشەندى شارالاردىڭ ناتيجەسىندە وندىرىستىك جاراقاتتانۋ دەڭگەيى 6,5%-عا ءتۇستى. پروفيلاكتيكا مەن بۇزۋشىلىقتى الدىن الۋ ماقساتىندا ەلىمىزدىڭ 3 211 كاسىپورنى قاۋىپسىزدىك پەن ەڭبەكتى قورعاۋ ستاندارتتارىن ەنگىزدى.
سونداي-اق كاسىپوداقتار فەدەراتسياسىمەن بىرلەسىپ, مۇگەدەكتىگى بار ادامداردى «حالىقتىق باقىلاۋشى» رەتىندە تارتۋدى كوزدەيتىن «حالىقتىق باقىلاۋ» الەۋمەتتىك ماڭىزدى جوباسى ەنگىزىلەدى. بۇگىندە جوبانى ىسكە اسىرۋعا رەسپۋبليكانىڭ 252 كاسىپورنى بىرىكتى. وندا 600-دەن استام جۇمىسكەر ىشكى باقىلاۋدى قاداعالاۋدا.
جالپى, قاۋىپسىز ەڭبەك جاعدايىن جاساۋ مەن وندىرىستىك جاراقاتتانۋدى ازايتۋ ەل ۇكىمەتى مەن ەڭبەك جانە حالىقتى الەۋمەتتىك قورعاۋ مينيسترلىگىنىڭ نەگىزگى مىندەتتەرىنىڭ ءبىرى. وسى رەتتە 2019 جىلدان باستاپ ۆەدومستۆو تاراپىنان «نولدىك جاراقات – Vision Zero» تۇجىرىمداماسىن جەتىلدىرۋ بويىنشا بەلسەندى جۇمىس اتقارىلدى. وعان بۇگىندە 440 كاسىپورىن قوسىلدى.
ايتا كەتەيىك, «ونلاين ەڭبەك كونسۋلتانتى» ەلەكتروندى سەرۆيسى ىسكە قوسىلدى. ول جۇمىسكەر مەن جۇمىس بەرۋشىنىڭ اراسىندا قاشىقتىقتان ءوزارا ارەكەتتەسۋدى قامتاماسىز ەتۋ ءۇشىن ەڭبەك زاڭناماسىنىڭ ساقتالۋىنىڭ تيىمدىلىگىن ارتتىرۋعا مۇمكىندىك بەرەدى. سەرۆيس جۇمىس بەرۋشىنىڭ ەڭبەكتى قورعاۋ تالاپتارىنىڭ ساقتالۋىن وزىندىك تەكسەرۋدەن ءوتۋىن قاراستىرادى. قوسىمشا ىسكە قوسىلعالى بەرى 23 420 جۇمىس بەرۋشى پايدالانىپتى.