پرەمەر-مينيستر ءاليحان سمايىلوۆتىڭ توراعالىعىمەن وتكەن «جاسىل ەكونوميكاعا» كوشۋ جونىندەگى كەڭەستىڭ وتىرىسىندا ەلىمىزدىڭ وڭىرلەرىندەگى ەكولوگيالىق احۋالدى جاقسارتۋ جانە جاڭارتىلاتىن ەنەرگيا كوزدەرىن دامىتۋ ماسەلەلەرى قارالدى.
ءىس-شاراعا ورتالىق مەملەكەتتىك ورگانداردىڭ, «اتامەكەن» ۇكپ, ءىرى سالالىق ورتالىقتار مەن قاۋىمداستىقتاردىڭ باسشىلارى, سونداي-اق بۇۇ وكىلدەرى قاتىستى.
ەكولوگيا جانە تابيعي رەسۋرستار ءمينيسترى ءزۇلفيا سۇلەيمەنوۆا وسى اتتاس تۇجىرىمدامانى ىسكە اسىرۋ شەڭبەرىندە وتكەن 10 جىل ىشىندە ەكونوميكانىڭ ەنەرگيا سىيىمدىلىعى 2008 جىلعى دەڭگەيدەن 36,7%-عا قىسقارتىلىپ, جەك ۇلەسى 4,5%-عا دەيىن جەتكىزىلگەنىن باياندادى. سونىمەن قاتار ورمانداردىڭ اۋدانى 5%-عا, ال ەرەكشە قورعالاتىن تابيعي اۋماقتاردىڭ ۇلەسى رەسپۋبليكا اۋماعىنىڭ 10%-دان استامىنا دەيىن جەتكىزىلدى.
سونداي-اق قازاقستان كومىرتەگى بەيتاراپتىعىنا قول جەتكىزۋدىڭ 2060 جىلعا دەيىنگى ستراتەگياسى قابىلدانعاننان كەيىن تۇجىرىمدامانى وزەكتەندىرۋ شەڭبەرىندە 2030 جىلعا قاراي كوممۋنالدىق قالدىقتاردى قايتا وڭدەۋ جانە كادەگە جاراتۋ كورسەتكىشىن 40%-عا, ال ۇزاق مەرزىمدى پەرسپەكتيۆادا – 2050 جىلعا قاراي 60%-عا دەيىن جەتكىزۋ جوسپارلانىپ وتىر. اۋىلدىق جەرلەردە ورتالىقتاندىرىلعان جۇيەنى ۇيىمداستىرۋ ارقىلى 2040 جىلعا قاراي حالىقتى قالدىقتاردى جيناۋ جانە كادەگە جاراتۋ قىزمەتتەرىمەن قامتۋ 100%-عا جەتۋى ءتيىس.
بۇل رەتتە كاسىپورىندارعا ەڭ ۇزدىك قولجەتىمدى تەحنولوگيالاردى ەنگىزۋدى ىنتالاندىرۋ ارقىلى 2050 جىلعا قاراي ونەركاسىپ قالدىقتارىن قايتا وڭدەۋ جانە كادەگە جاراتۋ ۇلەسىن 60%-عا دەيىن جەتكىزۋ جوسپارلانىپ وتىر. سونىمەن قاتار قاتتى تۇرمىستىق قالدىقتار (قتق) پوليگوندارىن قالپىنا كەلتىرۋ جانە جاڭادان سالۋ بويىنشا جۇمىستار جۇرگىزىلەتىن بولادى.
جاڭارتىلعان تۇجىرىمدامانى ىسكە اسىرۋ شەڭبەرىندە اتموسفەراعا لاستاۋشى زاتتار شىعارۋدى ازايتۋ, اتاپ ايتقاندا جەو-نى جاڭعىرتۋ جانە گاز وتىنىنا كوشۋ, ەرەكشە قورعالاتىن تابيعي اۋماقتاردى جانە وسىمدىكتەر مەن جانۋارلاردىڭ سيرەك كەزدەسەتىن تۇرلەرىن قورعاۋ, سونداي-اق ورمان القابىن كەڭەيتۋ ەسەبىنەن شارالار قابىلداناتىن بولادى.
اۋىل شارۋاشىلىعى, ەنەرگەتيكا جانە سۋ رەسۋرستارىن باسقارۋ سالالارىندا دا ەكولوگياعا قولايلى شارالاردى ىسكە اسىرۋ جوسپارلانعان.
پرەمەر-مينيستر «جاسىل ەكونوميكا» جالپى ەلىمىزدىڭ تۇراقتى دامۋىنىڭ ماڭىزدى قۇرالدارىنىڭ ءبىرى ەكەنىن اتاپ ءوتتى. وسىعان بايلانىستى تۇجىرىمدامادا قويىلعان ماقساتتار مەن ينديكاتورلارعا قول جەتكىزۋ قازاقستان ەكونوميكاسىنىڭ دامۋ تراەكتورياسىن ايتارلىقتاي وزگەرتۋدى تالاپ ەتەدى.
«وسىنىڭ ناتيجەسىندە حالىقتىڭ تۇرمىس جاعدايى, اتموسفەرالىق اۋانىڭ جاي-كۇيى, قالدىقتاردى باسقارۋ, سۋ جانە جەر رەسۋرستارىن پايدالانۋ جاقسارادى», دەدى ءاليحان سمايىلوۆ.
پرەمەر-مينيستر ەكولوگيا مينيسترلىگىنە تۇجىرىمدامانى وزەكتەندىرۋدى جەدەلدەتىپ, جوبانى 1 جەلتوقسانعا دەيىن ۇكىمەت اپپاراتىنا ەنگىزۋدى تاپسىردى.
وتىرىستا جاڭارتىلاتىن ەنەرگيا كوزدەرىن ودان ءارى دامىتۋ بويىنشا جوسپارلار مەن قابىلدانىپ جاتقان شارالار بارىسى تالقىلاندى. بۇگىنگى تاڭدا رەسپۋبليكادا جيىنتىق قۋاتى 2 525 مۆت بولاتىن 132 جەك نىسانى جۇمىس ىستەپ جاتقانى اتالدى. جاڭا نىسانداردى ىسكە قوسۋ جوسپارلى مەرزىمىنەن بۇرىن جۇزەگە اسىپ كەلەدى. جالپى, 2027 جىلعا قاراي تاعى 6 720 مۆت جاڭارتىلاتىن گەنەراتسيانى ەنگىزۋ جوسپارلانىپ وتىر.
ۇكىمەت باسشىسى ءداستۇرلى جانە جاڭارتىلاتىن ەنەرگيا سەكتورلارىن ۇندەستىرۋدىڭ, سونداي-اق ءۇي شارۋاشىلىقتارى, شاعىن جانە ورتا بيزنەس, شارۋا قوجالىقتارى دەڭگەيىندە شاعىن جەك قوندىرعىلارىن دامىتۋدى ىنتالاندىرۋدىڭ ماڭىزدى ەكەنىن اتاپ ءوتتى.